មានចំណុចខ្លាំង ៣ ទើប Huawei អាចឈ្នះ Apple

2018-08-21 01:59:33
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលកន្លងទៅនេះក្រុមហ៊ុន Huawei បានសាងសមិទ្ធផលដ៏អស្ចារ្យមួយក្នុងប្រវត្តិសាស្ត្ររបស់ខ្លួន ដោយអាចលក់ស្មាតហ្វូនបានច្រើនជាង Apple នៅត្រីមាសទី ២ ឆ្នាំ ២០១៨ និងបានតំណែងជាក្រុមហ៊ុនស្មាតហ្វូនធំជាងគេលំដាប់លេខ ២។ សសរគ្រឹះធំៗទាំង ៣ ខាងក្រោមនេះ ជាកត្តាជួយឲ្យ Huawei ឈ្នះ Apple បានដូចបំណង ៖

១. ម៉ាកសញ្ញាពីរ ចក្ខុវិស័យតែមួយ

ក្រៅពីម៉ាកទូរសព្ទ Huawei ក្រុមហ៊ុនចិននេះមានកាន់កាប់ម៉ាកទូរសព្ទមួយទៀតឈ្មោះថា Honor។ ត្បិតថា Honor ជាម៉ាកទូរសព្ទឯករាជ្យមិនស្ថិតក្រោមការត្រួតត្រារបស់ Huawei ប៉ុន្តែចំណូលបានពីម៉ាក Honor ក៏បានបូកបញ្ចូលទៅក្នុងចំណូលសរុបរបស់ Huawei ផងដែរ។

យុទ្ធសាស្ត្រមានម៉ាកសញ្ញាពីរនេះ ជួយបង្កើនចំនួនលក់សរុបរបស់ Huawei បានច្រើនសន្ធឹកពីមួយឆ្នាំទៅមួយឆ្នាំ។ ជាក់ស្ដែងនៅឆ្នាំ ២០១៣ ក្រុមហ៊ុន Huawei លក់ស្មាតហ្វូនបានសរុបមិនដល់ ៥០ លានគ្រឿងនោះទេ ប៉ុន្តែចូលដល់ឆ្នាំ ២០១៧ ចំនួនលក់សរុបបានកើនដល់ ១៤០ លានគ្រឿង។ នៅឆ្នាំ ២០១៨ ក្រុមហ៊ុននេះមានគោលដៅថានឹងលក់ស្មាតហ្វូនឲ្យបាន ២០០ លានគ្រឿង។

២. ជាអ្នកដើរតាមនិន្នាការផង និងជាអ្នកបង្កើតនិន្នាការផង

មើលលើស្មាតហ្វូនជំនាន់ថ្មីរបស់ Huawei គឺម៉ូដែល P20 Pro ជាស្មាតហ្វូនមានបំពាក់កាមេរ៉ា ៣ គ្រាប់ដំបូងគេនៅក្នុងលោក ជាសញ្ញាបង្ហាញពីការបង្កើតនិន្នាការថ្មី។ មួយវិញទៀតស្មាតហ្វូននេះក៏មានរចនាបថអេក្រង់ឆកដូចជាស្មាតហ្វូនដទៃទៀត ដោយនេះជាការដើរតាមនិន្នាការ។

៣. ផលិតបន្ទះឈីបដោយខ្លួនឯង និងមានដៃគូខ្លាំង

Apple ជាអ្នកឌីហ្សាញបន្ទះឈីប ប៉ុន្តែឲ្យក្រុមហ៊ុនដទៃជាអ្នកផលិតឲ្យ។ ចំណែក Huawei វិញជាអ្នកឌីហ្សាញ ហើយអាចផលិតបន្ទះឈីបបានដោយខ្លួនឯងទៀតផង។ ស្មាតហ្វូនរបស់ Huawei ប្រើប្រាស់បន្ទះឈីប Kirin SoC ដោយផ្ដាច់មុខ ខុសពី Samsung ដែលនៅពឹងផ្អែកខ្លះៗលើបន្ទះឈីប Snapdragon របស់ Qualcomm ត្បិតថាខ្លួនអាចផលិតបន្ទះឈីបបានដោយខ្លួនឯងហើយនោះ។

Huawei ក៏បានចាប់ដៃគូជាមួយក្រុមហ៊ុនផលិតកាមេរ៉ាដ៏ល្បី Leica ដែលជួយឲ្យកាមេរ៉ា P20/P20 Pro, Mate 10 និង P10 ជាដើមនោះ លេចធ្លោក្នុងចំណោមគូប្រជែង៕

ប្រភព៖ PhoneArena ប្រែសម្រួល៖ សុខហេង