៧ចំណុចនេះ នៃជំងឺបាក់ទឹកចិត្ត បើមានចំណុចណា គួរទៅជួបពេទ្យជំនាញ!

2018-08-24 04:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជីវភាពប្រចាំថ្ងៃ និងភាពរវល់នឹងការបំពេញការងារផង មនុស្សអាចងាយប្រឈមនឹងជំងឺ បាក់ទឹកចិត្ត ដោយមិនដឹងខ្លួន។ គ្រប់គ្នាប្រហែលជាមិនសូវចាប់អារម្មណ៍ ហើយខ្លះគិតច្រឡំថា ការបាក់ទឹកចិត្ត គឺជាអារម្មណ៍ពិបាកចិត្តនេះឯង មិនបាច់ព្យាបាលក៏អាចជាវិញបាន ដោយគ្រាន់តែសប្បាយចិត្តឲ្យច្រើនៗ ទៅជាការស្រេច។

ចំណុចនេះ បើតាមអ្នកជំនាញសុខភាពបានបញ្ជាក់ថា ការបាក់ទឹកចិត្ត គឺមានរឿងច្រើន លើសពីអ្វីដែលយើងដឹង វាដូចជាឃាតកលាក់មុខ តាមធ្វើទុក រុកកួន និងឈានទៅបង្កទៅជារោគសញ្ញាគួរឲ្យខ្លាចជាច្រើន ប្លែកៗគ្នា ពីមនុស្សម្នាក់ទៅម្នាក់ទៀតបាន។

អ្នកជំនាញសុខភាពផ្លូវចិត្ត បញ្ជាក់ថា ការបាក់ទឹកចិត្ត គឺជាជំងឺ ដែលរំខានដល់អ្នក ឬរំខានដល់មនុស្សដែលយើងស្រឡាញ់។ វិធីល្អបំផុត គួរតែស្វែងរកការព្យាបាល មុនពេលវាវិវត្តន៍ដល់ដំណាក់កាល ជំងឺផ្លូវចិត្តដ៏ធ្ងន់ធ្ងរបំផុត តាមរយៈរោគសញ្ញា ៧ចំណុច ដូចខាងក្រោមនេះ។

១. ឆេវឆាវ

អារម្មណ៍ឆេវឆាវច្រើន គឺជាអាចរឿងធម្មតា ជាពិសេស នៅពេលដែលអ្នកគេងមិនគ្រប់គ្រាន់ ឬស្រ្តេសដោយសាររឿងការងារ ឬបញ្ហាផ្សេងទៀត។ អ្នកជំនាញនិយាយថា វាគឺជារឿងដែលកើតឡើងលើមនុស្សដែលបាក់ទឹកចិត្ត ជាពិសេសគឺប្រុសៗតែម្ដង។

២. ខឹងច្រើន

អ្នកជំនាញបញ្ជាក់ថា មនុស្សម្នាក់ដែលកើតបញ្ហាបាក់ទឹកចិត្ត ក៏ប្រហែលជាមានអារម្មណ៍ខឹងច្រើន ឬហៅថា រញ៉ាំរញ៉ូវច្រើន គ្រប់ពេល រហូតខឹងសូម្បីតែខ្លួនឯង នៅពេលដែលធ្វើអ្វី១ មិនដូចចិត្ត។ អ្នកបាក់ទឹកចិត្តមួយចំនួនក៏អាចនឹងបង្ហាញការខឹងរបស់ខ្លួន ខណៈដែលអ្នកដទៃមិនសូវប្រើទំនាក់ទំនងស្មោះត្រង់ ឬហិង្សាគ្រប់ទម្រង់ មិនថាការលេងសើច ឬមែនទែនក៏ដោយ។

៣. គេងមិនលក់

អ្នកប្រហែលជាពិបាកគេងឲ្យឆាប់លក់រាល់ពេល។ លើសពីនេះ អ្នកអាចនឹងភ្ញាក់ច្រើនដងនៅពេលយប់ និងឆាប់ភ្ញាក់ពីគេងជាងធម្មតា។ ទាំងនេះ សុទ្ធតែជាសញ្ញាបញ្ជាក់ អំពីការគេងមិនលក់ ហើយវាក៏ជារឿងដែលអាចប៉ះពាល់ ដល់អ្នកដែលកើតជំងឺបាក់ទឹកចិត្តដែរ។ បញ្ហាគេងមិនលក់អាចប៉ះពាល់ធ្ងន់ធ្ងរនៅពេលមានរោគសញ្ញាផ្សេងទៀត នៃការបាក់ទឹកចិត្ត។

៣. គេងច្រើនពេក

តិចច្រឡំថា ការញៀនគេងច្រើនពេក គឺមកពីយើងហត់ ឬអស់កម្លាំងល្ហិតល្ហៃ ពីការងារ។ មានន័យថា អ្នកអាចសង្កេតខ្លួនឯងសាកមើល ពេលយើងមិនសូវហត់ រវល់វិញ បើយើងនៅតែមានទម្លាប់យកគ្រែដេកជាកន្លែងសុខសាន្ត ចង់តែដេកហើយនោះ សូមប្រយ័ត្ន។

វាជាជំងឺបាក់ទឹកចិត្ត ដែលធ្វើឲ្យយើង ចង់តែដេក មិនអាចឈានជើងចេញ ឬជួបអ្នកណា ដើម្បីធ្វើការងារគ្រប់យ៉ាង គឺចង់តែបិទភ្នែកសម្រាកលើពូកទន់ៗ ខ្ជិលរវល់នឹងអ្វីគ្រប់យ៉ាង។ បើមានចំណុចនេះ អ្នកប្រហែលជាកំពុងតែមានជំងឺបាក់ទឹកចិត្តហើយ ជាពិសេសគឺអ្នក តែងមានអារម្មណ៍នេះ ហើយចង់គេងភ្លាមៗ ក្រោយពីធ្វើអ្វីមួយរួច ឬពេលទើបមកដល់ផ្ទះ។

៤. ភ្លេចភ្លាំង

រឿងនេះ ពេលខ្លះអ្នកហាក់ខឹងនឹងខ្លួនឯងក៏មាន។ នៅពេលអ្នកបាក់ទឹកចិត្ត វាគឺជារឿងមួយដែលអាចទៅរួចបំផុតដែលបញ្ជាក់ថា ការចងចាំរបស់អ្នកមានការចុះខ្សោយខ្លាំង។ អ្នកប្រហែលជាមិនអាចចងចាំនូវឈ្មោះ អ្នកដែលតែងជួបមុខរាល់ថ្ងៃ ឬរបស់ដែលសំខាន់ៗ។ អ្នកប្រហែលជាមិនអាចចងចាំថ្ងៃខែ និងពេលវេលាសំខាន់ៗ ជាមួយមនុស្សជាទីស្រលាញ់ក៏មាន។

៥. ពិបាកផ្ចង់អារម្មណ៍

ឧទាហរណ៍ថា មានមនុស្សណាម្នាក់ដែលនៅចំពោះមុខអ្នក ហើយគេកំពុងតែប្រាប់រឿងដែលភ្ញាក់ផ្អើល ឬសុំជំនួយបន្ទាន់អ្វីមួយពីអ្នក។ ពេលនោះ វាដូចជាពិបាកបំផុត ព្រោះថា ចិត្តអ្នក មិនអាចផ្ចង់អារម្មណ៍លើរឿងនោះហើយ មិនដឹងជាមានអ្វីខ្លះ មកច្របូកច្របល់គ្នា។ មិនមែនមានន័យថាអ្នកមិនអាចធ្វើបានទេ វាគ្រាន់តែទាក់ទងនឹងចិត្តអ្នក ដែលហាក់ប្រទូស្តប្រទាំង នៅក្នុងខួរក្បាល។

បន្ទាប់មកហាក់ដូចជាមាន អ្នកណាមកបន្លឺសំឡេងដ៏គួរឲ្យស្អប់ ប្រាប់អ្នកថា កុំធ្វើអី អ្នកទៅមិនរួច ឬអ្នកមិនអាចធ្វើវាបានទេ និយាយរួមគឺបង្អាក់តែម្ដង។ វាមិនសូវខុសគ្នានឹងការភ្លេចភ្លាំងទេ ហើយវាក៏អាចជាសញ្ញាមិនសូវដឹងមួយទៀត នៃការបាក់ទឹកចិត្ត ដែលរំខានដល់ជីវិតរស់នៅរាល់ថ្ងៃបាន។

៦. ញ៉ាំគ្រឿងស្រវឹង

អ្នកខ្លះ ក្រោយដឹងថាខ្លួន មានជំងឺបាក់ទឹកចិត្ត បែរជាជ្រើសរើសការដោះស្រាយជាមួយតាមរយៈការញ៉ាំគ្រឿងស្រវឹងក្នុងកម្រិតច្រើន។ ចំណុចនេះ អាចជារឿងមិនល្អដែលអាចធ្វើឲ្យមានអំពើហិង្សាបាន។

គ្រឿងស្រវឹងពិតជាអ្វីដែលធ្វើឲ្យអ្នកបាក់ទឹកចិត្តញ៉ាំច្រើនៗ ហើយយូរទៅក៏ក្លាយជាទម្លាប់ បន្ទាប់មកក៏ចូលចិត្តដែរ រហូតគេចវេស មិនទៅព្យាបាលជាមួយអ្នកជំនាញផ្លូវចិត្ត ដោយយល់ថា គ្រាន់តែដាក់គ្រឿងស្រវឹងចូលហើយ ដូចជាធូរស្រាលភ្លាម។

៧. ឈឺចាប់រ៉ាំរ៉ៃ

គ្រូពេទ្យនិយាយថា វាមានទំនាក់ទំនង ដ៏ខ្លាំងក្លាមួយរវាងការបាក់ទឹកចិត្ត និងការឈឺចាប់ផ្នែកខ្លះ នៃរាងកាយដោយមិនដឹងមូលហេតុ។ ក្នុងករណីខ្លះ ការបាក់ទឹកចិត្តអាចបង្កជាការឈឺចាប់ពីតិចតួច ទៅជាការឈឺចាប់ខ្លាំង។ ហើយករណីខ្លះទៀត ការឈឺចាប់ដែលមានរួចហើយ អាចធ្វើឲ្យបាក់ទឹកចិត្ត កាន់តែខ្លាំងបន្ថែមទៀត។ អ្នកខ្លះទៀត ការឈឺចាប់កាន់តែធ្ងន់ធ្ងរក៏មាន៕

ប្រភព៖ Health.com.kh ប្រែសម្រួល៖ ពៅ រក្សា