ប្អូនប្រុស Fan Bingbing សម្រក់ទឹកភ្នែកលើឆាក អាចមកពីរឿងអាស្រូវរបស់បងស្រី

2018-09-12 09:00:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្អូនប្រុសរបស់តារាសម្ដែង Fan Bingbing តារាចម្រៀង Fan Chengcheng បានសម្រក់ទឹកភ្នែកមុខអ្នកគាំទ្ររបស់លោកក្នុងកម្មវិធីជួបជុំអ្នកគាំទ្ររបស់ក្រុម Nine Percent ដែលអាចបណ្ដាលមកពីព័ត៌មានរឿងអាស្រូវគេចពន្ធរបស់បងស្រីបង្កើតរបស់លោក។

កាលពីពេលថ្មីៗនេះ រឿងរ៉ាវគេចពន្ធរបស់តារាសម្ដែង Fan Bingbing ត្រូវបានផ្សព្វផ្សាយពាសពេញបណ្ដាញសារព័ត៌មានស្ទើរពេញពិភពលោក។ តារាស្រីរូបនេះ ត្រូវបានចោទប្រកាន់ពីបទប្រើប្រាស់កុងត្រាក្លែងក្លាយប្រភេទ "Yin-Yang” រួមនឹងពាក់ព័ន្ធនឹងរឿងរ៉ាវខុសច្បាប់ផ្សេងទៀត ដូចជារួមគំនិតក្នុងបញ្ហាអំពើពុករលួយជាដើម។ តាមសារព័ត៌មានមួយបានបញ្ជាក់ជាផ្លូវការថា បច្ចុប្បន្នតារាស្រីរូបនេះ កំពុងស្ថិតក្នុងការឃុំឃាំងក្នុងពន្ធនាគារ ដើម្បីរង់ចាំការកាត់ទោសតាមផ្លូវច្បាប់។

ខណៈ ក្រុមចម្រៀង Nine Percent ធ្វើពិធីជួបជុំអ្នកគាំទ្រកាលពីពេលថ្មីៗនេះដែរ តារាចម្រៀង Fan Chengcheng បានសម្រក់ទឹកភ្នែក ២ ដង អំឡុងពេលនិយាយជជែកគ្នាជាមួយអ្នកគាំទ្រ។ ក្នុងពេលនោះដែរ តារាចម្រៀងប្រុសរូបនេះ បាននិយាយថា កម្មវិធីមួយនេះ អាចជាកម្មវិធីចុងក្រោយរបស់លោកហើយ ខណៈការជួបជុំអ្នកគាំទ្រនៅក្នុងទីក្រុង បាងកក ប្រទេសថៃ នឹងមិនមានវត្តមានរបស់លោកនោះទេ។

ទោះបីជាលោកមិនបានបកស្រាយពីមូលហេតុនៃអវត្តមានរបស់លោកនេះ ប៉ុន្តែអ្នកគាំទ្រមានការសង្ស័យថា Fan Chengcheng អាចនឹងត្រូវបង្ខំចិត្តចាកចេញពីប្រទេសកំណើតរបស់លោក ដោយសារតែរឿងអាស្រូវរបស់បងស្រីលោក។

ក្នុងកម្មវិធីជួបជុំអ្នកគាំទ្រ សមាជិកក្រុម Nine Percent រូបនេះបាននិយាយទាំងអួលដើមកថា៖ "ថ្ងៃនេះ ខ្ញុំចង់និយាយរឿងសំខាន់មួយពាក់ព័ន្ធនឹងពេលអនាគតរបស់ខ្ញុំ។ ១០ ឆ្នាំទៅមុខ ខ្ញុំនឹងមានអាយុ ២៨ ឆ្នាំ។ ខ្ញុំមិនដឹងថា ខ្ញុំអាចឈរលើឆាកតន្ត្រីនេះទៀតឬអត់នោះទេ នៅ១០ឆ្នាំខាងមុខ.......ខ្ញុំនឹងព្យាយាមឲ្យអស់ពីសមត្ថភាពដើម្បីអាចបន្តការងារនេះ។ ខ្ញុំមិនចង់ចាកចេញនោះទេ......"៕

ប្រភព៖ Kenh14 ប្រែសម្រួល៖ អន សុភក្ត្រា