Tiki-taka របស់ Barcelona ត្រូវគេចាប់ខ្លេជាប់ កីឡាករត្រូវបង្ខំចិត្តប្ដូរយុទ្ធសាស្ត្រ

2018-09-23 07:13:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Barcelona កំពុងតែប្តូរយុទ្ធសាស្រ្តតាមរយៈការស៊ុតបាល់ពីចម្ងាយ ដែលការស៊ុតរបៀបនេះគេមិនសូវប្រទះឡើយសម្រាប់ក្រុមកាតាឡាន់មួយនេះ ពិសេសរបៀបលេង tiki-taka ដែលប៉ះបាល់ស្អិតសឹងគ្មានគូប្រជែងណាអាចដណ្តើមបាល់បាន។ ប៉ុន្តែអ្វីៗតែងផ្លាស់ប្តូរ។

រដូវកាលនេះ Barcelona រកបាន២០គ្រាប់ហើយគិតមកទល់ពេលនេះ ខណៈដែល៤គ្រាប់ (ស្មើ ២០% នៃគ្រាប់បាល់សរុប) ស៊ុតនៅក្រៅប្រអប់។ វាគឺជាភាគរយខ្ពស់បំផុតដែលមិនធ្លាប់មាន។

នៅរដូវកាល ២០១២/១៣ ក្រោមការដឹកនាំរបស់លោក Pep Guardiola នៅពេលដែលគេទទួលស្គាល់ថាក្បាច់ tiki-taka របស់ក្លឹបអ្នកមានបុណ្យឈានដល់កម្រិតកំពូល ពេញមួយរដូវកាល គ្រាប់បាល់ស៊ុតក្រៅប្រអប់មានត្រឹមតែ ១៥,២% ប៉ុណ្ណោះ។ នេះបើតាម Tribuna ទើបបានចុះផ្សាយ។

តួលេខការស៊ុតគ្រាប់បាល់ក្រៅប្រអប់ច្រើនបំផុតរបស់ Barcelona គឺក្នុងរដូវកាល ២០០៩-២០១០។ ឆ្នាំនោះ Barcelona ទាត់បញ្ចូលទីក្រៅប្រអប់គ្រោះថ្នាក់បាន ២២ គ្រាប់ក្នុងចំណោមគ្រាប់បាល់សរុប ១២៨ គ្រាប់ ស្មើនឹង ១៧,២%។

ហេតុអ្វីបានជា ម្ចាស់ក្បាច់ tiki-taka មួយនេះប្តូរទម្លាប់មកស៊ុតក្រៅប្រអប់យ៉ាងដូចនេះ?

ប្រហែលគូប្រជែងរបស់ Barcelona បានរៀនពីរបៀបលេង tiki-taka។ បច្ចុប្បន្នក្រុមមកពីដែនដីកាតាឡាន់ជួបការលំបាកក្នុងការលេងទល់នឹងតំបន់ការពារក៏ក្រាស់ឃ្មឹកស្ទើរគ្មានចន្លោះទំនេរ។ ដូច្នេះកីឡាករគ្មានជម្រើសអ្វីក្រៅពីព្យាយាមទាត់ពីចម្ងាយ។

ក្នុងឆ្នាំ២០១៨នេះ Barcelona ស៊ុតក្រៅប្រអប់ចំនួន១០គ្រាប់ទៅហើយ។ ក្នុងនោះ នៅពេលលេងទល់នឹង PSV គ្រាន់តែ Messi ម្នាក់ឯង ស៊ុតបាន៣គ្រាប់ក្រៅប្រអប់។

Lionel Messi ស៊ុតបាល់ក្រៅប្រអប់សរុប១០០គ្រាប់គិតមកទល់ពេលនេះ ទាំងលេងឲ្យក្រុមជម្រើសជាតិ និង ក្លឹប។ ប៉ុន្តែ ៤១ គ្រាប់នៃការស៊ុតក្រៅប្រអប់នោះបានមកពីការទាត់បាល់ free-kick ប៉ុណ្ណោះ៕

ប្រភព៖ tribuna ប្រែសម្រួល៖ សុខ លាងហ៊ត