Ariana Grande យំរហាម ពេលនិយាយដល់ហេតុការណ៍ផ្ទុះគ្រាប់បែកឆ្នាំមុន
- 2018-08-18 04:53:06
- ចំនួនមតិ 0 | ចំនួនចែករំលែក 0
Ariana Grande យំរហាម ពេលនិយាយដល់ហេតុការណ៍ផ្ទុះគ្រាប់បែកឆ្នាំមុន
ចន្លោះមិនឃើញ
បង្ហាញវត្តមានក្នុងកម្មវិធីវិទ្យុកាលពីពេលថ្មីៗនេះ តារាចម្រៀងអាមេរិក Ariana Grande បានទម្លាយពីភាពសោកសៅដែលមាន ចាប់តាំងពីហេតុការណ៍បំផ្ទុះគ្រាប់បែក កើតឡើងកាលពីឆ្នាំមុន។
Ariana Grande បានអញ្ជើញចូលរួមក្នុងកម្មវិធីវិទ្យុ Beat 1 Radio របស់ Ebro ហើយបានទម្លាយព័ត៌មានមួយចំនួនទាក់ទងនឹងបទថ្មី "Get Well Soon” ពីក្នុងអាល់ប៊ុម "Sweetener”។
បទថ្មីនេះដែរ គឺជាសមិទ្ធផលមានន័យបំផុតសម្រាប់នាង ដោយសារតែវាមានបង្កប់នូវរឿងរ៉ាវមួយចំនួនពីហេតុការណ៍បំផ្ទុះគ្រាប់បែក ដែលបានកើតឡើងអំឡុងព្រឹត្តិការណ៍ប្រគំតន្ត្រីរបស់នាងកាលពីឆ្នាំ ២០១៧។
ដោយសារហេតុការណ៍នេះ បណ្ដាលឲ្យតារាស្រីរូបនេះ ក៏ដូចជាជនរងគ្រោះ គ្រួសារ និងមនុស្សជាច្រើនក្ដុកក្ដួលជាខ្លាំង ទើបនាងធ្វើបទនេះឡើង ក្នុងន័យផ្ដល់នូវការលើកទឹកចិត្ត ព្រមទាំងក្ដីស្រឡាញ់ជូនអ្នកដែលចាប់ពាក់ព័ន្ធនឹងពេលវេលាឈឺចាប់នោះ។
និយាយចូលចំណុចនេះ Ariana បាននិយាយទាំងទឹកភ្នែកថា នាងពិតជារងនូវការប៉ះទង្គិចខ្លាំងណាស់ពីហេតុការណ៍តក់ស្លុត ដែលកើតឡើងក្នុងទីក្រុង Manchester។ នាងបញ្ជាក់ច្បាស់ថា ខ្លួនពិតជាព្យាយាមបង្ហាញទៅអ្នកគាំទ្រ ថានាងរឹងមាំ ប៉ុន្តែធាតុពិត Ariana រងនូវភាពភ័យខ្លាចបំផុត។
រម្លឹកទៅកាលពីឆ្នាំ ២០១៧ មានមនុស្ស ២២នាក់បានស្លាប់ក្នុងហេតុការណ៍ផ្ទុះគ្រាប់បែក នៅទីក្រុង Manchester អំឡុងពេលនៃការប្រគំតន្ត្រីរបស់ Ariana Grande។ ក្រោយមកមិនដល់មួយខែផង Ariana រួមគ្នាជាមួយតារាជាច្រើនទៀតដូចជា Justin Bieber, Miley Cyrus, Liam Gallagher បង្កើតព្រឹត្តិការណ៍ប្រគំតន្ត្រី One Love Concert ដើម្បីឧទ្ទិសដល់អ្នកដែលបានស្លាប់ ក៏ដូចជាជនរងគ្រោះទាំងអស់៕