អ្នកដឹកនាំរឿងវ័យក្មេង ប្រាប់បទពិសោធន៍ផលិតភាពយន្តក្រោយបញ្ចប់ការសិក្សាពីកូរ៉េ

2018-08-16 07:55:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករភាពយន្តវ័យក្មេងម្នាក់ ឈ្មោះ មុនី កណ្ណដារង្គ ទើបត្រឡប់មកពីប្រទេសកូរ៉េខាងត្បូង ក្រោយបញ្ចប់ការសិក្សាជំនាញផលិត និងដឹកនាំភាពយន្តដោយជោគជ័យ។ មុននឹងបញ្ចប់ការសិក្សា យុវជនរូបនេះបានបង្កើតស្នាដៃ ដោយផលិត និងដឹកនាំវីដេអូចម្រៀង «ផ្ញើចិត្តនឹកតាមខ្យល់» និងរឿងខ្លី «ខ្យល់ខែកុម្ភៈ» សម្ដែងដោយ តារាចម្រៀង Sai និង កញ្ញា ថាច់ ម៉ារីក្នុងពេលថ្មីៗនេះដែលមាននៅលើ App Soyo។

រូបភាពក្រៅឆាក រឿងខ្លី «ខ្យល់ខែកុម្ភៈ»

បទពិសោធន៍ ៣ ឆ្នាំក្នុងប្រទេសកូរ៉េ ក្នុងសាលាភាពយន្តដ៏ល្បីមួយនោះ យុវជនវ័យ ២៨ឆ្នាំ មុនី កណ្ណដារង្គ ប្រាប់ឱ្យដឹងថា ជាបទពិសោធន៍ដ៏មានតម្លៃ ហើយកាន់តែធ្វើឱ្យយុវជនម្នាក់នេះស្វែងយល់កាន់តែច្បាស់ពីបញ្ហាខ្វះចន្លោះក្នុងការផលិតភាពយន្តឱ្យទទួលបានជោគជ័យក្នុងពេលអនាគត។

អ្នកដឹកនាំរឿង មុនី កណ្ណដារង្គ

លោក ដារង្គ បន្តថា៖ «ជាក់ស្ដែងកូរ៉េគេមានគោលនយោកបាយ ឬនិយាយបានថាមានគម្រោងដើម្បីធ្វើឱ្យវិស័យភាពយន្តដំណើរការទោះជាមានការហូរចូលភាពយន្តបរទេសដូចគ្នាក្នុងប្រទេសខ្មែរយើង»។ ទោះជាយ៉ាងណា ការព្យាយាមរបស់ផលិតករខ្មែរបច្ចុប្បន្ន ដើម្បីបន្តដង្ហើមសិល្បៈភាពយន្តនេះ ពិតជាធ្វើឱ្យយុវជនរូបនេះកោតសរសើរ និងថ្លែងអំណរគុណ ព្រោះនេះជាក្តីសង្ឃឹម ហើយក៏ជាស្ពានរបស់យុវជនជំនន់ក្រោយដូចជារូបលោកផ្ទាល់មានឱកាសបន្តស្នាដៃ។

រូបភាពក្រៅឆាក

យុវជន រូបនេះក៏លើកឡើងដែរថា កម្ពុជាត្រូវការការបណ្តុះបណ្តាលធនធានមនុស្សក្នុងវិស័យភាពយន្ត និងការផ្តល់ថវិការសម្រាប់ផលិតករផលិតភាពយន្តឱ្យបានច្រើនដើម្បីអាចជំរុញការបង្កើតថ្មី មានការប្រកួតប្រជែង និងមានស្ថេរភាពផលិតភាពយន្តក្នុងស្រុក ទាក់ទាញទេសចរណ៍ និងផ្សព្វផ្សាយពីវប្បធម៌ខ្មែរដល់អន្តរជាតិបានច្រើនបាន។

អ្នកដឹកនាំរឿង មុនី កណ្ណដារង្គ

តាមរយៈបទពិសោធន៍ពីប្រទេសកូរ៉េ លោក មុនី កណ្ណដារង្គ បញ្ជាក់ថា ជារៀងរាល់ឆ្នាំមានបេក្ខជនមិនតិចជាង ១០០០ នាក់ទេ បានប្រឡងចប់ជំនាញផលិតភាពយន្ត ដឹកនាំសម្ដែង ថតភាពយន្ត ឬបច្ចេកទេសភាពយន្តនានា។ យុវជនរូបនេះបន្តថា បើទោះជាមានការអូសទាញពីផលិតកម្មយក្សដូចជា Hollywood នាំយកធនធានមនុស្សទៅច្រើនយ៉ាងណាក៏ដោយ ប្រទេសកូរ៉េនៅតែអាចផលិតភាពយន្តខ្លួនឯងដោយមានគុណភាពដដែល។

រូបភាពក្រៅឆាក អ្នកដឹកនាំរឿង មុនី កណ្ណដារង្គ

បទពិសោធន៍ទាំងនេះឯង រឹតតែលើកទឹកចិត្តយុវជនរូបនេះឱ្យខិតខំ ស្វែងយល់សិក្សា និងប្ដេជ្ញាចិត្តថានឹងយកចំណេះជំនាញនេះមកអនុវត្ត និងចែកចាយសម្រាប់យុវជនដទៃទៀតដែលស្រលាញ់ការផលិតភាពយន្តដូចខ្លួន និងចង់ឃើញប្រទេសកម្ពុជាមានធនធានកាន់តែច្រើនលើវិស័យភាពយន្តដូចគ្នា៕

ចង់ដឹងកាន់តែច្បាស់ពី មុនី កណ្ណដារង្គ អ្នកដឹកនាំរឿងវ័យក្មេង តោះទស្សនាវីដេអី សម្ភាសខាងក្រោម៖

រូបភាពផ្តល់ដោយ៖ Chankakda-Photography

អត្ថបទ៖ Sunny