មុនប៉ះគ្នាល្ងាចនេះ គ្រូទាំងពីរសុទ្ធតែស្គាល់ពីភាពខ្លាំងរបស់ដៃគូ

2018-09-10 01:46:27
ចំនួនមតិ 0 | ចំនួនចែករំលែក 0

ចន្លោះមិនឃើញ

គោព្រៃកម្ពុជា នឹងជួបក្រុមខ្លាំងម៉ាឡេស៊ីនៅវេលាម៉ោង ៦:៣០នាទីល្ងាចនេះនៅពហុកីឡដ្ឋានជាតិ ក្នុងជំនួបមិត្តភាពអន្តរជាតិ។ ជុំវិញការប្រកួតនេះចាប់ផ្ដើមតើគ្រួបង្វឹកទាំងពីរបាននិយាយអ្វីខ្លះ?

លោក Tan Cheng គ្រូបង្គោលរបស់ក្រុមម៉ាឡេស៊ីបានឲ្យដឹងថា កម្ពុជាជាក្រុមពិបាកយកឈ្នះសម្រាប់ជំនួបមិត្តភាពនេះ ពីព្រោះកីឡាករទាំងអស់ប្រាកដជាមានឆន្ទៈខ្ពស់ក្នុងការលេងលើសពី១០០% ដើម្បីបង្ហាញដល់គ្រូបង្គោលថ្មីរបស់ពួកគេ។ ទាក់ទងការមកដឹកនាំរបស់កីឡាករលំដាប់ពិភពលោក Keisuke Honda ក្នុងការជួយជ្រោមជ្រែងកម្ពុជាជារឿងគួរឲ្យភ្ញាក់ផ្អើលមួយ។

លោក Tan Cheng

លោកបន្ថែមថា សម្រាប់ទស្សនៈរបស់លោកផ្ទាល់កម្ពុជា នឹងមានទម្រង់លេងមួយថ្មីក្រោមការដឹកនាំរបស់គ្រូបង្វឹកថ្មី។ ប៉ុន្តែអ្វីដែលជាកត់សម្គាល់របស់លោកគឺគុណភាពកីឡាករច្រើនជាង ដែលមាន ធារី ចន្ថាប៊ីន ដែលធ្លាប់លេងនៅលីគកំពូលម៉ាឡេស៊ីជាដើម។

ចំណែកលោក Keisuke Honda អ្នកចាត់ការរបស់ក្រុមកម្ពុជាវិញបាននិយាយមុនការប្រកួតនេះថា វាជារឿងពិបាកមួយក្នុងការយកឈ្នះក្រុមខ្លាំងដូចជាម៉ាឡេស៊ី។ ប៉ុន្តែលោកបានអះអាងថា គោព្រៃកម្ពុជា នឹងធ្វើបានល្អក្នុងការប្រកួតនេះ។

លោក Keisuke Honda

លោកបានបន្ថែមថា ការចាប់ផ្ដើមប្រមូលផ្ដុំរយៈពេល១សប្ដាហ៍នេះ វាមិនគ្រប់គ្រាន់ក្នុងការរៀបចំប្រព័ន្ធលេងថ្មីឲ្យបានល្អនោះទេ។ លោកបានណែនាំកីឡាករទាំងអស់ឲ្យលេងតាមរបៀបដែលលោកចង់បាន ហើយពេលនេះពួកគេក៏បានយល់បានច្រើនផងដែរ។

បន្ទាប់ពីការប្រកួតមិត្តភាពនេះទៅកម្ពុជានៅសល់ពីរប្រកួតទៀតគឺជួបក្រុមជម្រើសជាតិទីម័រខាងកើត ថ្ងៃទី១២ ខែតុលា ឆ្នាំ២០១៨ និងប៉ះក្រុមជម្រើសជាតិសិង្ហបុរីថ្ងៃទី១៦ ខែតុលា ឆ្នាំ២០១៨ ដែលពីរប្រកួតនេះធ្វើឡើងវេលាម៉ោង ៦:៣០ នាទីដូចគ្នា នៅពហុកីឡដ្ឋានជាតិ៕