មុនស្លាប់ លោកវេជ្ជបណ្ឌិត Beat Richner មានបណ្តាំធំមួយ

2018-09-10 09:48:07
ចំនួនមតិ 0 | ចំនួនចែករំលែក 0

ចន្លោះមិនឃើញ

មរណៈភាពរបស់លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផាបានធ្វើឱ្យប្រជាពលរដ្ឋខ្មែរយ៉ាងច្រើនកុះករ មានការតក់ស្លុត និងសោកស្ដាយជាខ្លាំង។ ទន្ទឹមគ្នានេះលោកវេជ្ជបណ្ឌិត ហេង សុធី អនុប្រធានមន្ទីរពេទ្យគន្ធបុប្ផា ដែលបានធ្វើការងារជាមួយលោកវេជ្ជបណ្ឌិតជាង ២០ឆ្នាំមកនោះបានថ្លែងប្រាប់អ្នកសារព័ត៌មានកាលពីពេលថ្មីៗនេះថា លោកវេជ្ជបណ្ឌិត Beat Richner បានផ្ដាំរឿងមួយ ពេលអស់ពីលោកទៅ។ បណ្ដាំរបស់លោកវេជ្ជបណ្ឌិត គឺគ្មានអ្វីក្រៅពីចង់ឱ្យមន្ទីរពេទ្យនៅដំណើរការជានិរន្ត ដើម្បីអាចព្យាបាល និងជួយសង្គ្រោះអាយុជីវិតកុមារកម្ពុជាបន្តទៀត។

ចុចអាន៖ រំជួលចិត្ត! មកដឹងបំណងប្រាថ្នា៣ធំបំផុត របស់ វីរបុរសសង្គ្រោះជីវិតកុមារកម្ពុជាមុនចាកលោកទៅ

លោកវេជ្ជបណ្ឌិត Beat Richner បានមានប្រសាសន៍ថា ទោះបីអត់ពីលោកក៏ដោយ លោកបានគិតហើយថា លោកចាស់ទៅហើយ លោកមិនអាចកូដវីយូឡុងទៀតទេ។ លោកមានប្រសាសន៍ថា លោកខំរកលុយទុក និងខំរៀបចំប្រព័ន្ធ ឱ្យមន្ទីរពេទ្យឱ្យដំណើរការបាន និងស្ថិតស្ថេរជានិរន្ត ដើម្បីប្រយោជន៍កុមារ។ នេះបើតាមលោកវេជ្ជបណ្ឌិត ហេង សុធី ដោយបានដកស្រង់ប្រសាសន៍លោកវេជ្ជបណ្ឌិត Beat Richner។

យ៉ាងណាមិញរាជរដ្ឋាភិបាលកម្ពុជាសម្ដេចតេជោ ហ៊ុន សែន បានប្រកាសរួចហើយថា នឹងមិនឱ្យមន្ទីរពេទ្យគន្ធបុប្ផាដួលរលំនោះទេ ទោះជាអវត្តមានលោកវេជ្ជបណ្ឌិត Beat Richner ក្តី។ ។ លោកបានគិតរួចហើយថា មន្ទីរពេទ្យនឹងនៅតែអាចដំណើរល្អដូចមុន ឬអាចល្អជាងមុន។ ទោះយ៉ាងណាវាទាមទារនូវការចូលរួមពីគ្រប់មជ្ឈដ្ឋានទាំងអស់ទាំងប្រជាពលរដ្ឋខ្មែរ រាជរដ្ឋាភិបាល និងមូលនិធិពីប្រទេសស្វីស។

កាលពីថ្ងៃទី១១ ខែមេសា ឆ្នាំ២០១៨ កន្លងមកនេះរាជរដ្ឋាភិបាលកម្ពុជាបានសម្ពោធដាក់ឱ្យដំណើរការជាផ្លូវការនូវមូលនិធិគន្ធបុប្ផាកម្ពុជា ដែលគិតត្រឹមថ្ងៃទី ២៧ ខែ សីហា ឆ្នាំ ២០១៨ មូលនិធិគន្ធបុប្ផាកម្ពុជា ទទួលបានសមាជិកដែលបានចូលរួមបរិច្ចាគសរុបចំនួន ៥១ ២៨១ នាក់ និងគិតជាទឹកប្រាក់ បានចំនួនជិត៥លានដុល្លារ និង ប្រមាណជា ៤ពាន់ ១១៥លាន រៀល។

លោកវេជ្ជបណ្ឌិត ហេង សុធី បានឱ្យដឹងទៀតថា ក្នុងនាមអ្នកបន្តមរតកពីលោកវេជ្ជបណ្ឌិត Beat Richner លោកនឹងខិតខំប្រឹងប្រែងធ្វើការងារឱ្យបានល្អប្រសើរបន្តទៅមុខទៀត ដើម្បីបន្តការអភិវឌ្ឍមន្ទីរពេទ្យឱ្យកាន់តែល្អប្រសើរ៕

អត្ថបទ៖ សុផល