លោក គឹម ហ៊ាង ៖ អ្នកកញ្ជ្រោលទិញដីពុះឡូត៍ គួរស្វែងយល់ពីក្រុមអ្នករកស៊ីដីបីប្រភេទនេះ
- 2018-09-18 06:51:40
- ចំនួនមតិ 0 | ចំនួនចែករំលែក 0
លោក គឹម ហ៊ាង ៖ អ្នកកញ្ជ្រោលទិញដីពុះឡូត៍ គួរស្វែងយល់ពីក្រុមអ្នករកស៊ីដីបីប្រភេទនេះ
ចន្លោះមិនឃើញ
វិស័យដីធ្លី និងអចលនៈទ្រព្យនៅប៉ុន្មានឆ្នាំចុងក្រោយនេះ បានទាក់ទាញការចាប់អារម្មណ៍ និងគៀងគរអ្នកបោះទុនវិនិយោគយ៉ាងច្រើនកុះករ។ ហេតុផលដោយសារតែដីធ្លីចេះតែបន្តឡើងថ្លៃស្ទើរគ្រប់ទិសទី។ យ៉ាងណាមិញបន្ទាប់ពីបានប្រលូកក្នុងវិស័យនេះអស់ពេលជាច្រើនឆ្នាំ លោក គឹម ហ៊ាង ប្រធានសមាគមវាយតម្លៃ និងភ្នាក់ងារអចលនវត្ថុកម្ពុជា បានកត់សំគាល់នូវមនុស្សបីប្រភេទ ដែលកំពុងរកស៊ីក្នុងវិស័យដីធ្លី និងគួរប្រុងប្រយ័ត្ន។
**ទី១ ក្រុមដាច់ខាតត្រូវតែចំណេញពីការវិនិយោគដីធ្លី**
ពួកគាត់ជាក្រុមអ្នក ដែលបានដឹងពីគម្រោងអភិវឌ្ឍន៍នានាមុនគេ ដូចជាគម្រោងបំបែកខេត្តថ្មី គម្រោងសាងសង់ផ្លូវថ្មី និងស្ពានថ្មីជាដើម។ បន្ទាប់ពីបានដឹងគម្រោងអភិវឌ្ឍន៍ទាំងនោះហើយ ពួកគេបានទិញដីទុកចន្លោះពី ២ ឆ្នាំទៅ ៣ ឆ្នាំមុន។ ពេលគម្រោងចេញជារូបរាង ចាប់ផ្ដើមលក់ដីយកចំណេញតែម្តង។
ទី២ ក្រុមទិញភ្លាមលក់ភ្លាម
ក្រុមទី២ នេះគឺជាក្រុមដែលទទួលទិញដីធ្លីពីក្រុមទី១ ហើយក្រុមនេះក៏អាច មានបានដោយសារដីធ្លីដែរ ដោយតែចេះឆក់យកឱកាស និងលក់ចេញភ្លាមៗ។
ទី៣ ក្រុមទទួលផលពីដីឡើងថ្លៃ
ក្រុមនេះមិនមែនជាជនរងគ្រោះទេ តែពួកគេបានជ្រុលទិញដីក្នុងតម្លៃថ្លៃ និងលក់មិនចេញ។ ទីបំផុតត្រូវឱបដីទុក ព្រោះការអភិវឌ្ឍមានល្បឿនយឺត បើទោះជាគម្រោងអភិវឌ្ឍន៍បានចេញជារូបរាងក៏ពិតមែន មានន័យថា តម្លៃដីនៅទីនេះពីមុន និងបច្ចុប្បន្ន គឺដូចគ្នា ប្រែប្រួលតែតម្លៃ។ ក្រុមទី១ និងទី២ បានចំណេញលុយ តែក្រុមទី៣ ភាគច្រើនគាត់ឱបដីទុក និងកប់លុយចោលយូរ។
លោក គឹម ហ៊ាង ឱ្យដឹងទៀតថា អ្វីដែលគួរឱ្យព្រួយបារម្ភ គឺប្រជាជនក្រុមទី៣ នេះតែម្តង។ ការសម្រេចទិញដីត្រូវប្រាកដថា ខ្លួនជាក្រុមទីប៉ុន្មាន? យើងទើបទៅទិញដី មិនត្រូវគិតថា ខ្លួនឯងជាក្រុមទី ១ នោះទេ អ្នកដែលដឹងគឺគេបានដឹងយូរមកហើយ។ លោកបានអំពាវទៅប្រជាពលរដ្ឋក្រុមទី២ និងទី៣ កុំកញ្ជ្រោលខ្លាំងទៅតាមពាក្យចចាមអារ៉ាម និងត្រូវថ្លឹងថ្លែងឱ្យបានគ្រប់ជ្រុងជ្រោយទាក់ទងនឹងតម្លៃដី ព្រោះបទពិសោធន៍លោកមានច្រើនរួចមកហើយ។ ដូច្នេះអ្វីដែលពិតប្រាកដទាក់ទងនឹងគម្រោងអភិវឌ្ឍន៍ ឬបំបែកខេត្តថ្មី គឺពេលរាជរដ្ឋាភិបាលប្រកាសផ្លូវការ ចេញជាអនុក្រឹត្យ និងកំណត់ទីតាំងច្បាស់លាស់។
លោក គឹម ហ៊ាង បានឱ្យដឹងទៀតថា ការបំបែកខេត្តមួយចេញពីខេត្តមួយគ្មានអ្វីប្លែកនោះទេ ព្រោះថា ការឡើងថ្លៃដីពិតប្រាកដ គឺត្រូវផ្អែកលើកត្តាសេដ្ឋកិច្ចមូលដ្ឋាន ដូចជាតំបន់ ដែលត្រូវបានបំបែកនោះមានមនុស្សរស់នៅច្រើនហើយឬនៅ? មានមន្ទីរពេទ្យ ធនាគារ ផ្សារ និងក្រុមហ៊ុន ទើបដីអាចឡើងថ្លៃបាន។
លោកថា បើគ្រាន់តែប្ដូរពីស្រុកទៅជាខេត្ត ហើយតម្លៃដីធ្លីឡើងមួយគុណជាបីមិនអាចនោះទេ។ “និយាយបែបនេះមិនមែនមានន័យថា ទិញដីនៅតំបន់នោះមិនល្អទេ។ វានឹងល្អនៅពេលបី ឬប្រាំឆ្នាំ ដីនឹងឡើងថ្លៃ ប៉ុន្តែបច្ចុប្បន្នអ្វីដែលខ្ញុំមើលឃើញឧទាហរណ៍ថា ដឹហ្នឹងមួយម៉ែត្រការ៉េ ៥០ដុល្លារ បើបំបែកជាខេត្ត ប្រាំឆ្នាំក្រោយនឹងអាចឡើងដល់ ១០០ដុល្លារ ឬ១៥០ដុល្លារ។ តែឥឡូវនៅជាស្រុកតម្លៃដី ៥០ដុល្លារ គ្រាន់តែប្រកាសបំបែកខេត្ត ឬគម្រោងអភិវឌ្ឍព្រលានភ្លាមដីឡើង១៥០ដុល្លារ គ្រឹបតែម្តង។ដូច្នេះមានន័យថា តម្លៃដីឡើងមុខសភាពការណ៍។ អញ្ចឹងគាត់ទិញដីឥឡូវ តែតម្លៃអនាគតទាំងអស់”។
លោក គឹម ហ៊ាង បានបន្ថែម ដោយលើកជាឧទាហរណ៍តម្លៃដីធ្លី នៅខេត្តត្បូងឃ្មុំបាននឹងកំពុងហក់ឡើងខ្ពស់ ស្មើនឹងដីធ្លីនៅទីរួមខេត្តកំពង់ចាម ដែលមាននូវហេដ្ឋារចនាសម្ព័ន្ធគ្រប់បែបយ៉ាង។ ចំណែកខេត្តត្បូងឃ្មុំនៅមិនទាន់មានសកម្មភាពសេដ្ឋកិច្ច និងហេដ្ឋារចនាសម្ព័ន្ធគ្រប់គ្រាន់នៅឡើយ ដែលនេះគឺជាចំណុចគួរពិចារណា៕