ក្រសួងឆ្លើយតប រឿងប្រឡងធ្លាក់របស់សិស្សពូកែរូបវិទ្យាលេខ១ថ្នាក់ខេត្តម្នាក់ទៀត

2018-09-14 09:47:01
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហាសិស្សពូកែគណិតវិទ្យាទូទាំងប្រទេសម្នាក់បានប្រឡងធ្លាក់មុខវិជ្ជាគណិត រួមទាំងសិស្សដទៃទៀតផងនោះ បានជម្រុញឲ្យក្រសួងបើកសើរើ និងប្រកាសលទ្ធផលជាថ្មីឡើងវិញ។ ទោះយ៉ាងណា មកទល់ពេលនេះ សិស្សពូកែរូបវិទ្យាម្នាក់ទៀត នៅតែមិនអស់ចិត្តចំពោះលទ្ធផលលើកទី២នេះ ត្បិតបានដាក់បណ្ដឹងតវ៉ាទៅក្រសួងអប់រំរួចហើយក៏ដោយ។

យុវជន វិន ម៉េងលាង

យុវជន វិន ម៉េងលាង សិស្សពូកែរូបវិទ្យាជាប់ប្រចាំខេត្តកំពង់ចាម ប្រឡងធ្លាក់មុខវិទ្យារូប បានអះអាងថា ខ្លួនមិនពេញចិត្តចំពោះលទ្ធផលបាក់ឌុបទាំងពីរលើករបស់ក្រសួង ដោយហេតុថាខ្លួនធ្លាប់ប្រឡងជាប់សិស្សពូកែរូបវិទ្យាថ្នាក់ខេត្ត ហើយយុវជននេះជឿជាក់លើសមត្ថភាពខ្លួន យ៉ាងហោចណាស់ក៏មិនធ្លាក់មុខវិជ្ជារូបមួយនេះដែរ។

លទ្ធផលលើកទី២

វិន ម៉េងលាង ប្រាប់ថា៖ " ខ្ញុំជឿជាក់មុខវិជ្ជារូបរបស់ខ្ញុំ ហើយខ្ញុំក៏បានផ្ទៀងផ្ទាត់កំណែវិញ្ញាសាជាមួយគ្រូបង្រៀនខ្ញុំផ្ទាល់ដែរ... បើទោះមិនបាននិទ្ទេសល្អមុខវិជ្ជានេះ ក៏បានត្រឹមE ក៏ខ្ញុំមិនអីដែរ នេះបានF គឺធ្លាក់តែម្ដង ហើយមិត្តខ្ញុំឯទៀតជាសិស្សពូកែរូប ក៏ធ្លាក់ដូចខ្ញុំដែរ"។ "ខ្ញុំអស់សង្ឃឹមនឹងពាក្យ អ្នកចេះគឺជាប់ជាខ្លាំង" ម៉េងលាង បន្ថែម។

ឯកឧត្តម រស់ សុវាចា អគ្គនាយករងនៃអគ្គនាយកដ្ឋានគោលនយោបាយ និងផែនការ និងជាអ្នកនាំពាក្យក្រសួងអប់រំ ឆ្លើយតប Sabay ទាក់ទិនបណ្ដឹងសិស្សខាងលើថា ក្រសួងអប់រំនៅតែបន្តទទួលបណ្ដឹងតវ៉ារបស់សិស្សចាប់ពីថ្ងៃចេញលទ្ធផល រហូតដល់ ៣០ថ្ងៃក្រោយ ដោយមានគណៈកម្មការកោសល្យវិច័យ ដើម្បីពិនិត្យដោះស្រាយចំពោះការមិនពេញចិត្តនឹងលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២០ សីហា ២០១៨។ អាស្រ័យហេតុនេះ ប្រសិនបើសិស្សជឿជាក់សមត្ថភាពរបស់ខ្លួន ប៉ុន្តែលទ្ធផលបែរជាខុសរំពឹងទុកវិញនោះ អាចដាក់បណ្ដឹងតវ៉ាបាន ហើយក្រុមកោសល្យវិច័យរបស់ក្រសួង នឹងសម្រេចត្រួតពិនិត្យលម្អិតបន្ថែម ។

តើប៉ះពាល់ដល់លទ្ធផលអាហារូបករណ៍សិស្សដែរឬទេ ?

ឯកឧត្តម បញ្ជាក់ថា ចំពោះលទ្ធផលអាហារូបករណ៍វិញ បន្ទាប់ពីក្រុមកោសល្យវិច័យដោះស្រាយលទ្ធផលរួចនោះ នឹងកែសម្រួលលទ្ធផលអាហារូបករណ៍តាមក្រោយផងដែរ៕

អត្ថបទ៖ ស៊ិន សាវ៉េត