សិស្សឆ្នើមគណិតវិទ្យាធ្លាប់បានមេដាយមាស ធ្លាក់គណិត បង្កការភ្ញាក់ផ្អើលខ្លាំង
- 2018-09-10 02:07:43
- ចំនួនមតិ 0 | ចំនួនចែករំលែក 0
សិស្សឆ្នើមគណិតវិទ្យាធ្លាប់បានមេដាយមាស ធ្លាក់គណិត បង្កការភ្ញាក់ផ្អើលខ្លាំង
ចន្លោះមិនឃើញ
បេក្ខជន ឆាយ លីអាន ជាម្ចាស់ជ័យលាភីលេខ១ គណិតវិទ្យា បានមេដាយមាសឆ្នាំ២០១៨ បែរជាប្រឡងមធ្យមសិក្សាទុតិយភូមិធ្លាក់មុខវិជ្ជាគណិត បានបង្កការភ្ញាក់ផ្អើលយ៉ាងខ្លាំង។
បេក្ខជនរូបនេះ មកវិទ្យាល័យហ៊ុន សែន ឈូក ក៏ធ្លាប់ជាសិស្សឆ្នើមជ័យលាភីលេខ២ លើមុខវិជ្ជាគណិតវិទ្យាក្នុងឆ្នាំ២០១៥ កាលរូបគេរៀនថ្នាក់ទី៩ទៀតផង។
ជាកូនច្បងក្នុងគ្រួសារ ដែលមានបងប្អូន ៣ នាក់ ឆាយ លីអាន គឺជា សិស្សពូកែមុខវិជ្ជាគណិតវិទ្យា ទូទាំងប្រទេស ទទួលបានចំណាត់ថ្នាក់លេខ ២ ឆ្នាំ ២០១៥ និងលេខ១ក្នុងឆ្នាំ២០១៨។ ចំពោះមូលហេតដែលប្រឡងធ្លាក់គណិតវិទ្យានេះ Sabay កំពុងព្យាយាមទាក់ទងទៅអ្នកនាំពាក្យក្រសួងអប់រំ តែទូរសព្ទដែលធ្លាប់ទាក់ទងកន្លងមកពុំមានការឆ្លើយតបឡើយ។
កន្លងមក Sabay ធ្លាប់ធ្វើបទសម្ភាសជាមួយយុវជនឆាយ លីអាន រួមម្ដងមកហើយ។ យុវជនវ័យក្មេងនេះបានប្រាប់ថា មូលហេតុដែលគេក្លាយជាសិស្សឆ្នើមផ្នែកគណិតវិទ្យា គឺដោយសារតែការខិតខំប្រឹងប្រែងរៀនសូត្រដោយខ្លួន ការជួយបង្ហាត់បង្ហាញ ពីលោកគ្រូ-អ្នកគ្រូ និងការជំរុញលើកទឹកចិត្តពីឪពុក-ម្តាយផងដែរ។ ក្រៅពីម៉ោងរៀន សាលារដ្ឋ លីអាន រៀនគួរក្រៅម៉ោង ដើម្បីពង្រឹងចំណេះដឹងផ្នែកគណិតវិទ្យាទាំងពិជគណិត និង ធរណីមាត្រ តែគេក៏រៀន រូប គីមី និង ភាសាអង់គ្លសទៀតផង។
លី អាន បានប្រាប់ថា ពីវិធីក្នុងការដែលធ្វើឲ្យខ្លួនគេរៀនពូកែនោះ គឺ៖
១. ត្រូវបែងចែកកាលវិភាគសិក្សាឲ្យបានច្បាស់
២.ឧស្សាហ៍ធ្វើលំហាត់ផ្សេងៗឲ្យបានច្រើន
៣.ស្រាវជ្រាវលំហាត់ថ្មី (ទិញសៀវភៅលំហាត់នានាយកមករៀនធ្វើ និង តាម internet)
៤.ស្គាល់លោកគ្រូ-អ្នកគ្រូ ដែលយើងអាចសាកសួរលំហាត់ ពេលយើងត្រូវការជំនួយ
ដោយសារទម្លាប់ល្អខាងលើនេះ លីអាន បានក្លាយទៅជាសិស្សពូកែមុខវិជ្ជាគណិតវិទ្យា ទូទាំងប្រទេស ទាំងថ្នាក់ទី៩ និងថ្នាក់ទី១២៕