កុសម៉ា លីនដា សម្ញែងដើមទ្រូង មិនខ្លាចក្រសួងហៅទៅដុសក្អែល
- 2018-09-06 04:26:05
- ចំនួនមតិ 0 | ចំនួនចែករំលែក 0
កុសម៉ា លីនដា សម្ញែងដើមទ្រូង មិនខ្លាចក្រសួងហៅទៅដុសក្អែល
ចន្លោះមិនឃើញ
មួយរយៈចុងក្រោយនេះ កញ្ញា កុសម៉ា លីនដា បានបញ្ចេញភាពសិចស៊ីជាខ្លាំងនៅលើបណ្ដាញសង្គម ខណៈដែលតារាប្រុសស្រីល្បីជាច្រើនរូបទៀតកំពុងតែស្ថិតក្នុងបញ្ជីខ្មៅរបស់ក្រសួងវប្បធម៌ត្រៀមកោះហៅទៅណែនាំ ឬអាចដាក់ពិន័យជុំវិញការស្លៀកពាក់សិចស៊ី។ បែបនេះក្ដីតារាស្រីរូបនេះ បានថ្លែងថា នាងមិនខ្លាចលើការព្រមានឡើយ ព្រោះការបញ្ចេញរបស់ខ្លួន មិនសិចស៊ីខ្លាំងដល់ថ្នាក់ស្រាតនោះឡើយ គ្រាន់តែធម្មតាបែបសិល្បៈប៉ុណ្ណោះ។
តារាសម្ដែងដែលទើបហក់ចាប់អាជីពជាតារាសម្ដែងមិនបាន១ឆ្នាំស្រួលបួលផង ហើយកំពុងតែបញ្ចេញភាពសិចស៊ីខ្លាំង ធ្វើប្រុសជ្រួលជ្រើមមិនស្ទើរនោះ នាងហាក់មិនបានខ្វល់លើការព្រមាន ដូចតារាល្បីប៉ុន្មានរូបខាងលើឡើយ។ នាងបែរជា និយាយថា ខ្លួនជាតារាថ្មីៗអីចឹង ប្រហែលជាមិនមានអ្នកចាប់អារម្មណ៍ឡើយ ឬក្រសួងហៅទៅព្រមានឡើយ ហើយការបញ្ចេញនោះទៀតសោត ដូចបានលើកឡើង គ្រាន់តែធម្មតាបែបសិល្បៈប៉ុណ្ណោះ។ ជាមួយនឹងភាពសិចស៊ីនេះ តារាស្រីក្នុងរឿង "គូស្នេហ៍បម្រុង" រូបនេះបញ្ជាក់ថា មិនមែនជាការចង់ល្បី ឬចង់ឲ្យក្រសួងហៅព្រមានឡើយ ទាំងនេះគ្រាន់តែជាចំណង់ចំណូលចិត្តខ្លួនប៉ុណ្ណោះ។
កញ្ញា កុសម៉ា លីនដា ទើបតែចាប់អាជីពសិល្បៈជាតារាសម្ដែងនេះទេ នាងគឺជាកូនច្បងរបស់អតីតតារាសម្ដែងជើងចាស់លោក ហៀង រតនា។ កន្លងមកស្រីស្អាតរូបនេះធ្លាប់បានថត MV ស្ប៉ត និងភាពយន្តជាបន្តបន្ទាប់។ ភាពយន្តដែលតារាស្រីវ័យ២២ឆ្នាំមានកំណើតមកពី ខេត្តស្វាយរៀងរូបនេះធ្លាប់បានថតភាពយន្តបាន៣រឿងមកហើយ រឿងទី១" បិសាចគួរឲ្យស្រលាញ់", រឿងទី២"គូស្នេហ៍បម្រុង", រឿងទី៣"ឆន្ទា" ហើយបច្ចុប្បន្នកំពុងតែត្រៀមចុះកុងត្រាថតរឿងថ្មី១ទៀត ។ តួដែល លីនដា ធ្លាប់សម្ដែងកន្លងមកនាងថា ភាគច្រើនជាតួកាចឆ្នាសឆ្នើម ហើយសិចស៊ីដែលចរិតតួសម្ដែងបែបនេះ គឺជាចំណង់ចំណូលចិត្តរបស់នាងតែម្ដង។