ភាពយន្តឯកសាររបស់ Pep Guadiola បង្ហើបពីរបៀបបិទកំពូលខ្សែប្រយុទ្ធទាំង៣របស់ Liverpool

2018-08-19 09:16:33
ចំនួនមតិ 0 | ចំនួនចែករំលែក 0

ចន្លោះមិនឃើញ

តើត្រូវបញ្ឈប់កំពូលខ្សែប្រយុទ្ធទាំង៣នាក់របស់ Liverpool គឺ Salah, Sadio Mane and Roberto Firmino ដោយរបៀបណា?

វាជាសំណួរដែលគ្រូបង្វឹកភាគច្រើនបានលើកឡើង ប៉ុន្តែមិនមានចម្លើយឡើយក្នុងរយៈពេល១ឆ្នាំចុងក្រោយនេះ។ តែ Pep Guardiola អ្នកចាត់ការទូទៅរបស់ Man City ធ្វើបាន ដោយបានយកឈ្នះ Liverpool ៥-០ នៅកីឡដ្ឋាន Etihad កាលពីខែកញ្ញា ឆ្នាំទៅ។

នៅក្នុងវីដេអូ ដែលមានចំណងជើងថា All or Nothing – Manchester City ផលិតដោយក្រុមហ៊ុន Amazon មាន៨ភាគដែលនិយាយពីយុទ្ធនាការអំឡុងរដូវកាល ២០១៧-១៨ នៅពេលដែល Man City លើកពាន Premier Leauge ដោយមាន១០០ពិន្ទុ បានក្លាយទៅជាក្រុមដំបូងគេដែលបង្កើតប្រវត្តិសាស្ត្របែបនេះនៅ Premier League ។

”All or Nothing – Manchester City” ឆ្លុះបញ្ចាំងពីសកម្មភាពខាងក្រោយទីលានរបស់កីឡាករអាជីព គ្រូបង្វឹក និង បុគ្គលិករបស់ក្លឹប ដែលមនុស្សភាគច្រើនមិនបានដឹង។ នៅក្នុងវីដេអូនោះក៏និយាយរៀបរាប់អំពី វិធីសាស្រ្តក្នុងការបិទកំពូលខ្សែប្រយុទ្ធ Liverpool ផងដែរ។

សារដែលសំខាន់របស់គ្រូបង្វឹកអេស្ប៉ាញក្នុងវីដេអូ បង្ហាញពីសកម្មភាពក្នុងបន្ទប់តូចមួយដែលលោក Guardiola ប្រាប់ពីយុទ្ធសាស្រ្តដល់កូនក្រុមមុនចេញទៅសមរភូមិវាលស្មៅ ដើម្បីបញ្ឈប់ការគំរាមកំហែងរបស់ហង្សក្រហមគឺ "close the channels ឬ បិទប្រអប់" ជាតំបន់ដែលលោកគិតថា Salah និង Mane តែងវាយលុក។

”"ថ្ងៃនេះខ្ញុំនឹងពន្យល់អ្នកពីអ្វីដែល Liverpool ធ្វើនៅពេលវាយលុក។ គេជាក្រុមពូកែរត់ [យើង] ត្រូវរត់ប្រដេញ ដោយសារតែទីលានផ្នែកខាងលើសំខាន់។ ថ្ងៃនេះ នៅពេលបាល់មកដល់ក្រៅប្រអប់គ្រោះថ្នាក់ ត្រូវផ្តោតទៅលើតែ Mane និង Salah ព្រោះពេលបាល់ចូលដល់តំបន់កណ្តាល ពួកគេ នឹងបំលាស់ទីទៅស្លាប"។ "ពួកគេលឿនណាស់ សូម្បី [Man City] ក៏ពិបាកតាម។ ព្យាយាមដេញក្រៅប្រអប់ ហើយ បិទក្នុងប្រអប់" Guadiola ពន្យល់ក្នុងវីដេអូ។

វីដេអូនេះត្រូវបានគេវាយតម្លៃថាមិនត្រឹមតែល្អសម្រាប់អ្នកគាំទ្ររបស់ Man City ប៉ុណ្ណោះទេ ប៉ុន្តែក៏សម្រាប់អ្នកគាំទ្របាល់ទាត់ទូទៅ វាឆ្លុះបញ្ចាំងពីការរៀបចំយុទ្ធសាស្ត្របាល់ទាត់ដ៏ស្វិតស្វាញ និង ប៉ិនប្រសព្វរបស់ Guadiola ដែលជោគជ័យនៅលីគបាល់ទាត់ធំៗជាច្រើនរបស់ពិភពលោក៕