មកស្គាល់ប្រាសាទបុរាណមួយរបស់កម្ពុជា មានស្ពានព័ទ្ធជុំវិញ រំលេចទេសភាពខៀវស្រងាត់ ស្អាតខ្លាំងបំផុត
- 2018-09-05 02:33:41
- ចំនួនមតិ 0 | ចំនួនចែករំលែក 0
មកស្គាល់ប្រាសាទបុរាណមួយរបស់កម្ពុជា មានស្ពានព័ទ្ធជុំវិញ រំលេចទេសភាពខៀវស្រងាត់ ស្អាតខ្លាំងបំផុត
ចន្លោះមិនឃើញ
ប្រាសាទបុរាណមួយនៅក្នុងខេត្តសៀមរាប មានសភាពទ្រុឌទ្រោមទៅហើយក្ដី តែបានបង្ហាញសម្រស់ដ៏ស្រស់ត្រកាលក្នុងកណ្ដាលព្រៃស្រោងដ៏ត្រឈឹងត្រឈៃ។ ប្រសិនបើបានទៅដល់ទីនោះ ភ្ញៀវទេសចរនឹងទទួលបានអារម្មណ៍ដ៏ស្រស់ថ្លា ជាមួយសភាពស្ងាត់ជ្រងំហ៊ុមព័ន្ធព្រៃឈើយ៉ាងខៀវស្រងាត់។ ពេលឈានចូលចូលដល់ដឹកដីនៃប្រាសាទបេងមាលា ធ្វើឲ្យអារម្មណ៍របស់យើងហាក់កំពុងស្ថិតក្នុងសម័យកាលមួយដ៏យូរលង់ ព្រោះតែគ្រប់យ៉ាងនៅទីនោះ ប្រៀបដូចជាទីឋានដ៏អាកំបាំងមួយ បង្កប់នូវរាល់ចម្ងល់រាប់ពាន់សំណួរចាក់ស្រេះពេញខួរក្បាល។
ភ្ញៀវទេសចរអាចដើរឆ្លងស្ពានឈើដែលគេសាងសង់ឡើងនៅព័ន្ធជុំវិញប្រាសាទ ជាមួយនឹងម្លប់ឈើដ៏ត្រជាក់។ ប្រាសាទខ្លះត្រូវដើមឈើធំៗចាក់ឫសព័ទ្ធជុំវិញបង្កើតបានជារូបភាពមួយប្រៀបដូចជាផ្ទាំងគំនូរយ៉ាងដូច្នោះដែរ។
ប្រាសាទបេងមាលា ត្រូវបានសាងសង់ ឡើងក្នុងអំឡុងចុងសតវត្សទី ១១ និងដើមសតវត្សទី ១២ ក្នុងរាជព្រះបាទសូរ្យវរ្ម័នទី២ ដើម្បីឧទ្ទិសដល់ព្រះវិស្ណុក្នុងព្រហ្មញ្ញសាសនា។ ប្រាសាទនេះមានទីតាំងស្ថិតនៅភូមិបេងមាលា ឃុំបេងមាលា ស្រុកស្វាយលើ ខាងកើតជើងភ្នំគូលែន និងមានចម្ងាយប្រហែល ៨០គីឡូម៉ែត្រពីតំបន់ប្រាសាទអង្គរ។
ប្រវត្តិវិទូមួយចំនួនបានលើកឡើងថា ប្រាសាទបេងមាលាត្រូវបានសាងសង់ឡើង ដោយប្រើប្រាស់ប្លង់មេតែមួយជាមួយប្រាសាទអង្គរវត្ត ហើយការសាងសង់ប្រាសាទនេះឡើងក៏ដើម្បីសាកល្បង មុននឹងសាងសង់ប្រាសាទអង្គរវត្តផងដែរ។
លោក ឈាន រដ្ឋា ប្រធានស្ដីទី នៃនាយកដ្ឋានអភិរក្សប្រាសាទក្រៅឧទ្យានអង្គររបស់អាជ្ញាធរជាតិអប្សរា បានឲ្យដឹងថា បើយោងទៅតាមទេសភាពរបស់ប្រាសាទបេងមាលានាពេលនេះ វាហាក់ដូចជាការច្របាច់បញ្ចូលគ្នារវាងសំណង់ប្រវត្តិសាស្ត្រ និងធម្មជាតិ បង្កើតបានជាទស្សនីយភាពថ្មីមួយសម្រាប់អន្ទងដួងចិត្តភ្ញៀវទេសចរចូលទស្សនាកម្សាន្ត។
ទោះបីជាយ៉ាងណាក៏ដោយ លោក ឈាន រដ្ឋា បញ្ជាក់ឲ្យដឹងថា ប្រាសាទបេងមាលាមិនបានបន្សល់ទុកនូវសិលាចារឹកណាមួយ ដែលបញ្ជាក់ពីកាលបរិច្ឆេទសាងសង់នោះទេ ទើបវានៅតែជាចម្ងល់សម្រាប់អ្នកបុរាណវិទ្យាថាតើរវាងប្រាសាទអង្គរវត្ត និងប្រាសាទបេងមាលាមួយណាសាងសង់មុន៕