3 ប្រទេស ស្វាគមន៍ iPhone ថ្មីចេញ ថ្ងៃនេះ
- 2018-09-21 03:15:34
- ចំនួនមតិ 0 | ចំនួនចែករំលែក 0
3 ប្រទេស ស្វាគមន៍ iPhone ថ្មីចេញ ថ្ងៃនេះ
ចន្លោះមិនឃើញ
បើតាមប្រភពច្បាស់ការពីហាងលក់ទូរសព្ទធំៗនៅកម្ពុជា iPhone XS/XS Maxជំនាន់ថ្មីដែលល្បីកក្រើកពេញពិភពលោក នឹងមកដល់ខ្មែរនៅថ្ងៃនេះ។ នេះជាដំណឹងល្អមួយសម្រាប់អ្នកគាំទ្រផលិតផល Apple។ បើនិយាយពីតម្លៃវិញ កម្ពុជាអាចរៀងថ្លៃជាងបណ្ដាប្រទេសផ្សេងៗ ពោលប្រហែល ១ ៦០០ ដុល្លារ សម្រាប់ iPhone XS ទំហំ 64GB ខណៈ 256GB ខ្ទង់ ១ ៨០០ ដុល្លារ។ ដោយឡែក iPhone XS Max ទំហំ 64GB ប្រហែល ១ ៨០០ ដុល្លារ និង 256GB អាចក្បែរ ២ ០០០ ដុល្លារ ក្នុងជម្រើសពណ៌ មាស ទឹកប្រាក់ និង ប្រផេះខ្មៅ។ តម្លៃនេះបើធៀបនឹងទីផ្សារ នៅឯសហរដ្ឋអាមេរិកផ្ទាល់ មានភាពខុសគ្នាចន្លោះពី ៥០០ ទៅជាង ៧០០ ដុល្លារ ពោលមិនខុសពីគន្លងចេញលក់ iPhone ស៊េរីថ្មីរាល់ឆ្នាំនោះទេ។
យ៉ាងណានៅថ្ងៃនេះ ម្ចាស់ iPhone XS/XS Max ជំនាន់ថ្មីដំបូងគេបង្អស់លើលោក បានរកឃើញហើយ ក្នុងប្រទេសអូស្ត្រាលី គឺលោកTeddy Lee វ័យ ២០ ឆ្នាំ ជានិស្សិតសញ្ជាតិកូរ៉េខាងត្បូង មកសិក្សានៅទីក្រុងស៊ីដនី និងម្នាក់ទៀតមានឈ្មោះថា Mazen Kourouche វ័យ ២១ ឆ្នាំ ជា YouTuber ដែលទិញផលិតផល Apple ដើម្បីយកផលិតជាវីដេអូ។
លោក Lee បានទិញ iPhone XS មួយដើមពណ៌មាស ចំណែក Mazen បានទិញ iPhone XS និង XS Max រួមទាំង Apple Watch Series 4 ដើម្បីយកទៅធ្វើវីដេអូ Unbox។ Mazen ក៏មានបំណងថានឹងទិញ iPhone XR ពេលដែលចេញលក់នៅខែតុលាខាងមុខនេះដែរ។
អូស្ត្រាលី ជាប្រទេសមានលក់ iPhone XS/XS Max ដំបូងគេក្នុងលោក ហើយមានមនុស្សជាច្រើន បានតម្រង់ជួរអង្គុយចាំទិញ iPhone ជំនាន់ថ្មី តាំងពីព្រឹកព្រហាមថ្ងៃសុក្រនេះម្ល៉េះ។ ហាង Apple Store ដែលមានទីតាំងនៅ George Street ទីក្រុងស៊ីដនីបានចាប់ដំណើរការនៅវេលាម៉ោង ៨ ព្រឹក ម៉ោងក្នុងស្រុក។
ចំណែកហាង Apple Store នៅផ្លូវ Orchard Road ប្រទេសសិង្ហបុរីឯណេះវិញ ក៏នឹងមានលក់i Phone XS/XS Max ជាផ្លូវការនៅម៉ោង ៨ព្រឹកថ្ងៃនេះដែរ។ លោក Le Van Thang ជនជាតិវៀតណាមវ័យ ២០ឆ្នាំ គឺជាបុគ្គលដំបូងគេ បានឈរតម្រង់ជួរចាំទិញ iPhone ជំនាន់ថ្មី ដោយបានមករង់ចាំតាំងពីវេលាម៉ោង ៧ ព្រឹកថ្ងៃព្រហស្បតិ៍ (ម៉ោងនៅសិង្ហបុរី) មកម្ល៉េះ ហើយក៏បានទិញ iPhone XS មុនគេផងដែរ។
គួរបញ្ជាក់ថា ទូរសព្ទជំនាន់ថ្មីរបស់ Apple នឹងលក់ជាផ្លូវការនៅអាមេរិក នាថ្ងៃទី ២១ កញ្ញានេះដែរ។ ព័ត៌មានលំអិត ពាក់ព័ន្ធនឹង iPhone ជំនាន់ថ្មីមានលើទឹកដីកម្ពុជា សូមប្រិយមិត្តតាមដានលើគេហទំព័រ Sabay ៕