គោលការណ៍ថ្មី ក្រុមហ៊ុនណាចង់ធ្វើការជាមួយ Microsoft ត្រូវមានប្រាក់មាតុភាពដល់បុគ្គលិក
- 2018-09-05 07:12:28
- ចំនួនមតិ 0 | ចំនួនចែករំលែក 0
គោលការណ៍ថ្មី ក្រុមហ៊ុនណាចង់ធ្វើការជាមួយ Microsoft ត្រូវមានប្រាក់មាតុភាពដល់បុគ្គលិក
ចន្លោះមិនឃើញ
Microsoft បានប្រកាសថា ក្រុមហ៊ុននឹងចាប់ផ្ដើមឲ្យអ្នកផ្គត់ផ្គង់ និងក្រុមហ៊ុនទទួលម៉ៅការជាដៃគូ ផ្ដល់ប្រាក់សម្រាកមាតុភាព (សម្រាលកូន) ដល់បុគ្គលិករបស់ពួកគេ រយៈពេល ៣ ខែ ពោលគឺ ១ ០០០ ពាន់ដុល្លារ ក្នុងមួយសប្ដាហ៍ ដែលនឹងចាប់ផ្ដើមអនុវត្តនៅឆ្នាំ ២០១៩។
លក្ខខណ្ឌក្រុមហ៊ុន Microsoft បានបញ្ជាក់ថា គឺសម្រាប់ក្រុមហ៊ុនដៃគូដែលមាននិយោជិកចាប់ពី ៥០នាក់ ។ យ៉ាងណា មិនរាប់បញ្ចូលបុគ្គលិកជាប់កិច្ចសន្យា នៅក្រៅទឹកដីសហរដ្ឋអាមេរិកឡើយ។
អនុប្រធាន និងជាគណៈកម្មការកណ្ដាលរបស់ Microsoft លោក Dev Stahlkopf បាននិយាយយ៉ាងដូច្នេះ៖ "យើងទទួលសម្គាល់ជាយូរហើយ សុខភាព សុខុមាលភាព និងភាពសម្បូរបែប របស់បុគ្គលិករបស់យើង បានជួយឱ្យ Microsoft ទទួលជោគជ័យ"។
លោកបន្តទៀតថា មិនត្រឹមតែបុគ្គលិករបស់ Microsoft ទេ សូម្បីនិយោជិករបស់ដៃគូ និងអ្នកផ្គត់ផ្គង់ ក៏បានរួមចំណែក ឱ្យក្រុមហ៊ុនរបស់លោកជោគជ័យដូចគ្នា។
Microsoft ដឹងថា គោលការណ៍ថ្មីនេះ នឹងនាំឱ្យមានការចំណាយកើនឡើង ប៉ុន្តែក្រុមហ៊ុនអាមេរិកមួយនេះ នឹងជួយដៃគូតាមដែលអាចធ្វើទៅបាន។
ក្រុមហ៊ុនបច្ចេកវិទ្យារបស់លោក Bill Gates បានដាក់ចេញគោលនយោបាយនេះ ក្រោយរដ្ឋធានីវ៉ាស៊ីនតោន បានអនុម័តច្បាប់ តម្រូវឱ្យក្រុមហ៊ុនផ្ដល់ថ្លៃមាតុភាព (សម្រាលកូន) ហើយច្បាប់ថ្មីទៀតសោត នឹងចូលជាធរមាននៅឆ្នាំ ២០២០។
ក្នុងឆ្នាំ ២០១៥ ក្រុមហ៊ុន Microsoft បានបង្កើតគំនិតផ្ដួចផ្ដើមស្រដៀងគ្នាមួយដែរ តម្រូវឱ្យអ្នកផ្គត់ផ្គង់របស់ខ្លួន ផ្ដល់ប្រាក់ពលកម្មពេលឈប់សម្រាក ដល់បុគ្គលិករបស់ពួកគេ។
ច្បាប់មាតុភាព ឬច្បាប់សម្រាកពេលសម្រាលកូន នៅសហរដ្ឋអាមេរិក គឺជាច្បាប់ឈប់សម្រាក មុន និងក្រោយសម្រាលកូនរយៈពេល ១២សប្ដាហ៍ ដោយគ្មានទទួលបានប្រាក់ខែ។ យ៉ាងណាថ្មីៗនេះ អភិបាលរដ្ឋធានី Washington លោក Jay Inslee បានចុះហត្ថលេខាចេញច្បាប់ថ្មី តម្រូវឱ្យក្រុមហ៊ុនចេញថ្លៃប្រាក់ឈ្នួលដល់បុគ្គលិក អំឡុងពេលសម្រាលកូន ឬយកកូនទៅចិញ្ចឹម ដែលនឹងចូលជាធរមាន នៅឆ្នាំ ២០២០ ខាងមុខ៕