មហោស្រពភាពយន្តខ្លីចតុមុខ បន្តទទួលយកភាពយន្តខ្លី និងពង្រីកកម្មវិធីចាក់បញ្ចាំង
- 2018-08-17 03:29:50
- ចំនួនមតិ 0 | ចំនួនចែករំលែក 0
មហោស្រពភាពយន្តខ្លីចតុមុខ បន្តទទួលយកភាពយន្តខ្លី និងពង្រីកកម្មវិធីចាក់បញ្ចាំង
ចន្លោះមិនឃើញ
មហោស្រពភាពយន្តខ្លីចតុមុខ (CSFF) បានបង្កើតឡើងដើម្បីអបអរមហោស្រពភាពយន្តខ្លីក្នុងស្រុក និងជុំវិញពិភពលោក។ តាំងពីថ្ងៃប្រកាសទទួលយកភាពយន្តខ្លីចាប់ដើមឆ្នាំនេះ CSFF ទទួលបានភាពយន្តខ្លី ជាង១០០រឿងហើយ ដែលភាពយន្តទាំងនោះត្រូវបានផ្ញើមកទាំងក្នុងស្រុក និងមកពីប្រទេសផ្សេងៗទៀតជុំវិញពិភពលោក។
ទោះបីទទួលបានរឿងចំនួនច្រើនបែបនេះក្តី ក៏មហោស្រពភាពយន្តខ្លីចតុមុខនៅតែលើកទឹកចិត្ត សមិទ្ធិករក្នុងស្រុកឲ្យផ្ញើស្នាដៃភាពយន្តខ្លី មកកាន់មហោស្រពដោយជឿជាក់ថា ការផលិតនឹងបង្ហាញសាច់រឿងចេញពីគំនិតរបស់ផលិតករ គឺជាវិធីដែលពួកគេអាចបង្ហាញពីអ្វីដែលបានជួបប្រទះក្នុងជីវិតប្រចាំថ្ងៃ ក៏ដូច ជាសង្គម និងវប្បធម៌ ដែលពួកគេកំពុងរស់នៅផងដែរ។
មហោស្រពភាពយន្តខ្លីចតុមុខលើកទី៧ឆ្នាំនេះ រៀបចំដោយក្រុមភាពយន្តឈូករ័ត្ន (SFA)។ CSFF នឹងជ្រើសរើសភាពយន្តខ្លីដែលជាប់ចំណាត់ថ្នាក់ល្អបំផុត សម្រាប់មហោស្រពលើកទី៧ រយៈពេល១ខែទៀត។ ភាពយន្តខ្លីដែលជាប់ចំណាត់ថ្នាក់ មានពង្រីកកម្មវិធីចាក់បញ្ចាំង និងបែងចែកប្រភេទខុសៗគ្នាដូចជា៖
ការប្រកួតប្រជែងក្នុងស្រុក
ការប្រកួតប្រជែងក្រៅស្រុក
ការចាក់បង្ហាញភាពយន្តខ្លីក្នុងស្រុក
ការចាក់បង្ហាញភាពយន្តខ្លីអន្តរជាតិ
ការចាក់បង្ហាញរឿងខ្លីពិសេស-អាមេរិកអច្ឆរិយៈ និងភាពយន្តខ្លី ស្តីពីការងារអជ្ញាកណ្តាល
ការចាក់បង្ហាញភាពយន្តឯកសារខ្លី
មហោស្រពភាពយន្តខ្លីចតុមុខ នឹងរៀបចំសន្និសីទព័ត៌មាននៅថ្ងៃទី២២ ខែតុលា ឆ្នាំ២០១៨ ដើម្បីប្រកាសបើកព័ត៌មានពីកម្មវិធីមហោស្រពដែលនឹងប្រព្រឹត្តិឡើងនៅថ្ងៃទី ២៦ ខែតុលា ដល់ថ្ងៃទី៣០ខែតុលាឆ្នាំ២០១៨ ខាងមុខនេះ។
សមិទ្ធិករភាពយន្តខ្លីមួយចំនួន និងសមិទ្ធិករភាពយន្តខ្លីដែលជាប់ជយលាភីក្នុងកម្មវិធីមហោស្រព ភាពយន្តខ្លីចតុមុខកន្លងមក នៅតែបន្តអាជីពរបស់ពួកគេក្នុងវិស័យនេះ ដោយអ្នកខ្លះក្លាយទៅជា អ្នកផលិតកម្មវិធីសម្រាប់ស្ថានីយទូរទស្សន៍ និងផលិតវីដេអូសម្រាប់ការផ្សាយពាណិជ្ជកម្មជាដើម នេះជាការលើកឡើង របស់លោក គាំ វុត្ថា ជាប្រធានមហោស្រពភាពយន្តខ្លីចតុមុខក្នុងឆ្នាំនេះ។
លោក គាំ វុត្ថា បន្តថា៖ “ពួកយើងក៏នៅតែជំរុញ និងលើកទឹកចិត្តដល់សមិទ្ធិករក្មេងៗដទៃទៀត ឲ្យចាប់ផ្តើមផលិតស្នាដៃរបស់ពួកគេកាន់តែច្រើន ដើម្បីចូលរួមប្រកួតប្រជែងនៅក្នុងកម្មវិធីរបស់យើង និងក្នុងទីផ្សារ។ ពួកយើងត្រូវការអ្នកមានទេពកោសល្យ ជាមួយនឹងរឿងដែលមានគុណភាពជារៀងរាល់ឆ្នាំ”។
សូមដាក់ពាក្យតាម គេហទំព័រ www.filmfreeway.com/csff
សូមចូលមើលព័ត៌មានបន្ថែមតាម គេហទំព័រ chaktomukshortfilmfestival.com
និងនៅក្នុងទំព័រហ្វេសប៊ុករបស់ Chaktomuk Short Film Festival រីករាយការថតភាពយន្តខ្លីទាំងអស់គ្នា!