ធ្លាយចេញតម្លៃខ្លួន មាស សុខសោភា ក្រោយមុននេះមានតម្រុយ សុគន្ធកញ្ញា ស៊ីថ្លៃខ្ពស់

2018-09-05 04:00:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តម្លៃខ្លួនខ្លាញីរបស់ថោន មាស សុខសោភា ត្រូវបានប្រភពមួយបញ្ចេញឲ្យដឹងថ្មីៗ ក្រោយប៉ុន្មានខែមុន ខ្លាញីនៅហង្សមាស ត្រូវប្រភពលាក់មុខ បង្ហើបថា នាងមានតម្លៃខ្លួនខ្ពស់ក្នុងនាមជាតារាចម្រៀងស្រីល្បីមួយរូប។

សុគន្ធកញ្ញា ត្រូវបានប្រភពកំបាំងមុខ ទម្លាយមុននេះថា មានតម្លៃឈ្នួលការងារចន្លោះពីរ ៣ ០០០ ទៅ ៣ ៥០០ដុល្លារអាមេរិកសម្រាប់ប្រភេទការងារចេញច្រៀងតាមកម្មវិធីនានានៅរាជធានី។ ដោយឡែក មាស សុខសោភា វិញ ប្រភពពីអ្នករៀបចំកម្មវិធីនានាមួយប្រាប់ថា មានតម្លៃប្រហាក់ប្រហែលគ្នាដែរ គឺចន្លោះពី ៣ ០០០ ទៅ ៣ ៥០០ដុល្លារអាមេរិកដូចគ្នា។

មិនត្រឹមតែតម្លៃឈ្នួលការងារនៅរាជធានីប្រហាក់ប្រហែលគ្នាទេ សូម្បីតែនៅតាមបណ្ដាខេត្ត ក៏ខ្លាញីទាំងពីរ ទទួលបានថ្លៃឈ្នួលប្រហាក់ប្រហែលគ្នាទៀត។ ប្រភពថ្លែងថា "នៅតាមខេត្ត ក៏ពួកគេស៊ីថ្លៃប្រហែលគ្នាដែរ គឺថ្លៃឈ្នួលពួកគេអាចឡើងពី៥០០ ទៅ ១ ០០០ដុល្លារបន្ថែមពីលើការងារនៅភ្នំពេញទៀត"។

បើទោះយ៉ាងនេះក្ដី តាមប្រភពខាងលើបញ្ជាក់ថា តួលេខខាងលើ មិនទាន់អាចយកជាការ១០០%នោះទេ ដោយសារជានិច្ចកាល តម្លៃឈ្នួលពួកគេ(តារាចម្រៀងទូទៅ)ប្រែប្រួលឡើងចុះទៅតាមកាលវេលា និងដោយយោងលើកត្តាផ្សេងៗទៀតជាច្រើន។

"និយាយទៅ តម្លៃវានៅលើមាត់ពួកគេ យើងពិបាកកំណត់ថា តម្លៃណាជាតម្លៃពិតប្រាកដណាស់...ឧបមា ពេលវេលាណាដែលពួកគេមានបទចម្រៀងផ្ទុះលើទីផ្សារ តម្លៃពលកម្មពួកគេក៏អាចឡើងតាមហ្នឹងទៀត...ប៉ុន្តែក៏អាចចុះដែរ ដូចជាពេលចរចា ពួកគេនឹងសួរពីប្រភេទការងារថា វាតូចវាធំប៉ុណ្ណា បើកម្មវិធីយើងរាងធំ គេយកថ្លៃអីចឹងទៅ បើតូច គេយោគយល់ យកថោកតិចអីចឹងទៅ...!”។

និយាយដោយឡែកសម្រាប់តែ មាស សុខសោភា ប្រភពបានវាយតម្លៃថា ថ្លៃពលកម្មរបស់នាងអាចកើនឡើងទៀតនាពេលបច្ចុប្បន្ន។ ចំណុចគួរចាប់អារម្មណ៍ គឺនាងធ្លាប់មានចចាមអារ៉ាម ថាគ្រោងចេញពីថោន ប៉ុន្តែចុងក្រោយ គេឃើញនាងនៅតែបន្តឈរជើងក្នុងទ្រនំចាស់នេះដដែល។

ការដែលនាងបន្តឈរជើងមិនទៅណានេះ ក៏មានព័ត៌មានល្ហិចល្ហៀងទៀតថា ក៏ដោយសារ មានភ្ជាប់ជាមួយថ្នូរឲ្យបងប្រុសរបស់នាង ឡើងជាអ្នកចាត់ការទូទៅនៅក្នុងផលិតកម្មថោនវិញ ក្រោយបានចាកចេញពីតំណែងប្រមាណ ១ឆ្នាំ។ ដូច្នេះសំអាងលើហេតុផលទាំងនេះ មាស សុខសោភា អាចមានតម្លៃខ្លួនកើនឡើងទៀតគិតមកត្រឹមពេលនេះ...ឯសុគន្ធកញ្ញា ក៏អាចថាប្រែប្រួលដូចគ្នាដែរ៕

អត្ថបទ៖ ទារិកា