ចរិតស្ងៀមស្ងាត់ ចូលចិត្តច្រៀង និងសម្ដែងបទកម្សត់ៗ ជីវិតពិត ស៊ឹម សុវណ្ណារ៉ុង ក៏កម្សត់ និងតស៊ូខ្លាំងណាស់ដែរ

2018-08-28 04:01:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ចរិត ឬកពារស្ងៀមស្ងាត់ ចូលចិត្តច្រៀង និងសម្ដែងបទកម្សត់ៗ ជីវិតពិតតារាចម្រៀង ស៊ឹម សុវណ្ណារ៉ុង ដែលប្រិយមិត្តផ្ដើមស្គាល់ច្រើនតាមរយៈបទ "កុំទ្រាំស្នេហ៍អ្នកក្រដូចបង" នោះ ក៏មានប្រវត្តិតស៊ូខ្លាំងណាស់ដែរ ដោយធ្លាប់រត់ទៅថៃធ្វើជាកម្មករថែដើមតាង៉ែន កាប់អំពៅ បណ្ដុះកូនកៅស៊ូឲ្យគេទៀតផង។

តាមសាវតា លោក ស៊ឹម សុវណ្ណារ៉ុង គឺជាកូនកសិករ មានស្រុកកំណើតនៅភូមិស្វាយវែង ភូមិកំរៀង ស្រុកកំរៀង ខេត្តបាត់ដំបង និងមានបងប្អូនចំនួន ៥នាក់ លោកជាកូនពៅ។ ដោយសារជីវភាពគ្រួសារមានការលំបាក លោកប្រាប់ថា លោកធ្លាប់បែកពីគ្រួសារ ទៅស៊ីឈ្នួលធ្វើពលករនៅប្រទេសថៃ អំឡុងឆ្នាំ ២០១២ និងពេលបន្តបន្ទាប់ទៀត។

នៅពេលនោះ លោកទទួលការងារជាច្រើនមានដូចជា កាប់ព្រៃ កាប់អំពៅ ថែផ្លែ និងដើមតាងែន និងបណ្ដុះកូនកៅស៊ូ ជាដើម។ ចំពោះថ្លៃឈ្នួលពលកម្ម គឺមួយថ្ងៃបាន ២០០បាត ស្មើនឹង៦ដុល្លារអាមេរិក។ យ៉ាងណាក៏ដោយ កម្រៃប៉ុណ្ណេះ ក៏នៅតែមិនអាចជួយក្រុមគ្រួសារបានដុំកំភួនឡើយ។ ដូច្នេះហើយ ណារ៉ុង ប្រាប់ថា លោកត្រូវបង្ខំចិត្តឈប់រៀន ពេលចប់ថ្នាក់ទី១១ ចូលទី១២ ហើយបែកពីគ្រួសារជាថ្មីមកកាន់ខេត្តព្រៃវែងម្ដង ដោយបានមកស្នាក់នៅជាថៅកែវង្សភ្លេងមួយ។

"ដោយសារខ្ញុំស្គាល់ថៅកែវង្សភ្លេងម្នាក់ ខ្ញុំក៏មកស្នាក់នៅធ្វើជាអ្នកចម្រៀងក្នុងវង្សអកកេះគាត់។ ពេលរដូវប្រាំងខ្ញុំច្រៀងនៅខេត្តព្រៃវែង លុះដល់រដូវវស្សាមិនសូវមានការងារច្រៀង ខ្ញុំក៏ត្រឡប់ទៅផ្ទះវិញ ជួយធ្វើការងារស្រែចំការអីចឹងណាបង! ក្រៅពីនេះ នៅឆ្លៀតចូលទៅថៃធ្វើការងារដូចប្រាប់ខាងលើ ខ្លះៗបន្ថែមទៀត...និយាយទៅតស៊ូណាស់បង!”។

ក្រោយពីតស៊ូធ្វើជាអ្នកចម្រៀងតាមអកកេះ បានប្រមាណជាង ជាង១ ឆ្នាំនៅលើទឹកដីភាគខាងកើតប្រទេស នៅឆ្នាំ ២០១៤ លោកក៏បានចូលរួមកម្មវិធីប្រឡងចម្រៀងរៀបចំដោយក្រុមហ៊ុនភេសជ្ជៈកូកា ហើយទទួលបានចំណាត់ថ្នាក់លេខ១ប្រចាំខេត្តព្រៃវែងនាពេលនោះ។ "ក្រោយពីជាប់លេខ១មក ខ្ញុំក៏ចាប់ផ្ដើមមានអ្នកស្គាល់បណ្ដើរៗ ប៉ុន្តែច្រើនទេ រហូតដល់ខ្ញុំបានបញ្ចេញបទផ្ទាល់ខ្លួនរបស់ខ្ញុំ"។

ស៊ឹម សុវណ្ណារ៉ុង ចេញបទចម្រៀង Original Song ផ្ទាល់ខ្លួននៅឆ្នាំ ២០១៧ "កុំទ្រាំស្នេហ៍អ្នកក្រដូចបង" ដែលនិពន្ធដោយលោកផ្ទាល់ និងធ្វើបទភ្លេងថ្មីដោយឌីជេ ខាណា ជាពលករនៅថៃដូចគ្នា សម្រួលតន្ត្រីដោយលោក អ៊ិច សំណាង ទើបអ្វីៗបានផ្លាស់ប្ដូរ ដោយមានអ្នកស្គាល់ច្រើនដូចសព្វថ្ងៃ។

មកដល់សព្វថ្ងៃ ស៊ឹម សុវណ្ណារ៉ុង បានក្លាយជាតារាចម្រៀងក្នុងចិត្តយុវវ័យមួយរូប ក្រោយល្បីខ្ទរខ្ទារតាមរយៈបទចម្រៀងខាងលើ។ មកដល់បច្ចុប្បន្ន លោកបានបញ្ចេញបទចម្រៀងថ្មីជាច្រើនរួចមកហើយ មានដូចជាបទ "អូនលេងសើច តែបងឈឺចាប់" "ប្រពន្ធក្មេង" និងបទ "ស្ទាវក្រដូចបង" ជាដើម។ តារាចម្រៀងវ័យ ២៣ ឆ្នាំបញ្ជាក់ថា លោកត្រៀមបញ្ចេញវីដេអូចម្រៀងថ្មីទៀតរបស់ខ្លួន ក្នុងពេលឆាប់ៗនេះ៕