មកស្គាល់អ្នកនិពន្ធក្មេងខ្ចីដ៏ស្រស់ស្អាត សេន គឹមណេង
- 2018-09-03 04:49:42
- ចំនួនមតិ 0 | ចំនួនចែករំលែក 0
មកស្គាល់អ្នកនិពន្ធក្មេងខ្ចីដ៏ស្រស់ស្អាត សេន គឹមណេង
ចន្លោះមិនឃើញ
ទម្លាប់នៃការអានសៀវភៅ ជំរុញយុវតីម្នាក់នេះឱ្យក្លាយជាអ្នកនិពន្ធរឿងដ៏មានប្រជាប្រិយម្នាក់តាំងពីវិទ្យាល័យ។ ក្នុងវ័យតែជាង ១២ ឆ្នាំ កុមារី សេន គឹមណេង បានផ្តើមសរសេរសំណេររៀបរាប់អំពីរឿងប្រលោមលោក ឬសៀវភៅដែលខ្លួនបានអាន តាមការយល់ឃើញរបស់ខ្លួន។
ក្រោយមកទៀតទម្លាប់នៃការអាន ហើយសរសេរ បានក្លាយជាចំណុចផ្ដើមដ៏ល្អ ឬជាគ្រឹះក្លាយខ្លួនជាស្មេរម្នាក់ដោយមិនដឹងខ្លួន។ បើតាមការរៀបរាប់របស់ គឹមណេង ការដែលមានទម្លាប់សរសេរនេះអាចកើតឡើងដោយលោកប៉ារបស់ខ្លួន ព្រោះគាត់តែងតែបង្គាប់ឱ្យអានសៀវភៅតាំងតែពីក្មេង។ គឹមណេងចាំថា លោកប៉ា ដែលជាគ្រូបង្រៀនក្នុងខេត្តកណ្ដាល តែងតែយកសៀវភៅមានរូបស្អាតឱ្យអាន តែក្រោយមក គាត់ក៏យកសៀវភៅអត់មានរូប ដែលមានចំណងជើងថា «កូនស្រីមាសឪពុក» ដើម្បីសាកល្បងសមត្ថភាពកូន បន្តមកទៀត រូបនាងក៏តែងតែទម្លាប់អានជាហូរហែ។
មានថ្ងៃមួយដែលចាប់ផ្តើមស្គាល់សៀវភៅប្រលោមលោក គឺពេលដែលបងស្រីរបស់ គឹមណេង យកសៀវភៅ ដែលជាស្នាដៃរបស់ អ្នកស្រី ម៉ៅ សំណាង មកអាន ហើយទុកចោលលើតុ គឹមណេង ក៏លួចអាន ហើយសរសេរចំណាប់អារម្មណ៍។ ពេលនោះ អ្នកនិពន្ធវ័យក្មេងរូបនេះគិតថាអានមិនចប់ទេ តែជាក់ស្ដែងកាន់តែអានកាន់តែជក់ចិត្ត កាន់តែជំរុញឱ្យរូបនាងដឹងថាខ្លួនចូលចិត្តការតែងនិពន្ធខ្លាំងឡើង។
ជាកូនស្រីពៅក្នុងគ្រួសារផងនោះ អាចនិយាយបានថាជាកូនស្រីម្នាក់ទទួលបានការយកចិត្តទុកដាក់ និងផ្ដល់ឱកាសច្រើនក្នុងការសិក្សា ពិសេសពេលវេលាសរសេរអត្ថបទតាមការចូលចិត្ត។ ចាប់តាំងពីថ្នាក់ទី ១១ មក យុវតីម្នាក់នេះបានកសាងស្នាដៃតែងនិពន្ធអត្ថបទរឿងខ្លីជាហូរហែតាមរយៈក្រុមអ្នកបោះពុម្ពសៀវភៅកម្សាន្ត ដោយម្តងនោះ គឹមណេង ធ្លាប់ទទួលបានការកោតសរសើរពីនាយកសាលាទៀតផង ពេលមានឈ្មោះ របស់កញ្ញា និងឈ្មោះសាលាចារក្នុងសៀវភៅមួយនោះ។
ក្រោយបញ្ចប់វិទ្យាល័យ គឹមណេង នៅតែបន្តការងារតែងនិពន្ធ ហើយបន្តក្ដីស្រមៃ ជាមួយការសិក្សាតំណាលគ្នានឹងការងារធ្វើទាក់ទងតែងនិពន្ធជាបន្តបន្ទាប់។ បច្ចុប្បន្ននេះស្នាដៃរឿងប្រលោមលោករបស់កញ្ញា គឹមណេង ទទួលបានការគាំទ្រខ្លាំង ត្រូវបានជ្រើសរើសផលិតជាខ្សែភាពយន្តភាគថែមទៀតផង។ ភាពយន្តភាគ «ម្នាក់ប្រុសនោះជាអ្នកណា?» ស្នាដៃតែងនិពន្ធរបស់ គឹមណេង នឹងមានផ្សាយជាផ្លូវការតែមួយគត់ក្នុង App Soyo ក្នុងពេលឆាប់ៗនេះ។
អ្នកនិពន្ធវ័យក្មេង សេន គឹមណេង សង្ឃឹមថាស្នាដៃ រឿង «ម្នាក់ប្រុសនោះជាអ្នកណា?» ដែលធ្លាប់មានការគាំទ្រជាលក្ខណៈសំណេរប្រលោម នឹងទទួលបានជោគជ័យពេលបង្ហាញជាវីដេអូភាពយន្ត ដើម្បីជំរុញការងារតែងនិពន្ធជាបន្តទៅទៀត។ ឆ្លៀតក្នុងឱកាសនេះ កញ្ញា សេន គឹមណេង ក៏សូមរម្លឹកគុណដល់អ្នកនិពន្ធ ២ រូប មានអ្នកស្រី ម៉ៅ សំណាង និងអ្នកស្រី ម៉ីសន សុធារី ដែលជួយបណ្ដុះបណ្ដាល និងផ្ដល់កម្លាំងជំរុញលើកទឹកចិត្តលើការតែងនិពន្ធកន្លងមក៕
រូបភាព៖ ផ្តល់ដោយ សេន គឹមណេង