ត្រឹមមួយឆ្នាំ Soyo ចំណាយកន្លះលានដុល្លារដើម្បីផលិតភាពយន្តក្នុងស្រុក

2018-08-18 03:52:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ល្ងាចមិញនេះ Soyo ដែលជាបណ្ដាញកម្មវិធីទស្សនាភាពយន្ត វីដេអូកម្សាន្តផ្សេងៗ បានប្រារព្ធខួបគម្រប់មួយឆ្នាំ និងពិភាក្សាអំពីការអភិវឌ្ឍក្នុងវិស័យកម្សាន្តកម្ពុជាដែលមានការចូលរួមពីសំណាក់បុគ្គលល្បីៗពាក់ព័ន្ធវិស័យភាពយន្ត និងផលិតករយ៉ាងច្រើនកុះករ។

លោក ជី សិលា នាយកប្រតិបត្តិក្រុមហ៊ុន Sabay Digital

ក្នុងឱកាសនោះ លោក ជី សិលា នាយកប្រតិបត្តិក្រុមហ៊ុន Sabay Digital បានថ្លែងអំណរគុណទៅដល់បណ្ដា ផលិតករភាពយន្តទាំងអស់ដែលមានវត្តមាននៅទីនោះ ដោយបាននិយាយថា "បើសិនជាគ្មានអ្នកទាំងអស់គ្នា កម្មវិធី (Platform) របស់យើង គឺដូចជាកញ្ចក់ទទេស្អាតដោយគ្មានរូបភាពអីចឹង"។

គិតមកត្រឹមពេលនេះ Soyo ដែលជាកន្លែងមួយអាចឲ្យបណ្ដាផលិតករ (Filmmakers) Content Creators អាចចែករំលែកនូវស្នាដៃរបស់ខ្លួនទៅកាន់ទស្សនិកជន បង្កើតបានមួយឆ្នាំហើយ។ ក្នុងរយៈពេលកន្លងមកនេះ Soyo បានចំណាយដើមទុនដល់ទៅកន្លះលានដុល្លារសហរដ្ឋអាមេរិកឯណោះ ដើម្បីផលិតនូវភាពយន្ត និងវីដេអូកម្សាន្តផ្សេងៗ។ ជំហានបន្ទាប់ Soyo ក៏នៅតែស្វាគមន៍នូវការផលិតថ្មីៗ មិនថាជាភាពយន្ត ភាពយន្តខ្នាតខ្លី ឬភាពយន្តផលិតសម្រាប់តែដាក់បញ្ចាំងនៅក្នុង Soyo (Feature Films) នោះទេ។

លោក ឆាយ បូរ៉ា ប្រធានសមាគមភាពយន្តកម្ពុជា និងផលិតករ ហ៊ុុយ យ៉ាឡេង

តួយ៉ាងភាពយន្តថ្មីៗដូចជា Music Magic Love គឺស្ថិតនៅក្នុងចំណោមបណ្ដាផលិតផលថ្មីៗ ដែលគ្រោងផលិតសម្រាប់ដាក់ក្នុងបណ្ដាញមើលភាពយន្តតាមអ៊ីនធឺណិត។ មិនត្រឹមតែប៉ុណ្ណោះលោក ជី សិលា ក៏បានរម្លឹកឲ្យបណ្ដា Filmmaker ទាំងអស់មានគម្រោងត្រឹមត្រូវមុននឹងផលិតភាពយន្តផ្សេងៗយកមកដាក់ក្នុង Soyo ដូចជាបង្កើតកាលវិភាគ និងដើមទុនច្បាស់លាស់។

អ្វីដែលពិសេសបំផុតនោះ នាយកប្រតិបត្តិក្រុមហ៊ុនរូបនេះក៏បានបង្ហើបពីគម្រោងចុងឆ្នាំនេះ ដែលលោកនឹងណែនាំបណ្ដាអ្នកបច្ចេកទេសភាពយន្តក្រៅប្រទេសដើម្បីមកបង្ហាត់បង្រៀនដល់អ្នកចង់ចេះផ្នែកភាពយន្តក្នុងស្រុកទៀតផង៕