តាមពិតមានតារាច្រើនជាងដែលប្រិយមិត្តដឹង បាន និងកំពុងវក់វីរកស៊ីពុះដីឡូតិ៍លក់

2018-08-29 04:07:09
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមចុងខែសីហា ២០១៨ នេះ មានសិល្បករ សិល្បការិនីខ្មែរជិត១០នាក់ ដែលបានហក់ចូលជំនួញពុះដីឡូតិ៍លក់ ច្រើនជាងអ្វីដែលប្រិយមិត្តដឹងពីវត្តមាន ព្រាប សុវត្ថិ សិរីមន្ត និង អ៊ីណូ។ តារាទាំងនោះមាននរណាខ្លះទៀត?

១.ពិធីការិនីទូរទស្សន៍លោក រ៉ាស៊ី៖ ប្រិយមិត្តប្រហែលជាចាប់អារម្មណ៍តែចំពោះវត្តមានរបស់ ព្រាប សុវត្ថិ សិរីមន្ត និងអ៊ីណូ ប៉ុន្តែប្អូនប្រុសតារាកំប្លែង អៀង ចេនឡា ក៏ទើបនឹងហក់ចូលក្នុងវិស័យរៀលអ៊ីសស្ទេតនេះដែរ។ ខុសពីតារាចម្រៀងទាំង៣ខាងលើដែលវិនិយោគនៅតំបន់ជុំវិញរាជធានី លោក រ៉ាស៊ី បានហក់ទៅវិនិយោគនៅខេត្តបាត់ដំបងវិញ។ ក្នុងពិធីបើកសម្ពោធមិនជាគគ្រឹកគគ្រេង រ៉ាស៊ី ប្រាប់ថា "នេះជាមុខរបរថ្មីរបស់ខ្ញុំបន្ថែម សង្ឃឹមថានឹងទទួលបានជោគជ័យ។

២.លី ច័ន្ទសីហា៖ គ្មាននរណាចាប់អារម្មណ៍ឡើយថា តារាវ័យក្មេងរូបនេះ ក៏ហក់ចូលក្នុងជំនួញដីឡូតិ៍ដែរ។ ប៉ុន្តែអតីតតារាទឹកភ្នែកក្នុងរឿង "កត្តញ្ញូ" បានធ្វើឲ្យគ្រប់គ្នាភ្ញាក់ក្រញ៉ាង បន្ទាប់ពីនាងបានប្រកាសពីការវិនិយោគដល់ទៅជាង៥០ម៉ឺនដុល្លារឯណោះលើដីរបស់នាងនៅស្រុកអង្គស្នួលខេត្តកណ្ដាល។ សីហា ប្រាប់ថា នោះជាការវិនិយោគរួមរវាងនាង និងសាច់ញាតិម្នាក់ ក្នុងនោះប្រសិនបើគម្រោងទី១ជោគជ័យ នាងគ្រោងគម្រោងទី២ទៀត ដែលនៅមិនឆ្ងាយពីគ្នា។

៣.យុត្ថារ៉ា ឆានី៖ តាមព័ត៌មាន អតីតស្វាមី ចន ច័ន្ទលក្ខិណា បានសម្ងំរកស៊ីដីឡូតិ៍នេះច្រើនឆ្នាំមកហើយ។ តាមព័ត៌មានលើបណ្ដាញសង្គមផ្ទាល់ខ្លួន លោក ឆានី បានឲ្យប្រិយមិត្តដឹងថា លោកគឺជាម្ចាស់គម្រោងអភិវឌ្ឍន៍ដីឡូតិ៍លំនៅដ្ឋាន CTLV Real Estate។

៤.រ៉ានូ៖ ស្រីស្អាត រ៉ានូ គឺជាតារាម៉ូដែលមួយរូប ប៉ុន្តែនាងបានផ្អាកការងារសិល្បៈទៅហើយ ដោយសារនាង ក៏ជាពណិជ្ជករដីឡូតិ៍សំខាន់មួយរូបដែរ។ តាមព័ត៌មាន តារាស្រីរូបនេះ មានដីឡូតិ៍ពុះលក់ជាច្រើនកន្លែង ប៉ុន្តែថា នោះមិនមែនជាសម្បត្តិផ្ទាល់ខ្លួនរបស់នាងនោះទេ តែជាសម្បត្តិរបស់ម្ដាយនាង ហើយនាង ទទួលមើលការខុសត្រូវ ក៏ដូចជាគ្រប់គ្រងប៉ុណ្ណោះ។

៥. ព្រាប សុវត្ថិ សិរីមន្ត អ៊ីណូ៖ ប្រិយមិត្តដឹងរួចហើយ ពីតារាចម្រៀងប្រុសទាំង៣ ដែលបច្ចុប្បន្នកំពុងមានសកម្មភាពខ្លាំងជាងគេក្នុងជំនួញពុះដីឡូលក់នេះ។ ចំណុចគួរចាប់អារម្មណ៍ គម្រោងរបស់ពួកគេសុទ្ធតែធំៗ ក្នុងនោះតារាហង្សមាស សុវត្តិ និងសិរីមន្ត កាន់ទុនវិនិយោគ ៥លាន និង១០លានដុល្លាររៀងខ្លួន។

ឯអ៊ីណូ មិនទាន់មានការបើកកកាយពីករណីនេះនៅឡើយ ខណៈលោកបានអះអាងនៅលើបណ្ដាញសង្គមរបស់លោកថា លោកនឹងបើកសន្និសីទសារព័ត៌មាននៅសប្ដាហ៍ក្រោយនេះ។ ដូច្នេះហើយ ទំហំប្រាក់ដែលតារាចម្រៀងបានបោះវិនិយោគលើជំនួញនេះ អាចជាចំណុចរសើបមួយសម្រាប់សារព័ត៌មាននាថ្ងៃសនិ្នសីទនោះ។

៦.នាយ កៃដ៖ ក្រៅសិល្បករខាងលើដែលកាន់គម្រោងធំៗរៀងខ្លួន នាយ កៃដ ស្វាមីរបស់តារាកំប្លែងនាង ខ្ញុង គឺនាយ កៃដ ក៏ជាបានរកស៊ីលក់ដីឡូតិ៍។ ប៉ុន្តែលោកមិនបានវិនិយោគខ្លួនឯងទេ គឺធ្វើជាអ្នកគួកជេ ឬឈ្មួញកណ្ដាល ក្នុងនោះលោកក៏ធ្លាប់ជាអ្នកលក់ឲ្យគម្រោងលោក ព្រាប សុវត្ថិផង៕

អត្ថបទ៖ ទារិកា