ជម្លោះក្ដៅគគុក អ៊ិន សុភិន និង ស្រីណា ស្រាប់តែបានបញ្ចប់យ៉ាងផុយ!

2018-09-07 11:55:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីមានជម្លោះគគុកវាយប្រហារគ្នាទៅមកលើបណ្ដាញសង្គមរវាង ចាងហ្វាងផលិតកម្មមហាហង្ស និងតារាសម្ដែង ណាក់ ស្រីណា បានបញ្ចប់ហើយ នៅព្រឹកថ្ងៃនេះ ក្រោយភាគីទាំងពីសុខចិត្តដកថយមួយជំហានម្នាក់។

នៅក្នុងការស្រុះស្រួលគ្នា ដែលមានសមាគមសិល្បៈធ្វើជាអ្នកសម្របសម្រួល ណាក់ ស្រីណា បានធ្វើការសុំទោសជាលាយលក្ខណ៍អក្សរទៅចាងហ្វាងផលិតកម្ម។ លោក ហេង ឡុង ដែលដើរអ្នកសម្របសម្រួល បានហៅការណ៍នេះថា ជាគំរូល្អមួយនៅក្នុងសង្គមសិល្បៈ សម្រាប់សិល្បករផ្សេងទៀត ដែលមានវិវាទ ឬយល់ច្រឡំគ្នា គួរងាកមកផ្សះផ្សារតាមបែបសន្តិវិធីដូចគ្នានេះ។

កញ្ញា ណាក់ ស្រីណា បញ្ជាក់ថា នាងសុខចិត្តចូលខ្លួនសុំទោសលោក អ៊ិន សុភិន ក្រោយនាងយល់ថា អ្វីដែលខ្លួនបានធ្វើកន្លងមក បានប៉ះពាល់ដល់ក្រុមហ៊ុនមហាហង្ស ក៏ដូចជាអគ្គនាយកក្រុមហ៊ុនរូបនេះ។

ដោយឡែក អ៊ិន សុភិន ដែលគូវិវាទមុននេះ ក៏បញ្ជាក់ប្រាប់ Sabay ដែរថា លោកព្រមទទួលយកការសុំទោសពីតារាស្រីខាងលើដើម្បីបញ្ចប់រឿង។ "គាត់បានសុំទោសហើយ ក្រោមការសម្របសម្រួលរបស់សមាគមសិល្បៈ អីចឹងខ្ញុំក៏លែងប្រកាន់ទោសអូសដំណើរអីទៀតដែរ ដើម្បីរឿងត្រឹមហ្នឹងទៅចុះ"។ជាមួយការសម្របសម្រួលនេះ លោក អ៊ិន សុភិន ក៏បានយល់ព្រមប្រាក់ថ្លៃពលកម្មរបស់ ណាក់ ស្រីណា ដែរ បន្ទាប់ពីតារាស្រី ដឹងកំហុស និងបានធ្វើការសុំទោសលោក។

លោក អ៊ិន សុភិន និងណាក់ ស្រីណា បានកើតមានជម្លោះក្ដៅគគុកពាក់ព័ន្ធនឹងប្រាក់ឈ្នួលពលកម្មរបស់ ណាក់ ស្រីណា ដែលបានចូលខ្លួនសម្ដែងក្នុងរឿង "មរតកចុកឈាម" ឲ្យផលិតកម្មលោក អ៊ិន សុភិន ប្រមាណជាង ១ឆ្នាំមកហើយ ដោយមិនទាន់ទទួលបានប្រាក់ថ្លៃនឿយហត់។ បញ្ហានោះ ក៏មានការឆ្លើយតបគ្នាទៅវិញទៅមក។

លោក អ៊ិន សុភិន បញ្ជាក់ថា លោកសំអាងទៅលើឯកសារការងារ ដែលលោកបានអះអាងថា ណាក់ ស្រីណា បានរំលោភលើកិច្ចសន្យាការងារជាមួយលោក ទើបកន្លងមក លោកសម្រេចផ្អឹបថ្លៃឈ្នួលរបស់តារាស្រី ទុកសិនមួយអន្លើសិនដូច្នេះ៕

អត្ថបទ៖ ទារិកា