សហភាពអឺរ៉ុបប្រកាសបើកការប្រកួតរូបថត ផ្ដល់រង្វាន់ធំ ឯប្រធានបទស៊ីជម្រៅមិនធ្លាប់មាន

2018-09-21 10:19:13
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីព្រឹកមិញ ប្រតិភូសហភាពអឺរ៉ុបប្រចាំកម្ពុជា (European Union in Cambodia) បានប្រកាសចាប់ផ្ដើមកម្មវិធីប្រកួតរូបថតដ៏រំជើបរំជួលប្រចាំឆ្នាំជាផ្លូវការមួយនៅកម្ពុជា ក្រោមប្រធានបទ «បេតិកភណ្ឌវប្បធម៌- អតីតកាលជួបអនាគតកាល» និងបានអំពាវនាវដល់អ្នកស្នេហាវិស័យថតរូបទាំងអស់ ឲ្យផ្ញើរូបថតស្នាដៃដើមរបស់ខ្លួន ដែលត្រូវនឹងប្រធានបទនេះចូលរួមឲ្យបានច្រើន។

«យើងបង្កើតឲ្យមានការប្រកួតរូបថតនេះឡើយ ដោយរំពឹងថាអ្នកចូលរួមមិនមែនគ្រាន់តែចង់ឈ្នះរង្វាន់នោះទេ តែនេះជាឱកាសមួយដែលធ្វើឲ្យប្រជាពលរដ្ឋកម្ពុជាចាប់ផ្ដើមគិតដល់ ឬពិភាក្សាគ្នាពីអ្វីទៅជាបេតិកភណ្ឌវប្បធម៌កម្ពុជាផងដែរ»។ នេះបើតាមការលើកឡើងរបស់ឯកអគ្គរដ្ឋទូតសហភាពអឺរ៉ុបប្រចាំកម្ពុជា ឯកឧត្តម George Edgar ថ្លែងក្នុងសន្និសីទសារព័ត៌មានកាលពីព្រឹកមិញនេះ។

ឯកឧត្តម George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា (រូបខាងស្តាំ)

ឯកឧត្តមបន្តថា៖ «បេតិកភណ្ឌវប្បធម៌មានឥទ្ធិពលលើអត្តសញ្ញាណ និងជីវិតរស់នៅប្រចាំថ្ងៃរបស់យើង វាស្ថិតនៅជុំវិញខ្លួនយើង ក្នុងអក្សរសាស្ត្រ សិល្បៈ និងវត្ថុផ្សេងៗនៅក្នុងវិស័យសិប្បកម្មដែលបានរៀនសូត្រពីដូនតារបស់យើង សាច់រឿងដែលយើងតំណាលប្រាប់កូនចៅ អាហារដែលយើងញ៉ាំ ភាពយន្តដែលយើងមើល តាមរយៈនេះយើងបានស្គាល់ខ្លួនឯងច្បាស់»។

«កម្ពុជា ជាប្រទេសដែលមានប្រវត្តិសាស្ត្រ និងវប្បធម៌សម្បូរបែប ដូច្នេះយើងចង់បានរូបថតដែលអាចប្រាប់ពីដំណើររឿងណាមួយ ឬជាអារម្មណ៍ណាមួយ ហើយផ្ដោតលើទិដ្ឋភាពនានានៃវប្បធម៌ខ្មែរក្នុងអត្ថន័យទូលំទូលាយបំផុត»។ ឯកឧត្ដមបញ្ជាក់បន្ថែម។

បើទោះកន្លងមកសហភាពអឺរ៉ុបធ្លាប់បានរៀបចំការប្រកួតរូបថតជាច្រើនក្ដី តែពិសេសសម្រាប់ឆ្នាំនេះ EU ផ្ដោតលើប្រធានបទ «បេតិកភណ្ឌវប្បធម៌- អតីតកាលជួបអនាគតកាល» នេះ ដើម្បីជាផ្នែកមួយនៃការអបអរឆ្នាំនៃបេតិកភណ្ឌវប្បធម៌អឺរ៉ុប ដែលនឹងមានកម្មវិធីពិសេសៗជាច្រើន ដូចជា ការប្រកួតរូបថត ការតាំងពិព័រណ៍ និងព្រឹត្តិការណ៍ផ្សេងៗស្រដៀងគ្នានេះមានការរៀបចំឡើងទូទាំងពិភពលោក។

ការប្រកួតរូបថតនេះបើកទូលាយសម្រាប់សាធារណជនចូលរួមគ្រប់វ័យ ដោយគ្រាន់តែផ្ញើរូបថតច្បាស់ និងជាស្នាដៃដើមរបស់ខ្លួនក្នុងទម្រង់ JPEG និងទំហំយ៉ាងហោចណាស់ 5MB អាចថតដោយប្រើស្មាតហ្វូន ឬម៉ាស៊ីនថត។ សុពលភាពនៃការចូលរួមការប្រកួតនេះគឺចាប់ពីថ្ងៃនេះ រហូតដល់ ៣១ តុលា ២០១៨។

រង្វាន់មាន ៣ កម្រិត៖

លេខ១ បានប័ណ្ណដែលមានទឹកប្រាក់ ៧០០ ដុល្លារ
លេខ ២ បានប័ណ្ណដែលមានទឹកប្រាក់ ៦០០ដុល្លារ
លេខ ៣ ប័ណ្ណមានទឹកប្រាក់ ៥០០ ដុល្លារ។

រូបថតរបស់ជយលាភីទាំងបីនាក់ និងរូបថតសម្រាំងល្អបំផុតចំនួន ១០ នឹងត្រូវដាក់បង្ហាញក្នុងព្រឹត្តិការណ៍នានាដែលរៀបចំដោយសហភាពអឺរ៉ុបនៅកម្ពុជា។ ការប្រកាសអ្នកឈ្នះ នឹងត្រូវធ្វើឡើងជាសាធារណៈ នៅចុងខែវិច្ឆិកានេះ ឯពិធីប្រគល់រង្វាន់ គឺនៅថ្ងៃទី ៦ ធ្នូ ២០១៨។

ព័ត៌មានលម្អិតបន្ថែម សូមចូលទៅវិបសាយ www.eeas.europa.eu/cambodia ឬ ហ្វេសប៊ុក eu.cambodia៕

ដោយ៖ ដេត លីដា

ពាក្យទាក់ទង