យុវវ័យមានទេពកោសល្យសិល្បៈប្រឈមនឹងការរើសអើង មុនទទួលបានជោគជ័យ
- 2018-08-29 08:26:29
- ចំនួនមតិ 0 | ចំនួនចែករំលែក 0
យុវវ័យមានទេពកោសល្យសិល្បៈប្រឈមនឹងការរើសអើង មុនទទួលបានជោគជ័យ
ចន្លោះមិនឃើញ
អ្នកនិពន្ធ អ្នកដឹកនាំរឿង ផលិតករវ័យក្មេងៗបានបាក់ទឹកចិត្តជាញឹកញាប់ដោយសារការរុករកកំហុសជាជាងស្វែងរកចំណុចខ្លាំង នេះបើតាមការលើកឡើងរបស់អ្នកស្រី ម៉ីសន សុធារី អ្នកនិពន្ធប្រលោមដ៏ចំណានម្នាក់។ អ្នកស្រី បន្តថា ជំងឺបាក់ទឹកចិត្តគឺមនុស្សក្នុងឧស្សាហកម្មមួយនេះជាអ្នកបង្កឡើងចំពោះគ្នាពុំមែនបណ្ដាលមកពីទស្សនិកជនឬមជ្ឈដ្ឋានណាផ្សេងទេ។
ការរឹតត្បិត រិះគន់ជាន់ពន្លិចគ្រប់រូបភាព បានកើតឡើងក្នុងវិស័យសិល្បៈ និងការបង្កើតថ្មីមួយចំនួនមិនត្រូវបានលើកស្ទួយ ថែមទាំងទទួលរងការបន្តុះបង្អាប់ រហូតបំបាក់ស្មារតី ធ្វើឱ្យខ្លាចរអា សូញសាញក្នុងការលើកយកទម្រង់សិល្បៈចាស់មកកែច្នៃ ឬ បង្កើតអ្វីថ្មី។ បរិបទបែបនេះហើយ ជាការរារាំងការអភិវឌ្ឍន៍វិស័យសិល្បៈមិនឱ្យបោះជំហានបានឆ្ងាយ នេះបើតាមការលើកឡើងរបស់ផលិតករភាពយន្តវ័យក្មេងម្នាក់ សុំមិនបញ្ចេញឈ្មោះ។ យុវជនម្នាក់នេះ បន្តថា ជាក់ស្ដែងរូបគេធ្លាប់បានបង្ហាញស្នាដៃ លើបណ្ដាញសង្គម តែស្នាដៃរបស់ខ្លួនទទួលរងការរិះគន់ និងការផ្ដល់មតិអវិជ្ជមានជាច្រើន ជាពិសេសពីសំណាក់អ្នកធ្វើការក្នុងវិស័យតែមួយ ដែលធ្វើឱ្យរូបគេបាក់ទឹកចិត្តលែងចង់នឹកថាធ្វើអ្វីបន្តទៀត។
លោកស្រី ម៉ីសន សុធារី បន្តថា យុវវ័យជំនាន់ក្រោយមួយចំនួនស្ថិតនៅក្នុងបរិបថមួយដែលគ្មានគ្នា គ្មានខ្សែ គ្មានបង្អែក ហើយបន្ថែមនៅពេលដែលបញ្ចេញស្នាដៃនិមួយៗទៅ នៅតែត្រូវបានគេរុករកកំហុសជាជាងស្វែងរកគំនិតថ្មីដ៏មានតម្លៃក្នុងស្នាដៃរបស់ពួកគេ ទើបបណ្ដាលឱ្យមានបាត់បង់ធនធានមនុស្សថ្មី។ អ្នកនិពន្ធរៀមច្បងរូបនេះ បន្តថា ៖ «សម្រាប់ខ្ញុំ ផលិតករវ័យក្មេង ជាក្តីសង្ឃឹមចុងក្រោយ ក្នុងវិស័យភាពយន្តខ្មែរ សូមបញ្ចប់វប្បធម៌ក្ដិចត្រួយហើយបោះដៃជួយពួកគេផង»។
គិតដល់ចំណុចចាប់ផ្ដើម ក្នុងវិស័យសិល្បៈ ពិសេសភាពយន្ត គឺការតែងនិពន្ធ កញ្ញា ម៉ៅ ចន្ទរស្មី គ្រាប់ពូជអ្នកនិពន្ធតែមួយគត់របស់អ្នកស្រី ម៉ៅ សំណាង ក៏ធ្លាប់ទទួលបានសម្ពាធខ្លះៗដែរក្នុងការផ្ដើមដំណើរជីវិតក្នុងវិស័យតែងនិពន្ធ ក៏ព្រោះតែការផ្ដល់តម្លៃទាបលើស្នាដៃថ្មីរបស់យុវវ័យជំនាន់ក្រោយ និងការបំបាក់ទឹកចិត្តការបង្តើតថ្មី បើទោះជាខ្លួនមានឈាមជ័រអ្នកនិពន្ធក្តី។ ក៏ប៉ុន្តែការផ្ដល់ឱកាសថ្មី និងការជួយជ្រោមជ្រែងពីរៀមច្បងក្នុងវិស័យតែងនិពន្ធជាមួយគ្នាបាននាំរូបនាងឱ្យមានឱកាសបង្ហាញស្នាដៃរបស់ខ្លួន។
ដូចគ្នានេះដែរ អ្នកនិពន្ធ សុខ ចាន់ផល ក៏បានផ្ដល់ជាមតិគាំទ្រកញ្ញា ម៉ៅ ចន្ទរស្មី ដែរថា រូកលោកក៏ទទួលបានភាពជោគជ័យនឹងឱកាសដោយសារការជ្រោមជ្រែងពីរៀមច្បងសាស្រ្តាចារ្យ អ្នកនិពន្ធជាន់ដើមដែរ ព្រោះលោកមើលឃើញការព្យាយាមពិតប្រាកដរបស់អ្នកជំនាន់ក្រោយ។ ដោយលោកបន្តថា អ្នកដែលរិះគន់ជាន់ពន្លិចច្បាស់ជាមាន តែអ្វីសំខាន់ត្រូវសួរខ្លួនឯងថាត្រូវទម្លាក់តម្លៃរបស់ខ្លួនតាមការវាយតម្លៃរបស់គេ ឬដឹងថាអ្វីជាចំណុចខ្សោយរបស់ខ្លួន ហើយខិតខំដើរទៅមុខ ឬនៅដេកននាល មិនសុខចិត្ត ឬប្រឹងតែបន្ទោសអ្នកដទៃដែលមករារាំងភាពជោគជ័យរបស់អ្នក៕