Sony ចេញលើកនេះខ្លាំងជាងរាល់ដង ប្រើអេក្រង់ OLED លើកដំបូងបំផុត

2018-08-31 02:52:50
ចំនួនមតិ 0 | ចំនួនចែករំលែក 0

ចន្លោះមិនឃើញ

Sony Xperia XZ3 បានបង្ហាញរូបរាងជាផ្លូវការកាលពីម្សិលមិញនេះ ក្នុងកម្មវិធីតាំងបង្ហាញផលិតផលបច្ចេកវិទ្យា IFA នៅប្រទេសអាល្លឺម៉ង់។

Xperia XZ3 ទទួលបានការឆ្លើយវិជ្ជមានជាច្រើនពីសំណាក់អ្នកគាំទ្រ ដោយសារមានកែប្រែនូវចំណុចមួយចំនួនពិសេសលើស Xperia XZ2។ តួយ៉ាង XZ3 គឺជាស្មាតហ្វូនដំបូងគេរបស់ Sony មានប្រើប្រាស់អេក្រង់ OLED មានរាងកោង ទំហំ ៦ អ៊ីញ កម្រិត QHD+ និងមានបច្ចេកវិទ្យា HDR ទៀតផង។

ផ្ទាំងអេក្រង់រាងកោងនេះក៏បាននាំយកមកនូវរចនាបថតួខ្លួនថ្មី កាន់តែមានភាពទាក់ទាញជាងមុន និងមិនមានប៉ោងផ្នែកកណ្ដាលខ្លាំងដូចជា XZ2 នោះឡើយ។ XZ3 មានវិមាត្រ ១៥៨ x ៧៣ x ៩,៩ ម.ម ជាមួយទម្ងន់ ១៩៣ ក្រាម និងមានសមត្ថភាពធន់នឹងទឹក IP65/68។ តួខ្លួននៃស្មាតហ្វូននេះមានស្រោបដោយកញ្ចក់ Gorilla Glass 5 ទាំងមុខទាំងក្រោយ ដោយផ្នែកកណ្ដាលធ្វើពីអាលុយមីញ៉ូម។

និយាយពីផ្នែកខាងក្នុងវិញ XZ3 មានខ្ចីផ្នែកជាច្រើនរបស់ XZ2 រួមមានបន្ទះឈីប Snapdragon 845, RAM ទំហំ ៤ GB, អង្គផ្ទុកទំហំ ៦៤ GB មានរន្ធសម្រាប់បន្ថែមទំហំ។

កាមេរ៉ាក្រោយមានទំហំ ១៩ MP ជាមួយ Aperture f/2.0 អាចថតវីដេអូល្បឿនយឺតបំផុត ៩៦០ ប្លង់/វិនាទី និងថតវីដេអូកម្រិត 4K HDR។ កាមេរ៉ាខាងមុខមានកម្រិត ១៣ MP ជាមួយ Aperture f/1.9 និងមានមុខងារ Autofocus។ XZ3 ក៏មានបំពាក់នូវមុខងារ Smart Capture ដោយគ្រាន់តែដកទូរសព្ទចេញពីហោប៉ៅនឹងដំណើរការកាមេរ៉ាភ្លាម។

មុខងារគួរចាប់អារម្មណ៍មួយលើ XZ3 គឺមុខងារ Side Sense ដែលដំណើរការស្រដៀងនឹង Edge Sense របស់ HTC ដែរ ពោលប៉ះលើតួខ្លួនដើម្បីបញ្ជាមុខងារនានា។ ស្មាតហ្វូននេះប្រើប្រព័ន្ធប្រតិបត្តិការ Android 9.0 Pie ចេញពីប្រអប់មកស្រាប់តែម្ដង។