ថ្នាក់ដឹកនាំ Suzuki រំពឹងថា កម្ពុជានឹងយកពាន AFF Cup ឆ្នាំនេះ

2018-09-17 06:35:48
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Nobuo Kidokoro ថ្នាក់ដឹកនាំក្រុមហ៊ុន Cambodia Suzuki Motor CO., LTD ចង់ឃើញពានរង្វាន់ AFF Suzuki Cup 2018 ធ្លាក់ដល់ដៃក្រុមជម្រើសជាតិកម្ពុជានៅរដូវកាលនេះ។

រដូវកាលនេះ ពានរង្វាន់ AFF Suzuki Cup បានបង្កើតជា Tour ដោយនឹងធ្វើការហែពានរង្វាន់គ្រប់ប្រទេសទាំងអស់ដែលចូលរួមប្រកួត។ ដោយជ្រើសរើសកម្ពុជា ជាប្រទេសទី១នោះ លោក Nobuo រំពឹងថាពាននេះ នឹងត្រលប់មកកម្ពុជាជាលើកទី២។ ដោយលោក រំពឹងថាកម្ពុជានឹងធ្វើបានល្អ ក៏ដូចជាយកពាននេះជាលើកដំបូងផងដែរ ក្រោមការដឹកនាំរបស់អ្នកចាត់ការថ្មី Honda ។

បន្ថែមពីលើនេះដែរ លោក Nobuo ក៏សប្បាយចិត្តចំពោះវត្តមានរបស់អតីតកីឡាករជម្រើសជាតិជប៉ុន មានឱកាសមកដឹកនាំក្រុមកម្ពុជា។ ក្រុមជម្រើសជាតិកម្ពុជា នឹងកាន់តែខ្លាំងបន្ថែមទៀត ក្រោមការដឹកនាំរបស់កីឡាករលំដាប់ពិភពលោកម្នាក់នេះ។ ខណៈដែលខាង Suzuki ក៏មានគម្រោងជួយជ្រោមជ្រែងក្រុមជម្រើសជាតិកម្ពុជាដែរ នៅពេលខាងមុខ។

រំលឹកថា កម្ពុជាចូលលេងពានរង្វាន់ AFF Suzuki Cup 2018 នេះ ស្ថិតនៅពូល A ជាមួយក្រុមម៉ាឡេស៊ី ឡាវ វៀតណាម និងមីយ៉ាន់ម៉ា។ ការប្រកួតនឹងធ្វើឡើងចាប់ពីថ្ងៃទី៨ខែវិច្ឆិការហូតដល់ថ្ងៃទី១៥ខែធ្នូ ឆ្នាំ២០១៨ខាងមុខនេះ៕

អត្ថបទ៖ មុន្នីរម្យ