Amazon គ្រោងបើកហាងគ្មានអ្នកគិតលុយឱ្យបាន ៣ ពាន់កន្លែងត្រឹមឆ្នាំ ២០២១

2018-09-20 03:54:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនលក់ទំនិញអនឡាញ Amazon កំពុងពិចារណាបើកហាងគ្មានអ្នកគិតលុយ ឱ្យបាន ៣,០០០ កន្លែងនៅត្រឹមឆ្នាំ ២០២១។ នេះបើយោងតាមគេហទំព័រ Bloomberg កាលពីថ្ងៃពុធម្សិលមិញ ដែលបានជជែកជាមួយមនុស្សពាក់ព័ន្ធនឹងរឿងនេះ។

បច្ចុប្បន្ន Amazon មានហាង Amazon Go បីកន្លែងក្នុងទីក្រុង Seattle, Washington និងបើកកាលពីថ្ងៃច័ន្ទនៅទីក្រុង Chicago។

ជាមួយនឹងហាងលក់គ្រឿងទេសទាំងនេះ អតិថិជនមិនចាំបាច់តម្រង់ជួរ គ្មានការត្រួតពិនិត្យ និងគ្មានការចុះឈ្មោះឡើយ។ អតិថិជនគ្រាន់តែ Scan កម្មវិធី Amazon Go របស់ពួកគេជាមួយម៉ាស៊ីន នោះនឹងអាចដើរក្នុងហាងដែលមានផ្ទៃដី ១៨៥ ម៉ែត្រការ៉េ ហើយយកអ្វីដែលពួកគេចង់ពេញចិត្ត រួចដើរចេញជាការស្រេច។

ទោះបីជាយ៉ាងណា ជាមួយគម្រោងបើកឱ្យបាន ៣០០០ កន្លែងនេះ អ្នកនាំពាក្យក្រុមហ៊ុន Amazon បានប្រាប់សារព័ត៌មាន CNBC តាមអ៊ីម៉ែលយ៉ាងខ្លីថា៖ "យើងមិនអធិប្បាយនូវពាក្យចចាមអារ៉ាម និងការរំពឹងទុកនេះទេ"។

Amazon Go ជាហាងលក់គ្រឿងទេស អនុញ្ញាតឱ្យអតិថិជន ទិញឥវ៉ាន់ក្នុងហាង ដោយគ្មានការត្រួតពិនិត្យពីអ្នកគិតលុយ។

ក្រុមហ៊ុននេះ ត្រូវបានគេរាយករណ៍ថា គ្រោងនឹងបើក Amazon Go ឱ្យបានប្រហែល១០ហាងទៀតនៅចុងឆ្នាំ២០១៨ ខណៈ Amazon ខ្លួនឯងផ្ទាល់ មានបំណង់បើកឱ្យបាន ៥០ ក្នុងតំបន់ស្ថានីយរថភ្លើងក្នុងទីក្រុង Francisco និង New York នៅឆ្នាំ ២០១៩ ខាងមុខ។

អ្វីដែលជាបញ្ហា គឺការរកទីតាំង និងអគារជាដើម ព្រោះវាអាចនឹងត្រូវចំណាយច្រើន។ យោងតាមបុគ្គលម្នាក់ ហាង Amazon Go ទីមួយនៅក្នុងទីក្រុង Seattle ត្រូវចំណាយច្រើនជាង ១ លានដុល្លារអាមេរិក៕