តារាណាខ្លះ ជួបប្រទះឧបសគ្គ ពេលចាប់ផ្ដើមទាក់ទងគ្នាជាសាធារណៈ?

2018-09-14 04:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាញឹកញាប់ មនុស្សគ្រប់គ្នាតែងនិយាយថា៖ "តារាក៏ជាមនុស្សដែរ ពួកគេមានសិទ្ធិក្នុងការរស់នៅជីវិតពួកគេ"។ ទោះជាយ៉ាងណា សម្ដីទាំងនេះ គ្រាន់តែជាពាក្យដាស់តឿនទូទៅធម្មតាប៉ុណ្ណោះ សម្រាប់អ្នកគាំទ្រមួយចំនួន ក៏ដូចជាផលិតកម្មខ្លះ តែងតែចាត់ទុករឿងជីវិតផ្ទាល់ខ្លួនរបស់តារាទាំងនោះ ជាបញ្ហាដ៏ធំមួយសម្រាប់ពួកគេទៅវិញ ជាពិសេសរឿងស្នេហាតែម្ដង។

១. តារាចម្រៀង Taeyeon និង Baekhyun

កាលពីថ្ងៃទី ១៩ ខែមិថុនា ឆ្នាំ ២០១៤ ព័ត៌មានទំនាក់ទំនងស្នេហារវាងតារាចម្រៀង Taeyeon និង Baekhyun បានធ្វើឲ្យមានការភ្ញាក់ផ្អើលពាសពេញបណ្ដាញសារព័ត៌មានកម្សាន្ត។ ព័ត៌មានពីទំនាក់ទំនងស្នេហារបស់តារាចម្រៀងទាំង ២ រូបនេះ បានធ្វើឲ្យអ្នកគាំទ្ររបស់ពួកគេមួយចំនួនមានការខឹងសម្បារ និងខូចចិត្តជាខ្លាំង។

ជាក់ស្ដែង មានអ្នកគាំទ្រក្រុមចម្រៀង Exo ម្នាក់បានអារកដៃរបស់នាងដើម្បីធ្វើអត្តឃាត ដោយដឹងថា តារាចម្រៀង Baekhyun ទាក់ទងគ្នាជាមួយសមាជិកក្រុម SNSD តារាចម្រៀង Taeyeon។ ព័ត៌មានពីការធ្វើបាបខ្លួនឯងរបស់អ្នកគាំទ្ររូបនោះ បានធ្វើឲ្យអ្នកគាំទ្រក្រុម Exo ជាង ២០០ ០០០នាក់ផ្សេងទៀតបានចាកចេញពីគេហទំព័រផ្លូវការរបស់ក្រុម Exo។

២. អតីតតារាចម្រៀង Jonghyun និងតារាសម្ដែង Shin Se Kyung

កាលពីខែតុលា ឆ្នាំ ២០១០ ព័ត៌មានថា អតីតតារាចម្រៀង Jonghyun និងតារាសម្ដែង Shin Se Kyung បានមានទំនាក់ទំនងជាមួយគ្នា បានបង្កការភ្ញាក់ផ្អើលសម្រាប់អ្នកគាំទ្រក្រុម SHINee ជាខ្លាំង។ នៅពេលនោះ ទំនាក់ទំនងរបស់ពួកគេត្រូវបានអ្នកគាំទ្រមិនពេញចិត្ត រហូតដល់អ្នកគាំទ្រជាច្រើនបានឈប់គាំទ្រក្រុមចម្រៀង SHINee ថែមទៀតផង។

ក្រោយមក ព័ត៌មានរបស់គូស្នេហ៍មួយគូនេះ ហាក់សាបរលាប ក្រោយតារាចម្រៀង Jonghyun ចេញមុខសុំទោសអ្នកគាំទ្រលោកជាសាធារណៈ។ ៧ ឆ្នាំក្រោយ Jonghyun បានបង្កការភ្ញាក់ផ្អើលសាជាថ្មី ខណៈរូបលោក បានធ្វើអត្តឃាតខ្លួនឯង ទាំងវ័យក្មេង ដោយសារជំងឺផ្លូវចិត្ត។

៣. តារាចម្រៀង Sulli និង Choiza

ក្រោយបាត់ខ្លួនមួយរយៈធំ និងបញ្ឈប់រាល់ការងារពាក់ព័ន្ធនឹងក្រុម F(x) តារាចម្រៀង Sulli ទទួលរងការរិះគន់ជាច្រើនជុំវិញទំនាក់ទំនងស្នេហារបស់នាង ជាមួយនឹងលោក Choiza ដោយចោទនាងថា មិនមានទំនួលខុសត្រូវចំពោះក្រុមរបស់នាង។

អ្នកគាំទ្រមានការខឹងសម្បារជាខ្លាំង ថែមទាំងទទូចឲ្យរូបនាងចាកចេញពីក្រុមទៀតផង។ ជាងនេះទៅទៀត អ្នកគាំទ្រក្រុម F (x) ជិត ៧៥០ ០០០ នាក់ បានប្រកាសពីការមិនពេញចិត្តរបស់ពួកគេ ដោយបាននាំគ្នាសរសេរពាក្យថា៖ "ខ្ញុំមិនមែនជាអ្នកគាំទ្ររបស់ Sulli ទេ"។ ក្រោយមក ក្នុងឆ្នាំ ២០១៥ ខាងផលិតកម្ម SM ក៏បានប្រកាសជាផ្លូវការថា Sulli បានសម្រេចចិត្តចាកចេញពីក្រុម F (x) ដោយផ្ដោតសំខាន់លើការងារផ្ទាល់ខ្លួនរបស់នាងវិញ។

៤. តារាចម្រៀង HyunA និង E'Dawn

ទំនាក់ទំនងស្នេហារវាងតារាចម្រៀង HyunA និង E'Dawn កំពុងទទួលបានការចាប់អារម្មណ៍ខ្លាំងពីសំណាក់អ្នកគាំទ្ររបស់ពួកគេស្ទើរពាសពេញពិភពលោក។ ខណៈអ្នកគាំទ្រក្រៅស្រុកពេញចិត្ត និងគាំទ្រពីទំនាក់ទំនងស្នេហារបស់តារាទាំង ២ រូបនេះ អ្នកគាំទ្រក្នុងប្រទេសកូរ៉េបែរជាបង្ហាញអារម្មណ៍អវិជ្ជមានចំពោះពួកគេទៅវិញ។

ដោយសាររឿងរ៉ាវស្នេហារបស់ពួកគេ ជួនប្រទះបញ្ហាច្រើនបែបនេះ តារាចម្រៀងទាំង ២រូបនេះ ត្រូវបានបង្ខំមិនឲ្យមានវត្តមានក្នុងកម្មវិធីជាច្រើន។ តារាចម្រៀង E'Dawn បានសរសេរសំបុត្រសុំទោសទស្សនិកជនរបស់លោក ប៉ុន្តែនៅតែមិនអាចកែប្រែស្ថានការណ៍បាន។ ចុងក្រោយ កាលពីថ្ងៃទី ១៣ ខែកញ្ញានេះ ផលិតកម្ម Cube ក៏បានចេញសារប្រកាស បណ្ដេញតារាទាំង ២ រូបនេះ ចេញពីផលិតកម្មរបស់ខ្លួន ក្រោយមកក៏កែប្រែពាក្យសម្ដីថា ពួកគេមិនទាន់បានបណ្ដេញចេញពីផលិតកម្មទៅវិញ៕

ប្រភព៖ Kenh14 ប្រែសម្រួល៖ អន សុភក្ត្រា