បាក់ឌុបឆ្នាំនេះសិស្សត្អូញពិបាក តែរដ្ឋមន្ត្រីក្រសួងអប់រំថាអ្នកជាប់និទ្ទេសA នឹងកើនទ្វេដង

2018-09-05 04:59:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកាសលទ្ធផលបាក់ឌុប២០១៨កាន់តែកៀក ខណៈកម្មការកំពុងបូកសរុបពិន្ទុតាមប្រព័ន្ធកុំព្យូទ័រយ៉ាងមមាញឹក។ តាមការលើកឡើងរបស់បេក្ខជនប្រឡងមធ្យមសិក្សាទុតិយភូមិឆ្នាំ២០១៨ បានត្អូញថាការប្រឡងហាក់មានសភាពតឹងតែងខ្លាំងទាំងកម្រិតវិន័យ និងវិញ្ញាសា រហូតដល់មានបេក្ខជនខ្លះធ្លោយមាត់ថា ពិបាកជាង២០១៤រហូតដល់មានការវែកញែកកក្រើកហ្វេសប៊ុកទៀតផង។

យ៉ាងណាក្ដីតាមប្រសាសន៍របស់រដ្ឋមន្ត្រីក្រសួងអប់រំយុវជន និងកីឡា ការរឹតបន្តឹងវិញ្ញាសា និងបទប្បញ្ញត្តិគឺមិនខុសពីរាល់ឆ្នាំឡើយ ក្រសួងនៅតែយកចិត្តទុកដាក់លើការប្រឡងថ្នាក់ជាតិមួយនេះ ប្រសិនបើអ្នកមានសមត្ថភាពពិតប្រាកដ គឺជាប់ហើយ។ បន្ថែមលើពីនេះទៀតឯកឧត្ដម បានរំពឹងថា អ្នកជាប់និទ្ទេស A ឆ្នាំនេះ អាចកើនឡើងដល់ជាង៥០០នាក់។ ចំនួននេះគឺលើសកាលពីឆ្នាំ២០១៧ ដោយមានអ្នកជាប់និទ្ទេស A ចំនួន៤២៤នាក់។

ការរំពឹងបែបនេះ ដោយសារឯកឧត្ដមជឿជាក់លើសមត្ថភាពរបស់សិស្សានុសិស្ស ដែលទទួលបានសិក្សាក្នុងកម្មវិធីស្របតាមស្តង់ដារ ទាំងគុណភាពគ្រូបង្រៀន និងកម្រិតវិន័យផ្សេងៗ ដែលក្រសួងបានធ្វើកំណែទម្រង់អស់រយៈពេល៥ឆ្នាំកន្លងមកនេះ។ ម្យ៉ាងវិញទៀតបេក្ខជនឆ្នាំនេះ បានត្រៀមខ្លួនរយៈពេល៥ឆ្នាំរួចមកហើយ សមល្មមនឹងកម្រិតវិន័យក៏ដូចជាវិញ្ញាសាដែលក្រសួងបានដាក់ចេញ។

ក្រសួងអប់រំ យុវជន និងកីឡា បានបញ្ជាក់ពីនិទ្ទេសទាំង ៥ កម្រិត គឺនិទ្ទេស A, B, C, D និង E ត្រូវមានពិន្ទុសរុបដូចខាងក្រោម៖

និទ្ទេស A : ល្អប្រសើរ = ពិន្ទុសរុប x ០,៩
និទ្ទេស B : ល្អណាស់ = ពិន្ទុសរុប x ០,៨
និទ្ទេស C : ល្អ = ពិន្ទុសរុប x ០,៧
និទ្ទេស D : ល្អបង្គួរ = ពិន្ទុសរុប x ០,៦
និទ្ទេស E : មធ្យម = ពិន្ទុសរុប x ០,៥

ក្រសួងអប់រំធ្លាប់បានបញ្ជាក់ថា របបពិន្ទុប្រឡងអតិបរមា នៃការប្រឡងសញ្ញាបត្រមធ្យមសិក្សាទុតិយភូមិឆ្នាំ ២០១៨ គឺ ៥០០ពិន្ទុ ប៉ុន្តែដោយមុខវិជ្ជាភាសាបរទេស ជាវិញ្ញាសាតាមស្ម័គ្រ ដូច្នេះពិន្ទុប្រឡងជាប់ គឺ ៥០០ ដក ២៥ រួចចែកនឹង ២ ស្មើនឹង ២៣៧,៥ពិន្ទុ យកត្រឹម ២៣៧ ពិន្ទុ ជាប់៕

អត្ថបទ៖ វឌ្ឍនៈ