មួយបាតស្បែកជើងរបស់កីឡាករអាល្លឺម៉ង់ ធ្វើឲ្យ Pavard ស្ទើររយះក

2018-09-07 02:50:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារបារាំង Benjamin Pavard បង្ហាញអាការៈឈឺកយ៉ាងខ្លាំង បន្ទាប់ពីកីឡាករ Antonio Rudiger របស់អាល្លឺម៉ង់ជាន់ចំករបស់គេ អំឡុងពេលប្រកួតក្នុងពាន Nations League យប់មិញ។

ក្នុងប្រកួតទី១នៅ League A ម្ចាស់ផ្ទះអាល្លឺម៉ង់បានប្រកួតស្មើគ្នាជាមួយជើងឯក World Cup ថ្មីថ្មោងបារាំងក្នុងលទ្ធផល ០ទល់នឹង០។ ហេតុការណ៍របួសរបស់ Pavard បានកើតឡើងនៅនាទីទី៣ បន្ទាប់ពីអាជ្ញាកណ្ដាលផ្លុំកញ្ចែចាប់ផ្ដើមការប្រកួតនៅវគ្គទីមួយ។

សកម្មភាពនោះ ខ្សែការពារ Rudiger បានប្រឹងរត់អូសបាល់ពីស្លាបឆ្វេងដើម្បីកាត់ចូលក្នុង។ តែអំឡុងពេលនោះ Pavard ត្រូវបំពេញតួនាទីខ្លួនរត់ទៅឈូសបាល់ចេញរួចក៏ប៉ះនឹងជើងរបស់ Rudiger តែម្ដង។ Pavard វ័យ២២ឆ្នាំត្រូវបានគ្រូពេទ្យនាំចេញក្រៅទីលានបណ្ដោះអាសន្ន ខណៈត្រង់កមានស្នាមឆូតក្រហមជាច្រើន។

យ៉ាងនេះក្ដី របួសនេះមិនមិនអាបង្អាក់ការលេងរបស់ Pavard បានទេ គឺអាចចូលលេងរហូតចប់៩០នាទី។ កីឡាកររបស់ Stuttgart រូបនេះក៏ជាសមាជិកសំខាន់ជួយបារាំងឈ្នះជើងឯក World Cup នៅប្រទេសរុស្សីផងដែរ៕