ជាង១ឆ្នាំសោះ PNN ផលិតរឿងភាគខ្មែរបានដល់ ១០០០ម៉ោង ហើយបានលេខ១ ទៀត

2018-09-05 07:50:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមតែរយៈពេលដ៏ខ្លី រឿងភាគខ្មែរដែលបានចាក់ផ្សាយនៅPNN អាចដណ្តើមបានចំណាត់ថ្នាក់លេខ១ និងអាចទាញយកប្រជាប្រិយភាពពីសំណាក់ទស្សនិកជនបានច្រើន។

រឿងភាគខ្មែរដែលធ្វើឱ្យ PNN ទទួលបានចំណាត់ថ្នាក់លេខ១ មានដូចជារឿង «ទុំទាវ» «ពស់កេងកង» «សូផាត» «កញ្ញាអំពិលផ្អែម» «ប្រពន្ធអ្នកឆ្លាត» និងរឿង «កន្ទោងខៀវ» ជាដើម នេះបើតាមការអះអាងរបស់កញ្ញា ទូច បុប្ផា ប្រធានផ្នែកគ្រប់គ្រងកម្មវិធីផ្សាយរបស់ស្ថានីយទូរទស្សន៍PNN។

កញ្ញាបានបន្ថែមថា៖ "បើសិនយើងត្រឡប់ទៅពាក់កណ្តាលឆ្នាំ២០១៦ ដែលPNN ទើបតែកកើតបានប៉ុន្មានខែប៉ុណ្ណោះ តែយើងត្រូវរិះរកវិធី និងមធ្យោបាយក្នុងការប្រមូលក្រុមផលិតភាពយន្តភាគខ្មែររាប់សិបម៉ោង ដើម្បីបំពេញម៉ោងផ្សាយរបស់យើង។ វាហាក់មានការលំបាកខ្លាំងដោយសារធនធានអ្នកផលិត អ្នកនិពន្ធយើងហាក់មានចំនួនតិច បញ្ហាបច្ចេកទេសនៅមានកម្រិត។

"យើងបានធ្វើការស្វះស្វែងរកអ្នកផលិតដែលមានស្នាដៃ និងសិក្សារួមគ្នាថាតើគួរផលិតបែបណា ទើបទទួលបាននូវគុណភាពល្អ? ហើយចំណុចចម្បងគឺយើងគាំទ្រនូវស្នាដៃនិពន្ធក្នុងស្រុក ។ ក្នុងនោះដែរយើងក៏បានចំណាយទឹកប្រាក់ខ្ទង់លានដុល្លារដើម្បីផលិត និងធ្វើយ៉ាងណាអាចឱ្យភាពយន្តភាគខ្មែរមានគុណភាពល្អ និងតំលៃសមស្របជាមួយនឹងទីផ្សារ"។ ប្រធានផ្នែកគ្រប់គ្រងកម្មវិធីផ្សាយរបស់ស្ថានីយទូរទស្សន៍PNN អះអាង។

ការពិតទៅក្រុមកាងារទាំងអស់ពិតជាមានមោទនភាព ព្រោះក្នុងរយៈពេលដ៏ខ្លីអាចផលិតកុនភាគខ្មែរបានដល់ទៅ ១០០០ម៉ោង ដែលជំរុញឱ្យទីផ្សារភាពយន្តភាគខ្មែរមានសន្ទុះខ្លាំង និងអាចឱ្យភាពយន្តភាគខ្មែរ PNN ឈរនៅលំដាប់ថ្នាក់លេខ១ក្នុងឆ្នាំ២០១៨នេះ។ សម្រាប់ទិសដៅក្នុងឆ្នាំ២០១៩ ខាងមុខនេះ PNN នឹងខិតខំព្យាយាមផលិតរឿងភាគខ្មែរឱ្យបានល្អថែមមួយកម្រិតទៀត ដោយផ្អែកទៅលើការពង្រឹងបន្ថែមនូវកក្តាធំៗបីចំណុច៖

ទី១គឺ ការវិនិយោគបន្ថែម
ទី២ការប្រមូលផ្តុំផលិតករដែលមានបទពិសោធន៍ស្នាដៃស្នាដៃល្អ
និងទី៣ការបង្កើតក្រុមការងារជំនាញៗដែលមានការច្នៃប្រឌិត និងបង្កើតគំនិតថ្មីៗ

PNN នឹងប្រមូលផ្តុំនូវរឿងភាគខ្មែរល្អៗ ដែលមានគ្រប់រសជាតិ គ្រប់ទម្រង់ មកចាក់ផ្សាយជូនទស្សនិកជនបានទស្សនា ដោយសង្ឃឹមថាទស្សនិកជននឹងបន្តនូវការគាំទ្ររឿងភាគខ្មែរជាមួយPNN បន្តបន្ទាប់ទៀត។

ទស្សនាឡើងវិញឈុតពិសេសនៃរឿងភាគខ្មែរ ដែលបាននិងកំពុងចាក់ផ្សាយនៅលើកញ្ចក់ទូរទស្សន៍ភីអិនអិន៖

-រឿង កន្ទោងខៀវ

-រឿង ពស់កេងកង

-រឿង កញ្ញាអំពិលផ្អែម

-រឿង ទុំទាវ

-រឿង សូផាត

-រឿង ប្រពន្ធអ្នកឆ្លាត

អត្ថបទ៖ ថា ម៉ាលីដា