ដៃស្ដាំ Honda ចាប់ផ្ដើម មើលជើងកីឡាករ ត្រៀមហៅចូលជម្រើសជាតិហើយ
- 2018-08-20 02:27:37
- ចំនួនមតិ 0 | ចំនួនចែករំលែក 0
ដៃស្ដាំ Honda ចាប់ផ្ដើម មើលជើងកីឡាករ ត្រៀមហៅចូលជម្រើសជាតិហើយ
ចន្លោះមិនឃើញ
ក្នុងការប្រកួតរវាងក្រុម ណាហ្គាវើល និងបឹងកេត គេសង្កេតឃើញថាដៃស្ដាំអ្នកចាត់ការ Keisuke Honda ឈ្មោះថា Felix Agustin Gonzalez បានទៅទស្សនាផ្ទាល់ និងកត់ចំណាំកីឡាករផងដែរ។
ដោយការទៅទស្សនានោះ លោក Felix បានយកចិត្តទុកដាក់យ៉ាងខ្លាំង ទៅលើកីឡាករកម្ពុជា។ ខណៈដែលនេះអាចជាគោលការណ៍របស់អ្នកចាត់ការ Honda ដែលកំពុងនៅអូស្ត្រាលី ដើម្បីមើលកីឡាករម្នាក់ៗ ថាមានសមត្ថភាពគ្រប់គ្រាន់សម្រាប់ចូលជម្រើសជាតិបានឬទេ។ នេះដូចទៅនឹងអ្វីដែលអតីតកីឡាករជប៉ុនបានបញ្ជាក់រួចហើយថា លោកនៅក្រៅប្រទេសមែន ប៉ុន្តែមានក្រុមការងារនៅកម្ពុជាជានិច្ច ដើម្បីតាមដានការប្រកួតលីគនិងកីឡាករម្នាក់ៗ។
លោក Felix សញ្ជាតិអាហ្សង់ទីននេះ ត្រូវបានគេដឹងថាអាចនឹងក្លាយជាគ្រូបង្វឹកកម្ពុជាតែម្ដង ដើម្បីដឹកនាំក្រុមលេងមិត្តភាពនាពេលខាងមុខ។ ដោយកម្ពុជា នឹងត្រូវលេងមិត្តភាពជាមួយក្រុមម៉ាឡេស៊ី នៅថ្ងៃទី១០ខែកញ្ញា លេងទល់ក្រុមទីម័រនៅថ្ងៃទី១២ខែតុលា និងលេងទល់ក្រុមសិង្ហបុរីនៅថ្ងៃទី១៦ខែតុលាខាងមុខនេះ។ ការលេងមិត្តភាពនៅក្នុងដីខ្លួនឯង៣ប្រកួតនេះ គឺដើម្បីត្រៀមទៅលេងពានរង្វាន់ Suzuki Cup នៅចុងឆ្នាំ៕