មកស្គាល់អ្នកផលិតសំឡេងដាក់ភាពយន្តដ៏កម្រនៅស្រុកខ្មែរ ជាចំណែកជួយឱ្យរឿង «ធ្មប់» ជោគជ័យ
- 2018-09-21 08:02:49
- ចំនួនមតិ 0 | ចំនួនចែករំលែក 0
មកស្គាល់អ្នកផលិតសំឡេងដាក់ភាពយន្តដ៏កម្រនៅស្រុកខ្មែរ ជាចំណែកជួយឱ្យរឿង «ធ្មប់» ជោគជ័យ
ចន្លោះមិនឃើញ
សំឡេងក្នុងខ្សែភាពយន្តគឺជាការបន្ថែមដ៏សំខាន់ជួយឱ្យរឿងកាន់តែមានភាពទាក់ទាញចូលអារម្មណ៍អ្នកទស្សនាពិសេសរឿងបែបភ័យរន្ធត់ ដែលត្រូវការសំឡេងបន្ថែមដើម្បីជួយលើកគុណភាពភាពយន្ត នេះបើតាមការបកស្រាយរបស់យុវជនខ្មែរម្នាក់ ឈ្មោះ ស្ពាយ សានាកា។
យុវជន ស្ពាយ ធ្លាប់ជាអ្នកនិពន្ធបទចម្រៀង ផលិតករបទចម្រៀងឱ្យក្រុម Animation Plus ដែលមានបទចម្រៀងមួយចំនួនទទួលបានការគាំទ្រខ្លាំង ដូចជាបទ «វិទ្យាល័យខ្ញុំ» បទ «សារភាពថ្ងៃ Valentine's Day» ជាដើម។ ក្រោយមកទៀត យុវជនរូបនេះបន្តការនិពន្ធ និងផលិតជាភាពយន្តខ្លីមួយចំនួន ដើម្បីស្វែងរកបទពិសោធន៍ រហូតស្វែងរកជំនាញពិតប្រាកដមួយ គឺការផលិតសំឡេងសម្រាប់ដាក់ខ្សែភាពយន្ត។
ដោយមានជំនាញតែងនិពន្ធបទភ្លេង និងមានជំនាញឌីជីថលផ្នែកសំឡេង និងកាត់តបែបបច្ចេកទេស ដោយបានរៀនសូត្រតាមវគ្គខ្លីនានាពីអ្នកជំនាញ និងមានដុងផ្ទាល់ខ្លួនបន្ថែមទៀតនោះ ស្នាដៃរបស់ សានាកា ក៏ទទួលបានការទុកចិត្តពីផលិតកម្មផលិតភាពយន្តក្នុងស្រុកមួយចំនួន។ ដោយថ្មីនេះ ការងារបច្ចេកទេសសំឡេងរបស់យុវជន ស្ពាយ សានាកា ធ្វើឱ្យរឿង «ធ្មប់» របស់លោក ហ៊ុយ យ៉ាងឡេង ទទួលបានជោគជ័យខ្លាំងក្នុងឆ្នាំ ២០១៨ នេះ។
បច្ចុប្បន្នស្នាដៃបច្ចេកទេសសំឡេងដាក់ក្នុងភាពយន្ត ឬស្ប៉ត់ពាណិជ្ជកម្មរបស់យុវជនម្នាក់នេះក៏មានដំណើរការមមាញឹកខ្លាំងផងដែរ ក៏ប៉ុន្តែរូបគេនៅតែយល់ថា ផលិតភាពនៃការផលិតរបស់ខ្លួននៅមានកម្រិតដែលត្រូវការបណ្ដុះបណ្ដាលបន្ថែម។
អ្នកនិពន្ធបទភ្លេង និងបច្ចេកទេសសំឡេងភាពយន្តម្នាក់នេះបន្តថា បើអាចមានសាលាបណ្ដុះបណ្ដាលលើផ្នែកសំឡេងខាងផ្នែកភាពយន្តនៅកម្ពុជា វាពិតជាកាន់តែពិសេស ព្រោះថា កម្ពុជាត្រូវការធនធានអ្នកចេះបច្ចេកទេសសំឡេងសម្រាប់ដាក់ភាពយន្តនេះណាស់ ហើយនិងជំនាញផ្សេងៗទៀតក្នុងភាពយន្ត ដើម្បីធ្វើវិស័យមួយនេះកាន់តែប្រសើរ និងអភិវឌ្ឍដូចប្រទេសដទៃ៕