Pep បានរិះគន់ Sane តិចតួចកាលបើករដូវកាល ពេលនេះគ្មានបញ្ហាទេ

2018-08-25 04:24:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការរបស់ Manchester City លោក Pep Guardiola អះអាងថា ខ្លួនមិនដែលមានបញ្ហាអ្វីជាមួយកីឡាករឆ្នើមសញ្ជាតិអាល្លឺម៉ង់ Leroy Sane នោះទេ បើទោះឃើញកីឡាកររូបនេះស្ថិតនៅជាកីឡាករបម្រុងក្នុងការប្រកួតបើករដូវកាលពីរប្រកួតកន្លងមកក្ដី។

លោក Pep Guardiola

Sane បានជាប់ឈ្មោះជាកីឡាករវ័យក្មេងល្អបំផុតប្រចាំឆ្នាំនៅ English Premier League រដូវកាល ២០១៧-២០១៨ ដោយរកបាន ១០ គ្រាប់ និងបញ្ជូនបាល់ឲ្យមិត្តរួមក្រុមស៊ុតបាន ១៥ លើក ហើយជួយ Man City ឈ្នះ EPL រដូវកាលមុន។ ប៉ុន្តែកីឡាកររូបនេះមិនបានជាប់ឈ្មោះទៅលេងនៅ World Cup 2018 នៅរុស្ស៊ីឡើយ ព្រោះមិនស្ថិតក្នុងជម្រើសរបស់លោក Joachim Low អ្នកចាត់ការជម្រើសជាតិអាល្លឺម៉ង់។

ភាពជោគជ័យរបស់កីឡាករវ័យ ២២ ឆ្នាំរូបនេះ នៅរដូវកាលមុន ត្រូវបានគេរំពឹងខ្ពស់ក្នុងការបង្ហាញខ្លួនក្នុងក្រុមបន្តទៀត បើសិនប្រៀបធៀបសមត្ថភាពរបស់គេជាមួយកីឡាករផ្សេងៗក្នុងក្រុម។ ប៉ុន្តែ Guardiola បានរិះគន់ចំពោះចំណុចខ្វះខាត អំពីការប្រឹងប្រែងការពារបាល់របស់ Sane កាលលេងពានបើករដូវកាល Community Shield ជាមួយ Chelsea ។ ទោះជាយ៉ាងណាក៏ដោយអ្នកចាត់ការសញ្ជាតិអេស្ប៉ាញបាននិយាយថា ខ្លួនមិនមានបញ្ហាអ្វីទេ ជាមួយកីឡាករសញ្ជាតិអាល្លឺម៉ង់ខាងលើ ហើយពេលនេះ Sane កំពុងមានអារម្មណ៍ថា ទម្រង់លេងរបស់គេកំពុងវិលមករកភាពល្អដូចមុនវិញហើយ៕