Honda ៖ កីឡាករប្រេស៊ីលរត់មិនបាន៩០នាទីពេញល្អឥតខ្ចោះផងចុះកម្ពុជា
- 2018-09-11 02:16:55
- ចំនួនមតិ 0 | ចំនួនចែករំលែក 0
Honda ៖ កីឡាករប្រេស៊ីលរត់មិនបាន៩០នាទីពេញល្អឥតខ្ចោះផងចុះកម្ពុជា
ចន្លោះមិនឃើញ
គ្មានអ្នកណាអាចរត់ពេញ ៩០នាទីពេញដោយល្អឥតខ្ចោះនោះទេ ។ ជាសម្ដីរបស់ Keisuke Honda អ្នកចាត់ការគោព្រៃកម្ពុជា ដែលបានបង្ហាញចំណាប់អារម្មណ៍ក្រោយប្រកួតចាញ់ម៉ាឡេស៊ី ៣-១ យប់មិញនៅពហុកីឡដ្ឋានជាតិ ក្នុងព្រឹត្តិការណ៍ប្រកួតមិត្តភាពអន្តរជាតិ។
អតីតខ្សែប្រយុទ្ធរបស់ AC Milan រូបនេះបានឲ្យដឹងថា បើទោះជាកីឡាករលេងខ្លាំងៗ ល្អកម្រិតពិភព លោកក៏ដោយ ក៏មិនអាចរត់បាន៩០នាទីពេញ ដោយល្អឥតខ្ចោះនោះដែរ។ ប៉ុន្តែគេត្រូវដឹងថា តើគួរធ្វើយ៉ាងម៉េចទើបអាចលេងល្អ នៅពេលដែលខ្លួនបាត់បង់កម្លាំង ដែលរត់មិនបានលឿនដូចដើមវគ្គទី១។
ចំណុចនេះទាក់ទងនឹងទម្រង់លេងរបស់កម្ពុជា ដែលលេងល្អនៅដើមវគ្គទី១ ពិសេសនៅ៣០នាទីដំបូង សមត្ថភាព និងទម្រង់លេងដូចអ្វីដែល Honda ចង់បានទាំងស្រុង។ ប៉ុន្តែនៅចុងម៉ោងពិសេសនៅពេលគ្រប់គ្នាបាត់បង់កម្លាំង ទម្រង់លេងខ្សោយជាងដើមវគ្គទី១ខ្លាំង។ អ្នកចាត់ការរូបនេះបញ្ជាក់បន្ថែមថា នេះជាចំណុចដែលលោកនឹងកែប្រែ និងបង្ហាត់ដល់កីឡាករកម្ពុជា។
បន្ទាប់ពីការប្រកួតមិត្តភាពនេះទៅកម្ពុជានៅសល់ពីរប្រកួតទៀតគឺជួបក្រុមជម្រើសជាតិទីម័រខាងកើត ថ្ងៃទី១២ ខែតុលា ឆ្នាំ២០១៨ និងប៉ះក្រុមជម្រើសជាតិសិង្ហបុរីថ្ងៃទី១៦ ខែតុលា ឆ្នាំ២០១៨ ដែលពីរប្រកួតនេះធ្វើឡើងវេលាម៉ោង ៦:៣០ នាទីដូចគ្នា នៅពហុកីឡដ្ឋានជាតិ៕