១ថ្ងៃមានតែ ៣០០០៛ ទៅរៀន សិស្សក្រីក្រនិទ្ទេសA ប្រាប់គន្លឹះរៀនយកលំដាប់ពិន្ទុ១០០ពេញ

2018-09-24 10:09:29
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតី ថន រតនា ដែលអ្នកគ្រប់គ្នាស្គាល់ថា ជាសិស្សនិទ្ទេសA លំដាប់ពិន្ទុ១០០ពេញ ទូទាំងប្រទេស នៃការប្រឡងបញ្ចប់មធ្យមសិក្សាទុតិយភូមិឆ្នាំ២០១៨នេះ។

ប៉ុន្តែប្រិយមិត្តឆ្ងល់ទេថា រតនាជាសិស្សក្រីក្រដែលមានឪពុកជាអ្នករត់ម៉ូតូឌុប ហើយរៀននៅសាលារដ្ឋ ចុះនាងធ្វើដូចម្ដេច បានជាមានសមត្ថភាពរៀនពូកែប្រចាំសាលា រហូតបាននិទ្ទេស A លំដាប់ខ្ពស់ផុតគេ? តើមានលុយមកពីណា ដើម្បីរៀនគួរបំប៉នសឹងគ្រប់មុខវិជ្ជា (សម្រាប់ថ្នាក់វិទ្យាសាស្ត្រ) ?

យុវតីរូបនេះ បានប្រាប់ថាខ្លួនចាប់ផ្ដើមរៀនពូកែបានលេខ១ តាំងតែពីថ្នាក់ទី៨ ដល់ថ្នាក់ទី១២។ អ្វីដែលគួរកោតសរសើរយុវតីរូបនេះ គឺនាងជាសិស្សមានការតស៊ូស្វិតស្វាញសិក្សាយ៉ាងមោះមុត បើទោះបីគ្រួសារគ្មានលទ្ធភាពផ្ដល់ថវិកាឲ្យរៀនក៏ដោយ។ រតនាប្រាប់ថា ក្នុងមួយថ្ងៃនាងមានលុយតែ ៣ពាន់រៀលប៉ុណ្ណោះ ហើយចំនួនលុយនេះ គឺពុកនាងឲ្យថេរតាំងពីថ្នាក់ទី៨ មកម្ល៉េះ។

"លុយ៣ពាន់រៀលហ្នឹង ខ្ញុំមិនដែលបានចាយវាយទៅណាទេ ខ្ញុំសន្សំទុកខ្លះសម្រាប់រៀនគួរ និងទុកខ្លះសម្រាប់ទិញសម្ភារៈសិក្សា។ ទន្ទឹមនឹងនោះ ខ្ញុំសូមអរគុណដល់លោកគ្រូអ្នកគ្រូខ្ញុំ មានទាំងគ្រូបង្ហាត់ខ្ញុំតាំងពីថ្នាក់ទី៨មក ដោយខ្ញុំបានសុំការអាណិតសន្ដោសប្រណីពីពួកគាត់ ឲ្យខ្ញុំបានរៀនគួរបន្ថែមមិនគិតថ្លៃ ហើយគ្រូខ្លះក៏គាត់យកពីខ្ញុំតិចតួចបំផុត"។ រតនា បន្ថែម។

ប្ដូរជាមួយការរៀនគិតថ្លៃ ឬអស់ថ្លៃរៀនគួរតិចតួច រតនាស្ម័គ្រចិត្តជួយគ្រប់កិច្ចការរបស់គ្រូមិនរុញរាឡើយ មិនថាដើរប្រមូលលុយគួរ ឬជួយសម្រួលការងារមួយចំនួនជាដើម។ ជារៀងរាល់ថ្ងៃ រតនា តែងវេចបាយម្ហូបទៅសាលាពេញមួយថ្ងៃ លុះល្ងាចទើបត្រឡប់មកផ្ទះវិញ។ យ៉ាងណាមិញគ្រួសាររតនា ក៏មិនសូវជាយកចិត្តទុកចំពោះការសិក្សានាងប៉ុន្មាននោះដែរ ដោយហេតុថាត្រូវស្វែងរកចំណូលផ្គត់ផ្គង់គ្រួសារ។

ក្រោយប្រឡងជាប់បាក់ឌុប បច្ចុប្បន្ន យុវតី រតនា កំពុងរៀនបំប៉នបន្ថែម ដើម្បីប្រឡងចូលសាលាពេទ្យ ដោយនាងមានបំណងប្រាថ្នា អនាគតដ៏ជាក់លាក់មួយរបស់ខ្លួនតាំងពីធំដឹងក្តីមក គឺចង់ក្លាយខ្លួនជាវេជ្ជបណ្ឌិតដ៏ពូកែមួយរូប។ គួរបន្ថែមដែរ យុវតីក្រីក្ររូបនេះ ត្រូវបានសាធារណជនជាច្រើនអាណិត ក្នុងនោះសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន សន្យាជួយឧបត្ថម្ភផ្គត់ផ្គង់សិក្សាផ្នែកមុខវិជ្ជាពេទ្យ ប្រសិនបើរតនាប្រឡងជាប់៕

អត្ថបទ៖ ស៊ិន សាវ៉េត