ឆែកខ្ទេចគ្មានសល់! ACU ពិនិត្យដល់ស្រោមជើងអ្នកប្រឡងបាក់ឌុបព្រឹកមិញ
- 2018-08-20 02:30:51
- ចំនួនមតិ 0 | ចំនួនចែករំលែក 0
ឆែកខ្ទេចគ្មានសល់! ACU ពិនិត្យដល់ស្រោមជើងអ្នកប្រឡងបាក់ឌុបព្រឹកមិញ
ចន្លោះមិនឃើញ
ការប្រឡងមធ្យមសិក្សាទុតិយភូមិឆ្នាំ២០១៨បានព្រឹត្តិទៅដោយរលូន និងមានសភាពស្ងប់ស្ងាត់ពុំមានចំណុចខុសប្រក្រតីណាមួយគួរឲ្យកត់សម្គាល់នោះទេ។ ក្នុងនោះអ្នកសង្កេតការណ៍របស់អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា អនុរក្ស គណៈកម្មការទាំងអស់ បានរឹតបន្តឹងជាខ្លាំង មិនខុសពីឆ្នាំមុនៗឡើយ។ បេក្ខជនដែលទៅប្រឡងគ្រប់មណ្ឌលត្រូវបានត្រួតពិនិត្យគ្រប់ចន្លោះកន្លៀតគ្មានសល់ ដើម្បីធានាឲ្យបានថាបេក្ខជនមិនអាចយកអ្វីដែលក្រសួងបានហាមឃាត់ចូលទៅក្នុងមណ្ឌលប្រឡងបានឡើយ។
បេក្ខជនដែលពាក់ស្បែកជើងប៉ាត់តាត្រូវបានអ្នកសង្កេតការណ៍ ឲ្យដោះចេញដើម្បីពិនិត្យ ហើយបេក្ខជនណាដែលមានស្រោមជើងកវែងក៏ត្រូវឲ្យដោះចេញ ក្រែងលោកមានលួចលាក់សំណៅឯកសារណាមួយចូល។ អ្វីដែលគួរឲ្យកោតសរសើរនោះ ទាំងបេក្ខជនប្រឡងទាំងស្រី ទាំងប្រុស ពុំមានបង្កប់ឯកសារ និងឧបករណ៍អេឡិចត្រនិកណាមួយចូលឡើយ ពោលគឺមានសណ្ដាប់ធ្នាប់ និងរបៀបរៀបរយយ៉ាងល្អ។ ចំណែកឯនៅខាងក្រៅមណ្ឌលប្រឡងមានកងកម្លាំងសមត្ថកិច្ច នៅរក្សាសណ្ដាប់ធ្នាប់បានយ៉ាងល្អ។
តាមប្រសាសន៍ឯកឧត្ដមហង់ជួន ណារ៉ុន បានថ្លែងនៅវិទ្យាល័យព្រះស៊ីសុវត្ថិព្រឹកនេះ ឲ្យដឹងថានេះជាឆ្នាំទី៥ហើយ ដែលក្រសួងអប់រំបានធ្វើកំណែទម្រង់លើការប្រឡងមធ្យមសិក្សាទុតិយភូមិ។ ក្នុងឆ្នាំនេះមានបេក្ខជនដែលចូលរួមប្រឡងមានរហូតដល់ ១១៧ ០៦១នាក់ និងមានមណ្ឌលប្រឡងចំនួន១៩៥មណ្ឌល ចែកចេញជា ៤ ៧១៦បន្ទប់ នៅរាជធានី-ខេត្តទូទាំង២៥ នៃព្រះរាជាណាចក្រកម្ពុជា៕