អ្នកចាំទី Lloris ជាប់ឃុំរាប់ម៉ោង ក្រោយរកឃើញថាស្រវឹងពេលបើកបរ
- 2018-08-24 13:50:00
- ចំនួនមតិ 0 | ចំនួនចែករំលែក 0
អ្នកចាំទី Lloris ជាប់ឃុំរាប់ម៉ោង ក្រោយរកឃើញថាស្រវឹងពេលបើកបរ
ចន្លោះមិនឃើញ
នៅវេលាម៉ោង ២:២០ ទៀបភ្លឺថ្ងៃនេះ (ម៉ោង ៨:២០ ព្រឹកនៅកម្ពុជា) អ្នកចាំទី Hugo Lloris ត្រូវបានចាប់ខ្លួន ក្រោយត្រូវបានប៉ូលិសអង់គ្លេសរកឃើញថា បានបើកបរក្នុងស្ថានភាពស្រវឹង។
ការចាប់ខ្លួន ធ្វើឡើងក្រោយកីឡាករ ត្រូវបានរកឃើញថា មានបរិមាណជាតិអាល់កុលលើសកំណត់ក្នុងឈាម ក្រោយធ្វើតេស្ដខ្យល់ដង្ហើម នៅជិតផ្លូវ Baker Street កណ្ដាលទីក្រុងឡុងដុង។
The Sun បានរាយការណ៍ថា Lloris បានជាប់ឃុំខ្លួន និងទទួលការសួរចម្លើយអស់រយៈពេល ៧ ម៉ោង មុនត្រូវបានដោះលែងជាបណ្ដោះអាសន្ន។ អ្នកចាំទីរងការចោទប្រកាន់ថា បានបើកបរក្នុងស្ថានភាពស្រវឹង។
កីឡាករបារាំងនឹងឡើងតុលាការ Westminster Magistrates' Court នៅថ្ងៃទី ១១ កញ្ញា ខាងមុខ។
Lloris គឺជាកីឡាករបង្គោលមួយរូបរបស់ Tottenham Hotspur។ តាំងពីចូលរួមជាមួយក្លឹបកាលពីឆ្នាំ ២០១២ មក អ្នកចាំទីលេងសរុបបាន ២៥៤ ប្រកួត។ កីឡាករក៏មានតួនាទីសំខាន់ក្នុងក្រុមជម្រើសជាតិបារាំង។ គិតមកទល់ពេលនេះ Lloris លេងបាន ១០៤ ប្រកួតឲ្យក្រុមជម្រើសជាតិ ហើយទើបតែឈ្នះ World Cup កាលពីខែកក្កដាកន្លងទៅនេះ៕