ដំណឹងល្អ! បាត់មុខច្រើនឆ្នាំជើងទឹក គ្រោងបង្កើតក្លឹបឡើងវិញតាមរយៈយុវជនថ្នាលរបស់ខ្លួន

2018-08-21 02:41:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់ជើងទឹកគ្រោងធ្វើតេស្តកីឡាករនៅឆ្នាំ២០១៩ ដើម្បីត្រៀមចូលលេងលីគទី២ របស់កម្ពុជាឡើងវិញ ក្រោយបាត់មុខពីលីគកំពូលច្រើនឆ្នាំ។

ចាយ សង្ហា

ថ្លែងក្នុងឱកាសដឹកនាំយុវជន U14 ជើងទឹកចូលរួមលេងពាន U14 GFA Soriya International Tournament 2018 លោក ចាយ សង្ហា ដែលមានតួនាទីជាគ្រូបង្វឹករៀបរាប់យ៉ាងដូច្នេះថា «ក្លឹបរបស់យើងខ្ញុំបច្ចុប្បន្នមានថ្នាលយុវជនចំនួន ២ក្រុមគឺ U14 និង U17 ។ សម្រាប់ក្រុមធំ បើតាមសម្ដីមេខ្ញុំទទួលបានគឺ យើងនឹងចាប់ផ្ដើមធ្វើតេស្តជ្រើសរើសកីឡាករ ដើម្បីត្រៀមចូលលេងក្របខណ្ឌ ក១ និងក២ ឡើងវិញនៅឆ្នាំក្រោយ»។

លោកបន្ថែមថា ក្លឹបបាល់ទាត់ជើងទឹកបានបង្កើតក្រុមយុវជនថ្នាលជាច្រើនឆ្នាំមកហើយ។ មិនត្រឹមតែប៉ុណ្ណោះក៏មានយុវជនរបស់ក្លឹបនេះចំនួន ៤ទៅ៥រូបបានជាប់ក្នុងបញ្ជីឈ្មោះជាកីឡាករថ្នាលរបស់ជម្រើសជាតិ ដែលកំពុងហ្វឹកហាត់នៅបាទីទៀតផង។

ជើងទឹកបានបាត់មុខពីលីគកំពូលកម្ពុជាអំឡុងឆ្នាំ២០១៣ ក្រោយពេលបញ្ចប់ការប្រកួតលីគកំពូលកម្ពុជា ឆ្នាំ២០១២ នៅបាតតារាង៕