ទាំងល្បី ស្អាត ឆ្លាត តារាថៃទាំងនេះក៏សុទ្ធមានសំណាងកើតមកលើគំនរមាសប្រាក់ដែរ

2018-09-16 08:05:39
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សមួយចំនួន មុនក្លាយជាអ្នកមាន តែងមានជីវិតតស៊ូបំផុត ស្របពេលខ្លះទៀតបានមានសំណាងកើតមកចំគ្រួសារអ្នកមានស្ដុកស្ដម្ភស្រាប់។ ជាឧទាហរណ៍ជាក់ស្ដែងដូចតារាថៃប្រុសស្រីទាំង ៦រូបខាងក្រោម ក្រៅពីមានសមត្ថភាពក្នុងពិភពសិល្បៈ ពួកគេក៏មានដើមកំណើតចេញពីគ្រួសារអភិជនដែរ។

១. តារាសម្ដែង James Ma

អ្នកគាំទ្រប្រុសសង្ហា James Ma ប្រាកដជាដឹងច្បាស់ជាក់ជាមិនខានថា លោកមានប្រភពចេញពីគ្រួសារអ្នកមាន។ លោកមានម្ដាយជាជនជាតិចិន និងឪពុកជាថៃកាត់ចិន ដែលមានរបរនាំចេញនាំចូលទំនិញធំៗ ក៏ដូចជាមានក្រុមហ៊ុនអចលនទ្រព្យ។ ទោះបីជាកូនចៅអ្នកមានលុយចាយច្រើន មិនខ្វះចាយ ប៉ុន្តែ James តែងនិយាយជាប់មាត់ ថា៖ "គ្រួសារខ្ញុំជាអ្នកមាន តែខ្ញុំមិនមានទេ”។

២. តារាសម្ដែង Min Pechaya

ទាំងមានទេពកោសល្យសិល្បៈ រូបសម្រស់ស្រស់ស្អាតទាំងព្រម Min ក៏ជាកូនស្រីម្នាក់ដែលធំធាត់ក្នុងគ្រួសារអ្នកមានដែលរកស៊ីខាងអចលនទ្រព្យ និងមានក្រុមហ៊ុនផ្គត់ផ្គង់គ្រឿងសំណង់ធំមួយក្នុងខេត្ត Khon Kaen។

៣. តារាសម្ដែង Nichkhun

សមាជិកក្រុម 2PM រូបនេះមានកេរ្តិ៍ឈ្មោះល្បីសុសសាយពេញតំបន់អាស៊ី និងបានអង្រួនបេះដូងនារីៗមិនតិចទេ ឲ្យបាក់ចិត្តស្រឡាញ់។ Nichkhun ក៏ជាតារាប្រុសម្នាក់ដែលគេស្គាល់ថាជាកូនមានគួរសមដែរ។ ឪពុករបស់លោកគឺជាអ្នកតំណាងក្រុមហ៊ុននាំចេញនាំចូលធំមួយ ស្របពេលម្ដាយគឺជាប្រធានក្រុមហ៊ុនឱសថ។

៤. តារាសម្ដែង Pimmy Pimprapa

សម្រស់ និងទេពកោសល្យសម្ដែងរបស់តារាស្រីវ័យក្មេងនេះទាក់ចិត្តអ្នកគាំទ្រស្ទើរគ្រប់គ្នា ហើយអ្វីដែលម្នាក់ៗលួចសរសើរមិនដាច់ពីមាត់នោះ គឺសំណាងបានកើតក្នុងគ្រួសារអភិជន។ ឪពុករបស់នាង គឺជានាយកក្រុមហ៊ុន Bangkok Komatsu Sales Co., Ltd ដែលជាក្រុមហ៊ុនធំរបស់ថៃ នាំចូលផលិតផលគ្រឿងចក្រពីប្រទេសជប៉ុន។ Pimmy បានបញ្ចប់ការសិក្សាពីសាកលវិទ្យាល័យ Chulalongkorn ថ្នាក់បរិញ្ញាបត្រផ្នែកកសិកម្ម និងផ្នែករចនា។

៥. តារាសម្ដែង Peach Pachara

ក្រៅពីមានរូបរាងស្រស់សង្ហា និងសមត្ថភាពសម្ដែងខ្ពស់ Peach ក៏ត្រូវគេស្គាល់ថាជា កូនចៅត្រកូលអ្នកមានមិនធម្មតាប្រចាំប្រទេសថៃដែរ។ ផ្អែកតាមទស្សនាវដ្ដី Forbes បានឲ្យដឹងថាគ្រួសាររបស់តារារូបនេះ ឈរនៅលេខរៀងទី ១៤ ក្នុងចំណោមគ្រួសារអភិជនសម្បូរទ្រព្យច្រើនជាងគេនៅប្រទេសថៃ។ គ្រួសាររបស់ Peach កាន់កាប់ក្រុមហ៊ុន Central World ដែលមហាជនមួយចំនួនស្គាល់ច្បាស់ជាងគេ សណ្ឋាគារ Central Hotel ព្រមទាំងផ្សារទំនើបច្រើនកន្លែងទៀត។ ឪពុករបស់ Peach គឺជានាយកប្រតិបត្តិក្រុមហ៊ុនអចលទ្រព្យធំជាងគេក្នុងប្រទេសថៃ ឯម្ដាយលោកគឺជាំម្ចាស់ Brand គ្រឿងអលង្ការ។

អ្វីដែលធ្វើឲ្យអ្នកគាំទ្រមានការកោតសរសើរនោះគឺ តារាប្រុសរូបនេះក៏ជាសិស្សពូកែម្នាក់ដែរ ដោយបានបញ្ចប់ការសិក្សាមុខជំនាញពាណិជ្ជកម្ម និងគណនេយ្យ នៅសាកលវិទ្យាល័យ Chulalongkorn។

៦. តារាសម្ដែង Punpun Sutatta

គ្រួសាររបស់ Punpun មានរបរជាអ្នកនាំធ្យូងថ្មចូលក្នុងប្រទេសថៃ។ ជីវិតតារាស្រីរូបនេះ រស់នៅយ៉ាងរំភើយគ្មានខ្វល់ព្រួយរឿងខ្វះលុយចាយ ព្រោះក្រៅពីកើតមកលើគំនរមាសប្រាក់ នាងក៏អាចរកលុយបានសន្ធឹកសន្ធាប់ពីការងារសិល្បៈដែរ ស្របពេលនាងជាតារាល្បីជួរមុខម្នាក់ដែរ៕