នីកូ ក្ដៅស្លឹកត្រចៀក អ្នកបន្លំ Facebook ម្ដងហើយម្ដងទៀត

2018-08-18 05:14:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង នីកូ បានបង្ហោះសារមិនសប្បាយចិត្ត នៅពេលមានជនខិលខូចនៅតែបន្ត បង្កើត Account Facebook ក្លែងក្លាយដោយប្រើប្រាស់ឈ្មោះ និងរូបថតរបស់លោកក្នុងន័យមិនល្អ។ ប្អូនប្រុសតារាចម្រៀង ណុប បាយ៉ារិទ្ធ បានអះអាងថា Account Facebook ក្លែងក្លាយនោះមានឈ្មោះថា Nico Valentine ។

FB ដែលនីកូ អះអាងថា ក្លែងក្លាយ

នីកូ បានសរសេរនៅលើ IG របស់ខ្លួនថា "ជាប់ទោសម្ដងហើយ ចេញមកវិញលេង Acc នឹងបោកគេទៀត គិតអី? ៧-៨ ឆ្នាំហើយ ខ្ញុំក៏ប្រកាសរាប់រយដងដែរ នេះមិនមែនជា Acc ខ្ញុំទេ"។ នៅពេលឃើញតួឯករឿង" អាពាហ៍ពិពាហ៍ចៃដន្យ" បញ្ចេញសារដូច្នេះ មានអ្នកគាំទ្រលោកជាច្រើន បានសម្ដែងនូវការព្រួយបារម្ភ តែក៏មានអ្នកគាំទ្រម្នាក់បានបញ្ចេញមតិថា ប្រហែលគេគ្រាន់តែបង្កើតក្នុងន័យគាំទ្រលោកនី កូ ក៏ថាបាន។ តារាចម្រៀងរូបនេះ បានឆ្លើយតបថា "បើជា Fan ប្រើឈ្មោះខ្ញុំបោកលុយគេរាប់ពាន់ រាប់ម៉ឺនដុល្លារៗ ប្រើឈ្មោះខ្ញុំទៅជេរគេ?” ។

អស់ពេលជាច្រើនឆ្នាំមកហើយ ម្ចាស់បទ"អោបបងនឹកគេ" ធ្លាប់ប្រកាសថា លោកមិនមាន Account Facebook នោះទេ ដោយលោកលេងតែ Instagram មួយគត់ ដែលមានAccount ឈ្មោះ Nico_Mrcookies ។

គួររម្លឹកថា កាលពីប៉ុន្មានឆ្នាំមុន មានបុរសម្នាក់បានបង្កើត Account FB ក្លែងក្លាយរបស់នីកូ ដោយបន្លំដើរបោកប្រាស់លុយកាក់ពីអ្នកគាំទ្រ ទាំងក្នុងស្រុកនិងក្រៅស្រុកអស់ប្រាក់យ៉ាងច្រើន។ បុរសរូបនោះ ក៏ធ្លាប់ត្រូវបានសមត្ថកិច្ចធ្វើការឃាត់ខ្លួនផងដែរ៕

អត្ថបទ៖ លឹម សុនា