បណ្ដុំម៉ាករថយន្តល្បីៗរបស់ Ronaldo មានតាំងពី Rolls Royce ដល់ Bugatti

2018-08-20 13:30:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្អែកតាម Wealthy Gorilla បុរសសញ្ជាតិព័រទុយហ្គាល់ Cristiano Ronaldo មានទ្រព្យសម្បត្តិប្រមាណ ៤០០ លានដុល្លារអាមេរិក។ ជាកីឡាករបាល់ទាត់ឲ្យក្លឹប Juventus ខ្សែប្រយុទ្ធវ័យ ៣៣ ឆ្នាំរូបនេះ ទទួលបានការសាទរពីអ្នកគាំទ្ររាប់លាននាក់ជុំវិញពិភពលោក។ ជោគជ័យទាំងនេះបានជំរុញឲ្យលោកហ៊ានចំណាយលុយយ៉ាងក្រាស់ក្រែល លើចំណង់ចំណូលចិត្តរថយន្តដោយស៊េរីទាបបំផុតគឺ Mercedes-Benz C220 CDI។

១.Bugatti Chiron:

ជារថយន្តមានតម្លៃថ្លៃបំផុតរបស់ Ronaldo ដោយត្រកូល Chiron មានតម្លៃ ៤,៧ លានដុល្លារ មានផលិតត្រឹម ៥០០ គ្រឿង។ Bugatti បានសម្រិតសម្រាំងធុនធ្ងន់នេះ ដោយបំពាក់ម៉ាស៊ីនកម្លាំងខ្លាំងអាចរត់នៅល្បឿនអតិបរមា ៤២០ គ.ម/ម៉ ស្ទុះពី ០ ទៅ ១០០ គ.ម/ម៉ ប្រើពេលត្រឹម ២,៥ វិនាទី។

២.Lamborghini Aventador LP 700-4:

ស្ថិតក្នុងតម្លៃក្បែរ ៣៤០ ០០០ ដុល្លារ រថយន្ត Lamborghini ធុននេះ អាចផលិតល្បឿនអតិបរមា ៣៥០ គ.ម/ម៉ ដោយល្បៀនស្ទុះពី ០ ទៅ ១០០ គ.ម/ម៉ ប្រើពេល ២,៩ វិនាទី។ បំពាក់នូវម៉ាស៊ីន V12 ចំណុះ ៦,៥ លីត្រ និងផលិតកម្លាំងបាន ៧០០ សេះ។

៣.BMW M6:

អំឡុងលេងឲ្យក្លឹប Manchester United អតីតខ្សែប្រយុទ្ធឆ្នើមរូបនេះ បានចំណាយលុយ ១០២ ០០០ ដុល្លារទិញរថយន្ត M6 នាឆ្នាំ ២០០៦។ បំពាក់នូវម៉ាស៊ីន V10 ចំណុះ ៥ លីត្រ ប៉ុន្តែធៀបនឹងទីផ្សារបច្ចុប្បន្នរថយន្តនេះអាចលក់ចេញបានថោកជាងមុនឆ្ងាយ។

៤.Bentley GT Speed:

GT Speed ផលិតកម្លាំងបាន ៥៩២ សេះ អាចរត់ដល់ល្បឿន ៣០៥ គ.ម/ម៉ ល្បឿនស្ទុះពី ០ ទៅ ១០០ គ.ម/ម៉ ប្រើពេល ៣,៤ វិនាទី។

៥.Aston Martin DB9:

រថយន្តរបស់ក្រុមហ៊ុនអង់គ្លេសមួយនេះ ដាក់លក់ក្នុងតម្លៃ ២០០ ០០០ ដុល្លារ ប្រើប្រាស់ម៉ាស៊ីន V12 រចនារូបរាងស្រស់ទាក់ទាញប្លែកខុសពីគេ។

៦.Audi R8:

រថយន្តស្ព័ររបស់ក្រុមហ៊ុនអាល្លឺម៉ង់ ទទួលបានការពេញនិយមពីតារាល្បីជុំវិញពិភពលោក ដោយក្នុងនោះក៏មាន Ronaldo មួយផងដែរ ហ៊ានចំណាយលុយ ១៥០ ០០០ ដុល្លារជាមួយត្រកូល R8។

៧.Ferrari:

បណ្តុំរថយន្តរបស់ Cristiano ក្នុងនោះត្រូវបានគេដឹងថាមានម៉ាក Ferrari បីគ្រឿង ដោយមួយជា 599 GTO ថ្លៃ ៣៨៥ ០០០ ដុល្លារ, F430 ថ្លៃ ៣០០ ០០០ ដុល្លារ និង 599 GTB Fiorano ថ្លៃ ៣១០ ០០០ ដុល្លារ។

៨.Rolls Royce Phantom:

Phantom ថ្លៃ ៤០០ ០០០ ដុល្លារ បំពាក់ម៉ាស៊ីន twin-turbo V12 អាចផលិតកម្លាំងបាន ៥៦៣ សេះ។

ក្រៅពីបានរៀបរាប់ដូចខាងលើ Ronaldo ក៏មានប្រើប្រាស់រថយន្ត Maserati GranCabrio, Porsche Cayenne, Porsche Cayenne Turbo, Porsche 911 Carrera 2S Cabriolet, Mercedes-Benz C220 CDI, Mercedes-Benz C-Class Sports Coupe, Bentley Continental GTC, Audi RS6, និង Audi Q7 ជាដើម។