អតីតកីឡាករជើងចាស់ Man Utd ៧នាក់ដែលអ្នកស្មានមិនដល់ថាកំពុងបន្តលេងបាល់

2018-09-11 04:48:29
ចំនួនមតិ 0 | ចំនួនចែករំលែក 0

ចន្លោះមិនឃើញ

Manchester United គឺជាក្លឹបកំពូលមួយក្នុងពិភពលោក ពិសេសធ្លាប់មានយុគសម័យមាសឈានដល់កម្រិតមួយផុតដាច់គេកាលពីសម័យលោក Sir Alex។ បិសាចក្រហមជំនាន់នោះប្រជុំដោយកីឡាករខ្លាំងៗដែលបានជួយក្លឹបឈ្នះពានជាច្រើនទាំងក្នុងស្រុក និងតំបន់អឺរ៉ុប។

ពេលវេលាកន្លងទៅយូរឆ្នាំមានកីឡាករមួយចំនួនក៏ចូលនិវត្តន៍ហើយខ្លះទៀតក៏ចំណាយពេលវេលាចុងក្រោយក្នុងអាជីពទៅលេងបាល់តាមប្រទេសផ្សេងៗ ឬវិលទៅក្លឹបនៅស្រុកកំណើតវិញ។ ខាងក្រោមគឺអតីតកីឡាករ Man United ៧នាក់ដែលអ្នកសឹងបាត់ដំណឹងពីពួកគេទៅហើយ តែមែនទែនទៅកីឡាករទាំងនោះកំពុងបន្តលេងបាល់នៅឡើយ៖

#៧ Carlos Tevez

Tevez ចូលរួមជាមួយ Manchester United ដោយផ្ទេរពី West Ham ក្នុងឆ្នាំ២០០៧។ រយៈពេល២រដូវកាលខ្សែប្រយុទ្ធសញ្ជាតិអាហ្សង់ទីនលេងបាន៩៩ប្រកួត ស៊ុតបញ្ចូលទី៣៤គ្រាប់។ កីឡាកររូបនេះបច្ចុប្បន្នមិនទាន់ចូលនិវត្តន៍ទេ និងកំពុងលេងនៅក្លឹប Boca Juniors នៃប្រទេសកំណើត។

#៦ Anderson

Anderson ត្រូវ United ទិញពី Porto ក្នុងឆ្នាំ២០០៧ ហើយចំណាយពេល៧ឆ្នាំកន្លះនៅ Old Trafford បង្ហាញខ្លួនបាន ១៨១ប្រកួត និងស៊ុតបញ្ចូលទីបាន៩គ្រាប់ក្នុងនាមជាខ្សែបម្រើ។ កាលពីខែកក្កដាឆ្នាំ ២០១៨កីឡាករសញ្ជាតិប្រេស៊ីលបានទៅលេងនៅក្រុម Adana Demirspor ក្នុងក្របខ័ណ្ឌលីគទួរគីរហូតដល់បច្ចុប្បន្ន។

#៥ Rafael

Rafael បានទៅលេងនៅ Manchester United ក្នុងឆ្នាំ២០០៨ជាមួយបងប្អូនភ្លោះម្នាក់ទៀតគឺ Fabio។ កីឡាកររូបនេះលេងបាន១៦៩ប្រកួត និងស៊ុតបញ្ចូលទី៥គ្រាប់។ នៅឆ្នាំ២០១៥ខ្សែការពារសញ្ជាតិប្រេស៊ីលបានផ្ទេរទៅលេងនៅ Lyon រហូតដល់សព្វថ្ងៃ។

#៤ Nani

Nani ដែលគេរំពឹងថាជា Ronaldo ទីពីរនោះបានចូលរួមជាមួយ Manchester United ក្នុងឆ្នាំ២០០៧ ដោយផ្ទេរពី Sporting CP។ យ៉ាងណាបញ្ហារបួសមិនបានធ្វើឲ្យកីឡាករដែលចំណាយពេល៨រដូវកាលនៅ Old Trafford នេះទទួលជោគជ័យទេហើយនៅឆ្នាំ២០១៨ រូបគេបានត្រឡប់ទៅក្លឹបចាស់ Sporting បន្តអាជីពនៅទីនោះវិញ។

#៣ Robin Van Persie

ខ្លាចាស់ Robin van Persie បានចាកចោលទ្រនំយូរឆ្នាំ Arsenal ក្នុងឆ្នាំ២០១២ ទៅជួយក្រុម Manchester United ឈ្នះ Champions League លើកទី២០។ នៅរដូវកាលដំបូងខ្សែប្រយុទ្ធរូបនេះស៊ុតបញ្ចូលទីបាន៣០គ្រាប់ឲ្យបិសាចក្រហម តែក្រោយពេល៣ឆ្នាំរូបគេបានផ្ទេរទៅទឹកដីទួរគីលេងជាមួយ Fenerbahce ហើយចុងក្រោយត្រឡប់ទៅក្លឹបចាស់នៅប្រទេសកំណើត Feyenoord នៃលីគហូឡង់វិញ។

#២ John O’Shea

លេងនៅ Manchester United តាំងពីឆ្នាំ១៩៩៩ កីឡាករ John O’Shea មិនទាន់អស់អាល័យពីបាល់ទាត់ទេ បើទោះជាមិត្តរួមក្រុមជាច្រើនបានចូលនិវត្តន៍ ក្លាយជាគ្រូបង្វឹកអស់ហើយក៏ដោយ។ ខ្សែការពាររូបនេះ ចំណាយពេល១៣ឆ្នាំជាមួយ United ស៊ុតបញ្ចូលទី១៥គ្រាប់ហើយបច្ចុប្បន្នកំពុងលេងជាមួយ Reading ដោយចុះកុងត្រា១ឆ្នាំនៅក្របខ័ណ្ឌ Championship។

#១ Darren Fletcher

Fletcher ចំណាយពេល១៣រដូវកាលជាមួយ Manchester United លេង៣៤០ប្រកួត និងស៊ុតបញ្ចូលទី ២៣គ្រាប់។ Fletcher ឈ្នះ Premier League ៥ដង និង Champions League ១ដងជាមួយបិសាចក្រហមហើយបានចែកផ្លូវជាមួយក្លឹបក្នុងឆ្នាំ២០១៥។ សព្វថ្ងៃខ្សែបម្រើរូបនេះកំពុងលេងនៅ Stoke City នៃលីគលំដាប់ទី២របស់អង់គ្លេស៕