Mourinho ឆេះដុំដើរចេញពីសន្និសីទកាសែត ក្រោយអ្នកកាសែតសួរធ្ងន់ៗ

2018-08-28 02:21:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Jose Mourinho ហាក់មិនសប្បាយចិត្តជាមួយក្រុមសារព័ត៌មានក្រោយពីមានការចោទសួរខ្លាំងៗ ពេលក្រុមរបស់លោកចាញ់ Spurs ចាស់ដៃក្នុងលទ្ធផល៣ទល់នឹង០។

លទ្ធផលនេះគឺជាការបរាជ័យធ្ងន់ធ្ងរបំផុតរបស់ Mourinho ក្នុងផ្ទះគិតគ្រប់កម្មវិធីប្រកួត។ សម្រាប់ជ័យជម្នះរបស់ Spurs ត្រូវអរគុណគ្រាប់បាល់របស់ Harry Kane និង Lucas Moura ធ្វើបាន២គ្រាប់ម្នាក់ឯង។ នេះជាការចាប់ផ្ដើមរដូវកាលយ៉ាងលំបាករបស់ Man Utd ដោយ៣ប្រកួតក្នុងលីគកន្លងទៅចាញ់២ប្រកួតទៅហើយ។

ចប់ការប្រកួតខាងលើ ក្នុងសន្និសីទកាសែត ក្រុមអ្នកកាសែតបានលើកពីចំណុចអ្នកគាំទ្រមួយចំនួនបានដើរចេញពី Old Trafford នៅដើមវគ្គទីពីរ។ ភ្លាមនោះ Mourinho បានតបទាំងក្ដៅស្លឹកត្រចៀកថា៖ ពួកយើងចាញ់ Sevilla ក្នុង UCL កាលពីរដូវកាលមុននៅទីនេះ ហើយពួកយើងត្រូវអ្នកគាំទ្រស្រែកឲ្យ ព្រោះពូកយើងសមនឹងទទួលបែបនេះ។ ថ្ងៃនេះកីឡាករដើរចេញពីទីលាន បន្ទាប់ពីចាញ់ក្នុងផ្ទះ ហើយត្រូវអ្នកគាំទ្រស្រែកឲ្យជាថ្មី ព្រោះពួកយើងសមទទួលបែបនេះ។ ដូច្នេះត្រូវបន្តព្យាយាម ព្យាយាម ព្យាយាម"។

អ្នកចាត់ការវ័យ៥៥ឆ្នាំបន្តថា៖ "តើអ្នកដឹកថាលទ្ធផលអ្វីទេ? ៣-០ តើអ្នកដឹងថាវាមានន័យដូចម្ដេចទេ? មានន័យថា Premier League ៣ដង។ ខ្ញុំធ្លាប់ឈ្នះពាន Premier League ច្រើនជាងអ្នកចាត់ការទាំង១៩នៅ Premier League នាពេលបច្ចុប្បន្នបូកចូលគ្នា។ ៣សម្រាប់ខ្ញុំ ២សម្រាប់ពួកគេ។ Respect, Respect, respect”។ និយាយរួច Mourinho បានដើរចេញពីសន្និសីទកាសែតតែម្ដង។

ពាក្យខាងលើ Mourinho ចង់មានន័យថា លោកធ្លាប់ឈ្នះពាន Premier League ៣ដង ពេលនៅដឹកនាំ Chelsea។ សម្រាប់អ្នកចាត់ការនៅ Premier League បច្ចុប្បន្នទាំង១៩នាក់មានតែ Pep Guardiola និង Manuel Pellegrini ប៉ុណ្ណោះធ្លាប់ឈ្នះពានលីគកំពូលរបស់អង់គ្លេសមួយនេះ៕