ធ្លាក់បាក់ឌុប២ដង ពិតជាធ្វើឲ្យខូចចិត្ត តែយុវជននេះ ធ្វើរឿង១មុនគេ ស្រោចស្រង់ខ្លួនឯងរហូតជោគជ័យ

2018-09-12 05:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន១រូប បានចែករំលែកបទពិសោធន៍ខ្លួនឯង ដែលជារឿងត្រូវធ្វើមុនគេ ដើម្បីជួយសង្គ្រោះខ្លួនឯង បន្ទាប់ពីបរាជ័យផ្ទួនៗ ក្រោយធ្លាក់ឌុប។

តាមព័ត៌មានដែល Sabay ទទួលបានគឺយុវជនដដែល បានចូលរួមប្រលងបាក់ឌុប ចំពេលដែលក្រសួងអប់រំ យុវជន និងកីឡា ធ្វើការកែទម្រង់ និងរឹតបន្តឹងការប្រលង លើកទី១ ក្នុងឆ្នាំ ២០១៤។

ក្នុងសារអេឡិចត្រូនិក ដែលបានរៀបរាប់មកកាន់ Sabay អតីតសិស្សបាក់ឌុបរូបនេះឈ្មោះ កែវ រដ្ឋា។ លោកបានបន្តថា លោកធ្លាប់ធ្លាក់បាក់ឌុប ដល់ទៅ ២ដង ដែលធ្វើឲ្យលោកចាំមិនភ្លេច កាលពី៥ឆ្នំាមុន។

មានចំណុចសំខាន់១ លោក កែវ រដ្ឋា ចង់ផ្តាំផ្ញើ និងជារឿងដែលត្រូវធ្វើមុនគេ ដើម្បីចែករំលែក បើទោះបីជាលទ្ធផលបាក់ឌុបមិនគាប់ចិត្ត គឺការលើកទឹកចិត្តខ្លួនឯងជាចម្បង។ ជាប់ធ្លាក់ តែងតែមានពេលប្រលង គ្មានរឿងអី ដែលត្រូវខ្មាសគេ រហូតបិទផ្លូវខ្លួនឯង និងចោលអនាគតឡើយ។

លោក កែវ រដ្ឋា បន្តទៀតថា អនាគតទៅប្អូនៗ មានតែខ្លួនឯងទេ ដែលត្រូវពឹងពាក់បាន និងចិញ្ចឹមខ្លួនឯង។ មួយទៀត ប្អូនត្រូវចាំថា កុំប្រៀបធៀបពេក រវាងកូនអ្នកមាន និងអ្នកក្រ គឺខុសគ្នា បើអូនក្រ ហើយបរាជ័យ តែប្អូនព្យាយាម ថ្ងៃណាមួយប្អូននឹងជោគជ័យ ពេលនោះ កូនអ្នកមាន អាចនឹងខ្មាសប្អូនឯង វិញហើយ ព្រោះគាត់ចេះតែញ៉ាំត្រី អត់ស្ទូចត្រីដូចអូនទេ។ អូនដើរក្នុងសង្គមកាន់តែច្រើន អូននឹងដឹងកាន់តែច្រើន។

ចុងក្រោយ លោក កែវ រដ្ឋាបន្ថែមថា សូមលើកទឹកចិត្តប្អូនៗ កុំអោយបោះបង់ ស៊ូឡើង ឱកាសមានច្រើនណាស់ បើអូនធ្លាក់ អូនអាចរៀនបរិញ្ញាបត្ររងបាន ឬរៀនជំនាញយកតែម្ដង។

សូមបញ្ជាក់ថា តាមរយៈបទពិសោធន៍ខាងលើ បានជំរុញឲ្យ លោក កែវ រដ្ឋា ប្រលងបាក់ឌុបជាប់ ក្រោយដាក់ពាក្យប្រឡងបំពេញវិជ្ជា នៅឆ្នំាំបន្ទាប់។ ក្រៅពីនេះ លោក កែវ រដ្ឋា ក៏កំពុងរៀនបន្ត និងជិតបញ្ចប់ថ្នាក់បរិញ្ញាបត្រព័ត៌មានវិទ្យា (IT) នៅសកលវិទ្យាល័យ១ ក្នុងក្រុងភ្នំពេញ និងមានការងារ១ ដែលអាចចិញ្ចឹមខ្លួនឯងបាន។ នេះបើតាមការអះអាង របស់អតីតបេក្ខជន ធ្លាប់ធ្លាក់បាក់ឌុប ២ដង លោក កែវ រដ្ឋា ។