ទីបំផុត! គម្រោង "ផ្លូវទៅស្រុកវគ្គ២" រកឃើញម្ចាស់ពានរង្វាន់មុខរបរលេចធ្លោទាំង៧ របស់កម្ពុជា

  • 2018-09-01 08:01:49
  • ចំនួនមតិ 0 | ចំនួនចែករំលែក 51

ចន្លោះមិនឃើញ

គម្រោង "ផ្លូវទៅស្រុកវគ្គ២" (RoadHome2) ដែលផ្ដោតលើប្រធានបទសហគ្រិនភាព និងមានឈ្មោះថា "របរគេរបរយើង" បានបញ្ចប់ទៅជាស្ថាពរ ដោយរកឃើញសហគ្រិនឆ្នើម និងមុខរបរលេចធ្លោទាំង ៧ ក្នុងចំណោម ៥០ នៅជុំវិញប្រទេសកម្ពុជា។

ការប្រកាសប្រគល់ពានរង្វាន់ជាផ្លូវការ បានធ្វើឡើង កាលពីព្រឹកថ្ងៃទី ០១ ខែ កញ្ញា ឆ្នាំ ២០១៨ ក្នុង "ពិព័រណ៍អាជីវកម្មខ្នាតតូច និងមធ្យម" លើកដំបូង នៅកោះពេជ្រ។ កម្មវិធីនេះ មានការអញ្ជើញចូលរួមជាសាក្សី និងអធិបតីភាពពីឯកឧត្ដម ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម និងតំណាងម្ចាស់ឧបត្ថម្ភធំមកពីក្រុមហ៊ុនប្រេងឥន្ធនៈ Totalតំណាងអ្នកសហការឧបត្ថម្ភពីក្រុមហ៊ុន ស្រាបៀរអង្គរ ក្រុមហ៊ុនរថយន្ត Toyota ក្រុមហ៊ុនលក់កាមេរ៉ា Canon និងធនាគារឯកទេស Wing។

ក្រោយដំណើរការអស់រយៈពេលជាង ៥ ខែ គម្រោង "ផ្លូវទៅស្រុកវគ្គ២" (RoadHome2) បានរកឃើញសហគ្រិនកម្ពុជា ដែលពុះពារបង្កើត ពង្រឹងមុខរបរក្នុងស្រុកដោយខ្លួនឯង និងសក្ដិសមក្នុងការទទួលពានរង្វាន់ចំនួន ៧ រូប ហើយ។ សហគ្រិនទាំងនោះ រួមមាន៖

១. អ្នកស្រី សូ សម្បត្តិ ម្ចាស់សិប្បកម្មកំប្លោកភ្នំក្រោម ខេត្តសៀមរាប

២. លោក ឈឹម ប៊ុនហេន មុខរបរអ្នកបើកទូកដឹកភ្ញៀវទេសចរ ខេត្តស្ទឹងត្រែង

៣. លោក គឹម ចាន់ សិប្បកម្មឆ្នាំងចាក់ ខេត្តកំពង់ចាម

៤. លោក ថៃ វ៉ាន់ថា អាជីវកម្មហាងថតរូប @homePhotography ភ្នំពេញ

៥. លោកស្រី លឹម លីម៉ា ម្ចាស់ក្រុមហ៊ុន LM Lima Angkor Food ខេត្តសៀមរាប

៦. លោក ចាន់ សេងគង់ សិប្បកម្មផលិតឥដ្ឋការ៉ូខ្មែរ ខេត្តសៀមរាប

៧. អ្នកស្រី ដាំ មុំសិប្បកម្មតម្បាញសូត្រ ខេត្តបន្ទាយមានជ័យ

លោក វ៉េង រចនា អ្នកគ្រប់គ្រងផ្នែកទំនាក់ទំនងសាធារណៈ ប្រចាំក្រុមហ៊ុន Sabay Digital Plus បានលើកឡើងថា៖ "ពាក្យសហគ្រិន មិនមែនជាពាក្យថ្មីឡើយសម្រាប់ប្រទេសកម្ពុជា។ យើងមានសហគ្រិនជាច្រើន ហើយពួកគាត់ទាំងអស់ បានរួមចំណែកយ៉ាងខ្លាំងទៅលើការអភិវឌ្ឍន៍សេដ្ឋកិច្ចរបស់ប្រទេសជាតិយើងកន្លងមក"។ លោកបានលើកភស្តុតាងខ្លះៗតាមរបាយការណ៍របស់ អង្គការសហគ្រិនភាពពិភពលោក ឬ Global Enterprises ថា តំបន់អាស៊ី ជាកន្លែងដែលមានសហគ្រិនកើនឡើងគួរឲ្យកត់សម្គាល់។ ក្នុងនោះមានការប៉ាន់ប្រមាណថា នៅកម្ពុជាមានសហគ្រិនប្រហែល ៥០ម៉ឺន នាក់ជាង ខណៈរបាយការណ៍ World Bank បាននិយាយដែរថា កម្ពុជាជាប្រទេសមួយដែលមានអត្រាអ្នកអត់ការងារធ្វើតិចបំផុតនៅលើពិភពលោក ពោលគឺមានត្រឹមតែ ០.២% ប៉ុណ្ណោះ គិតត្រឹមឆ្នាំ ២០១៧។

លោកយល់ថាអត្រាដ៏ទាបនេះ បានមកពីការចូលរួមរបស់សហគ្រិនខ្មែរសព្វថ្ងៃ ដូច្នេះហើយទើប Sabay បានជ្រើសយកប្រធានបទពីសហគ្រិនភាព សម្រាប់បន្តដំណើរគម្រោង "ផ្លូវទៅស្រុកវគ្គ២" (RoadHome2) ។ លោកថា គម្រោង "ផ្លូវទៅស្រុកវគ្គ២" បានផ្សព្វផ្សាយពីអាជីវកម្មរបស់សហគ្រិនខ្មែរចំនួន ៥០ រូប តាមរយៈការចេញផ្សាយជាអត្ថបទលើគេហទំព័រឈានមុនគេនៅកម្ពុជា បូករួមជាមួយវីដេអូ ដែលទទួលបានការគាំទ្រខ្លាំង។ វីដេអូខ្លះ មានអ្នកចូលទស្សនាជាង៦០ម៉ឺនដង ឯអត្ថបទវិញមិនតិចជាង ១២ ម៉ឺនដងឡើយ ហើយចំនួននេះគឺកើនឡើងជារៀងរាល់ថ្ងៃបន្ថែមទៀត។

គម្រោង "ផ្លូវទៅស្រុកវគ្គ២" (RoadHome2) បានចាប់ផ្ដើមពីខែ តុលា ឆ្នាំ ២០១៧ ដល់ខែ មីនា ឆ្នាំ ២០១៨។ ក្នុងខេត្តនីមួយៗ ក្រុមការងារបានចម្រាញ់យកមុខរបរចំនួន ០២ ជារបរមានលក្ខណៈពិសេស និងច្នៃប្រឌិតជាងគេ៕


អត្ថបទ៖ ស៊ិន សាវ៉េត