រដ្ឋាភិបាលថៃ នឹងជប់លៀងឲ្យមនុស្ស ៦ម៉ឺននាក់ ចូលរួមជួយក្មេងថៃពីរូងភ្នំថាំហ្លួង

2018-08-18 07:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលថៃ នឹងរៀបចំពិធីជប់លៀងមួយ នៅក្នុងបរិវេណនៃរាជវាំង Royal Plaza នៅទីក្រុងបាងកក នាថ្ងៃទី០៦ ខែកញ្ញា ខាងមុខនេះ សម្រាប់អរគុណដល់មនុស្សជាង ៦០ ០០០នាក់ ដែលបានចូលរួមចំណែកក្នុងការជួយសង្គ្រោះក្រុមបាល់ទាត់ជ្រូកព្រៃ ទាំង១៣នាក់ ចេញពីរូងភ្នំថាំហ្លួង ខេត្តឈាងរ៉ាយ កាលពី២ខែមុន។

លោក Suwaphan Tanyuvardhana រដ្ឋមន្ត្រីក្រសួងមហាផ្ទៃថៃ បាននិយាយកាលពីថ្ងៃសុក្រថា ពិធីជប់លៀងនេះនឹងធ្វើឡើងចាប់ពីវេលាម៉ោង ៦ ល្ងាច ដល់ម៉ោង ៩ យប់។ ជាមួយគ្នានេះ ព្រះមហាក្សត្រថៃ ទ្រង់បានផ្ដល់ការអនុញ្ញាតឲ្យប្រើបរិវេណ Royal Plaza សម្រាប់កម្មវិធីនេះផងដែរ។

រដ្ឋាភិបាលថៃនឹងអញ្ជើញមនុស្សក្នុង និងក្រៅប្រទេសទាំងអស់ ដែលបានចូលរួមនៅក្នុងការជួយសង្គ្រោះនោះ។ ក្រសួងមហាផ្ទៃបានរាយការណ៍ថា មនុស្សប្រហែល ៦១ ០០០នាក់មកពីខេត្តចំនួន ៥៣ នឹងចូលរួមក្នុងពិធីនេះ។

មិនតែប៉ុណ្ណោះ ការអញ្ជើញក៏នឹងមានសម្រាប់ជនបរទេស ប្រហែល៣០០នាក់ផ្សេងទៀតដែលបានដើរតួយ៉ាងសំខាន់ក្នុងការជួយសង្គ្រោះនោះ។ ពួកគេមួយចំនួនរស់នៅក្នុងប្រទេសថៃ ប៉ុន្តែអ្នកខ្លះទៀតនៅក្រៅប្រទេស។ ក្រៅពីនេះ គេក៏រំពឹងផងដែរថា អ្នកកាសែតប្រហែល ៨ ០០០នាក់នឹងចូលរួមនៅក្នុងពិធីជប់លៀងដ៏ឱឡារិកនេះ។

គួររំលឹកឲ្យដឹងថា ក្មេងប្រុសចំនួន ១២នាក់ មានអាយុចន្លោះពី ១១ ដល់ ១៦ឆ្នាំ រួមទាំងគ្រូបង្វឹកអាយុ ២៥ឆ្នាំម្នាក់មកពីក្រុមបាល់ទាត់ជ្រូកព្រៃ បានចូល និងជាប់នៅក្នុងរូងភ្នំថាំហ្លួង អស់រយៈពេលជាង ២សប្តាហ៍ មុនពេលត្រូវគេសង្គ្រោះបានសម្រេច៕

ចុចអាន៖