អ្នកគាំទ្រ Tottenham សុំកូរ៉េខាងត្បូងឲ្យ Son បានសម្រាកខ្លះក្រោយឈ្នះមិត្តភាពលើ Costa Rica
- 2018-09-08 08:56:48
- ចំនួនមតិ 0 | ចំនួនចែករំលែក 0
អ្នកគាំទ្រ Tottenham សុំកូរ៉េខាងត្បូងឲ្យ Son បានសម្រាកខ្លះក្រោយឈ្នះមិត្តភាពលើ Costa Rica
ចន្លោះមិនឃើញ
ក្រុមអ្នកគាំទ្រ Tottenham មានការភ្ញាក់ផ្អើលដោយកីឡាករ Son Heung-min នៅមិនទាន់បានសម្រាកពីជម្រើសជាតិនៅឡើយ ហើយរូបគេត្រូវបានដាក់ឲ្យលេងពេញ ៨៣ នាទីកាលពីថ្ងៃសុក្រ។
Son ទើបតែជួយកូរ៉េខាងត្បូងឈ្នះមេដាយមាសនៅព្រឹត្តិការណ៍កីឡាអាស៊ី ហើយបានធ្វើឲ្យតារាឆ្នើមរបស់ក្រុម Spurs រូបនេះត្រូវរួចពីកាតព្វកិច្ចយោធា ២១ ខែ។
ប៉ុន្មានថ្ងៃក្រោយពីទទួលបានជ័យជម្នះពីប្រទេសឥណ្ឌូនេស៊ី ដែល Son លេងបាន៧ប្រកួត ក្នុងរយៈពេល ១៧ ថ្ងៃ ប្រធានក្រុមជម្រើសជាតិកូរ៉េខាងត្បូងរូបនេះ បានជួយឲ្យកូរ៉េខាងត្បូងឈ្នះ Costa Rica ២-០ ទៀតកាលពីយប់មិញ។
អ្នកគាំទ្រខ្លះបានសរសេរនៅលើ Twitter ថា "ឱព្រះ! តើគេនៅកំពុងលេង [ឲ្យជម្រើសជាតិ] ទៀតឬ?”។ ខ្លះទៀត រៀបរាប់ថា "សូមឲ្យ[កីឡាករ] ដ៏គួរឲ្យអាណិតបានសម្រាកខ្លះផង" និង "តើអ្នកអាចសុំកូរ៉េខាងត្បូងឲ្យគាត់បានសម្រាកឥឡូវនេះបានអត់?”។
កីឡាករអាស៊ីរូបនេះកំពុងពេញនិយមបំផុតក្នុងចំណោមអ្នកគាំទ្រ Tottenham ហើយ រូបគេផ្ទាល់ក៏បានអរគុណអ្នកគាំទ្រដូចគ្នាបន្ទាប់ពីបានឈ្នះពានរង្វាន់ Asian Games កាលពីសប្តាហ៍មុន។
Son គឺជាកីឡាករម្នាក់ក្នុងចំណោមកីឡាករដែលគ្រូបង្វឹក Mauricio Pochettino ទុកចិត្តដាក់ឲ្យលេងស្ទើរគ្រប់ប្រកួត មិនថាប្រកួតក្នុងលីគ និង UEFA Champions League ឡើយ ហើយ តារាឆ្នើមពាក់អាវលេខ៧ តែងបង្កើតឱកាសដោយបញ្ជូនឲ្យមិត្តរួមក្រុមស៊ុតបញ្ចូលទី និង ស៊ុតបញ្ចូលទីខ្លួនឯងបានចំនួន១៨គ្រាប់កាលពីរដូវកាលមុន៕