កត្តា៤យ៉ាង នៅពីក្រោយភាពជោគជ័យនៃសិស្សឆ្នើមនិទ្ទេសA លំដាប់ពិន្ទុ១០០ពេញ
- 2018-09-12 03:21:25
- ចំនួនមតិ 0 | ចំនួនចែករំលែក 0
កត្តា៤យ៉ាង នៅពីក្រោយភាពជោគជ័យនៃសិស្សឆ្នើមនិទ្ទេសA លំដាប់ពិន្ទុ១០០ពេញ
ចន្លោះមិនឃើញ
នៅពីក្រោយភាពជោគជ័យនៃសិស្សឆ្នើមនិទ្ទេស A លំដាប់ពិន្ទុ១០០ពេញ យុវជន ប៉េង គឹមហេង ជាសិស្សម្នាក់ដែលមានគោលដៅ និងប្ដេជ្ញាច្បាស់លាស់ក្នុងការរៀនសូត្រ។ ទន្ទឹមនឹងនោះសិស្សឆ្នើមរូបនេះ បានបង្ហើបពី កត្តាបួនយ៉ាង ដើម្បីប្រឡងជាប់ដោយជោគជ័យ។ នេះជាសារមួយសម្រាប់ប្អូនបាក់ឌុបជំនាន់ក្រោយ គួរត្រួសត្រាយ និងរៀបចំខ្លួនចាប់ពីពេលឥឡូវនេះតទៅ៖
១. កត្តាខ្លួនឯង
ចំណុចសំខាន់ដំបូងរបស់សិស្សឆ្នើមនេះ លើកឡើងដំបូងគឺកត្តាខ្លួនឯង។ ផ្ដើមពីការខិតខំប្រឹងប្រែងតាំងពីថ្នាក់ក្រោម រហូតដល់ថ្នាក់បញ្ចប់នៃវិទ្យាល័យ គឹមហេង រៀបចំការសិក្សាតាំងដើមឆ្នាំ និងបែងចែកកាលវិភាគឲ្យបានសមស្រប។ ការប្ដេជ្ញាចិត្តប្រឡងយកឲ្យបាននិទ្ទេសល្អគឺជារឿងសំខាន់ ហេតុនេះខ្លួនឯងផ្ទាល់ត្រូវគោរពវិន័យ និងម៉ោងត្រូវរៀន។ សិស្សឆ្នើមរូបនេះ បានចោទជាសំណួរដល់ខ្លួនឯង ថាហេតុអីចង់បាននិទ្ទេស A ? ហើយចម្លើយនោះគឺ ដើម្បីមុខមាត់ និងកិត្តិយសគ្រួសារ។ វាជាសំណួរមួយយើងត្រូវសួរខ្លួនឯងរាល់ថ្ងៃ បន្ទាប់មកការប្ដេជ្ញាចិត្តប្រឡងយកឲ្យបាននិទ្ទេសនោះឲ្យបាន តែចាំបាច់ត្រូវគោរពវិន័យ និងម៉ោងត្រូវរៀនទៀងទាត់។
ជាក់ស្ដែង សម្រាប់ម៉ោងរៀនគួរ ឬរៀនបំប៉ន គឹមហេង រៀនមួយថ្ងៃ ២មុខវិជ្ជា ហើយមួយមុខវិជ្ជា រៀន២ម៉ោង សរុបគឺរៀនគួរ ៤ម៉ោងក្នុងមួយថ្ងៃ ខណៈមួយសប្ដាហ៍គួរលៃរៀនឲ្យបាន៥មុខសំខាន់ៗសម្រាប់ថ្នាក់វិទ្យាសាស្ត្រពិត។ ម្យ៉ាងគួរជ្រើសរើសពេលវេលារៀន ថាតើរៀនពេលថ្ងៃ និងពេលយប់ មួយណាដែលរៀនចូល និងឆាប់ចាំ។
២. កត្តាគ្រួសារ
សមាជិក ជាកតាលីករជំរុញផ្លូវចិត្ត និងផ្លូវកាយដល់យុវជនឆ្នើមនិទ្ទេសAរូបនេះ។ គ្រួសារគឹមហេង តែងតែលើកទឹកចិត្ត គាំទ្រគ្រប់ពេលវេលា និងឲ្យពេល ទំនុកបម្រុងថវិកាគ្រប់គ្រាន់ដល់ប្អូនដើម្បីរៀនសូត្រ។ គឹមហេង ប្រាប់ថា ខ្លួនមិនធ្លាប់រំពឹងថា ដណ្ដើមបាននិទ្ទេស A លំដាប់ពិន្ទុ១០០ពេញ ត្រឹមនិទ្ទេសA ធម្មតាៗប៉ុណ្ណោះ។ ប៉ុន្តែវាជាកិត្តិយសដ៏ធំធេង ដូចជាការតបស្នងសងគុណដល់យឪពុកម្ដាយឲ្យសប្បាយចិត្តរីកមុខរីកមាត់ក្នុងសង្គមដោយសារខ្លួន។
៣. កត្តាសាលារៀន
ឪពុកម្ដាយគឹមហេង បានជ្រើសរើសសាលាមួយដែលមានគុណភាព គ្រូបង្រៀនមានសមត្ថភាព ក្នុងការបណ្តុះបណ្តាល និងអប់រំសិស្ស។ គឹមហេងថា កត្តាសាលាជាចំណុចមួយដែលអាណាព្យាបាលគ្រប់រូប គួរកុំរំលង និងតាមដានការសិក្សារបស់កូនឲ្យបានញឹកញាប់ ខ្លះណាសាលាគឺល្អហើយ តែសិស្សមិនខំ ក៏មិនបានលទ្ធផលល្អដែរ។
៤. កត្តាសង្គម
ពេលវេលាមួយឆ្នាំក្នុងការរៀនថ្នាក់ទី១២ គឺខ្លីណាស់ ដូចនេះគប្បីជ្រើសរើសមិត្ត អាចជួយគ្នាទៅវិញទៅមក។ តួយ៉ាងការជ្រើសរើសមិត្តភក្តិ សិស្សឆ្នើមរូបនេះ ក៏បានពិចារណារើសមិត្តណាដែលអាចជួយ និងសហការរៀនសូត្រតទៅថ្ងៃមុខ។ "ខ្ញុំចូលចិត្ត និងពូកែគណិតវិទ្យាស្រាប់ អ៊ីចឹងខ្ញុំស្វែងរកមិត្តដែលគេពូកែមុខវិជ្ជាផ្សេងទៀត ដើម្បីជួយបង្រៀនបំពេញគ្នាទៅវិញទៅមក " គឹមហេងបន្ថែម។